من روائع عبداللة بن عون

يا راعي الغـر العـذاب المباهيـش *** رش الكبود اليابسـه عـن عطشهـا

دنق علي وطمن الـراس بشويـش *** واحي العـروق الذابلـه وانتعشهـا

حبك ينهش ثومـة القلـب تنهيـش *** نهش الحنيش لعرش رجـل نهشهـا

واهل الهواء في سجن غيك دروايش *** وقلوبهـم وجلانـه مـن دهشـهـا

من ذاق من خمر السوالف بخاشيش *** يبطـي وروحـه معتلقهـا بلشهـا

ولا تستمع في هل الحكا والوشاويش *** نـاسٍ انقيلـي النامـيـم دبشـهـا

يا خشف يم ذار واوحـي شوابيـش *** بدواً طلوع الشمـس ذاره وغشهـا

والعين عين اللي جسر عقب توحيش *** اميـر بيتـي الحـرار اوحشـهـا

طرح الشبك ما قبلـوه الطواريـش *** ولا قرنسوه اهل العشش في اعششها

وحش وجاي من بعيـد المناطيـش *** عوق الخريش اللي طياره خرشهـا

لا قام ياخذ من طرق ريشها ريـش *** واليـا قضـا لعبـه عليهـا لكشهـا

جابوه من عين الشمـال الهماميـش *** ابرك لهادي طرشـة قـد طرشهـا

جابوه لمثمـن طويـل المطاريـش *** شيخ قوانيـن العـرب مـا دغشهـا

محمد عشير منقضـات العكاريـش *** نجل العيـون اللـي مـلاح بهشهـا

ومهـدي للـي براسـه نغامـيـش *** لا شوشت حيات الارض وحنشهـا

محمـد مقابـل قاصـده بالتباهيـش *** وملفي الرجال اللي جميله غطشهـا

ودايـم وبيتـه مدهـل للمداغيـش *** وكم روح معسور بجـوده نعشهـا

لا يبعد نـاس تكبـر علـى ويـش *** لاشافت الناصـي تلـوت خششهـا

لو يملكون ارقام الامـوال حتيـش *** در الحمـاره دوب يكـي جحشهـا

وروس الضبا ماذكر فيها عراميـش *** لو هي على الزيله كبـار شوشهـا



الشاعر: عبداللة بن نايف بن عون

صح لسان الشاعر وشكرا لك على النقل

مشكور اخوي النمر

قصيدة رائعة

تحياتي

صح السان الشاعر وصح بدنك على الاختيااااااااااار الجميل منك

صح لسان شاعرها .. وتسلم انامل ناقلها

فعلا قصيدة تستحق ان تكون في مجلس العز والشموخ

اخوي النمر
دايما اختيارك مميز وطرحك متميز
يعطيـــــــــك العافية .. ونطلب المزيد

تقبل ودي .. قبل ردّي

ابوعادل اشكرك على المرور
لك كل التحايا

اخوي سهم الرائع مرورك
الله يحفظك

ابن مطيع دايما وافي مرورك زاد من جمال القصيده
لك ودي

عظيم الشوق مرورك يستحق الثنا نورة القصيده
لك احترامي وتقديري
دمت بود