قصيدة الشاعر خالد بن مدعث الدوسري وهي ( توجد )

هذي قصيدة الشاعر خالد بن مدعث الدوسري وهي ( توجد ) ولقد جاراه الكثير من الشعراء مثل : ناصر الفراعنه و مطلق بن شوية السبيعي و عبدالله السليس ومهدي بن عبار وغيرهم من الشعراء :




كل ما فاضت عيوني باشت الأضلاع غنا
الموارد في الضلوع وكل ضلع فـي ونـه

والتمني ما يحقق هقوت القلـب ان تمنـا
بس قلبي ما يداني تبعـد الهقـوات منـه

وا وجودي وجد من جلي عن دياره مجنـا
تو عمره عشر واربع والليالي مـا تحنـه

ما وراه إلا عجوزٍ واختـه وعـود مسنـا
بين فقر وبين دين وبين ضيم وبيـن منـه

ما ذبحهم غير دمع من الغبينه مـا يكنـا
ويل من سود الليالـي بالمصايـب يبتلنـه

راح مثل الذيب وهبلته حياة الذيـب ظنـا
وآمن والموت يومه بيـن مخلابـه وسنـه

راح ينقل دم قلبه وان ضواه الليـل ونـا
الذيابـه مروحاتـه والسيـوف يدورونـه

ليا ذكر دم القرايب عانـق البيـدا وثنـا
وان تذكر ضحكة امه زاغ قلبه من مغنـه

ما يلوعه في حشاه إلا ليا شاف البرق سنا
غاب عشر اسنين ما به من يرد العلم عنه

ان حداه الخوف منا هزت الأشـواق منـا
يوم طال الوقت عود للديـار اللـي ربنـه

قـال مـا دام المذلـه والبـلاوي يبتلنـا
والله ان الموت في الأوطان بين الربع جنه

يوم وقف في المنازل ما لقى بيـت مبنـا
غير بيـت للهبايـب والـذواري يلعبنـه

راح يمه كنه اللي ضاربـه رمـح مطنـا
وعذابه ما دري ان اسهوم بقعـا يحترنـه

يوم قرب سمع له صوت من العلـه يحنـا
حصل امه عندها ضيف يقول الموت سنة

قال يمه قالت عيوني مـن الدمـع انعمنـا
قال ابويه قالت اطوال النصايب قد خذنـه

قال واختي قالت اقفى القوم باختك مع ظعنا
قال ربعي قالت اسنيـن المجاعـة فرقنـه

قال جيتك قالت ان الموت ما ظنـي تونـا
واستلمها نازع الارواح روحـن مرجهنـه

ثم صاح من التفرق صيحة اللي فيه جنـا
دق صدره وانطوى من حر ما به طي شنه

كل هذا حال قلـب مـن خلقـه الله معنـا
الهمـوم يوكلنـه والـروابـع يوكلـنـه

ليه ادور للسبايـب والسبـب فينـا ومنـا
النفوس وما تسوي واليدين ومـا حصدنـه

لا تسودنا الخطايا نلحق الشرهـه زمنـا
ما جزانـا إلا عملنـا والخلائـق يثبتنـه