انا بدوي << منقولة من مجالس حرب

هذه القصيده موجهـه من الشاعرابن سهلي الى الشاعرخالد عوض البدراني
وهما اعضى في مجالس حرب

انا بدوي من طلعتي ماتحضريت .. عشرين عام واكثرهـا بالبـداوه

فيها تعلمت الرجولـه و تربيـت .. ومنها تعلمت الذكاء والصحـاوه

انا بدوي لوقالو النـاس عييـت .. الباديه هـي الاصـل والنقـاوه

ياكثر ماني في غلاهـا تشقيـت .. اغليتها لو شفت فيهـا شقـاوه

ياماعلى راس الطويلـه تعليـت .. روس الطوال النايفات العـلاوه
ياما على روس الافاعي توطيت .. حافي قدم مالي بروحي شفـاوه
كم ليله مانمـت فيهـا تهنيـت .. بيني وبين الذيب حرب وعداوه
لاشافني عن حروة الناس صديت .. يسري معي لو طال ليله سراوه
اتبع هواء نياقي ومعهن تمسيت .. نومي على يد الذلـول بذكـاوه
كم موقف يابوعوض فيه مريـت .. مع العطش والجوع حر وقساوه
ابوي وصاني ومنـه توصيـت .. اخذ وصات ابوي بعزه وطـراوه
صل وتهجد واطلبه كل مامسيت .. وحفظ كتاب الله حفـظ وتـلاوه
والضيف قدم له هلا والف حييت .. خله يجي ويروح منـك بحفـاوه
والجار عده واحد من هل البيت .. ماتفعله يمنـاك للجـار سـاوه
لاتكثر الشكوى على كل من جيت .. لوجعك جرح داخـل الكبـد داوه
هذي وصات ابوي فيها تقديـت .. اخذ وصات العـود ليـه قـداوه
امشي برايي بالردى ماتتوحيـت .. ادرى كلام الناس واخشى الفلاوه
مشيت بالدنيـا وفيهـا تعنيـت .. كل السنين الماضيه في عتـاوه
جاهدها ما قلـت للنـاس مليـت .. عندي شقاها مثل طعم الحـلاوه
شرحت لك قصة حياتي وعديـت .. احكم علينـا بازمـن وابتـلاوه

مقطع من رد الشاعر/خالد عوض البدراني

يامرحبا وهلين بالخـط حييـت .. في شاعرٍ ينقى كلامـه انقـاوه

اهلاً هلا حييت لن رحت وانجيت .. غالي ونصاني بيوتـه نصـاوه

ساعة قريت الخط ياذيب فزيـت .. ومن الفرح فزيت فزّت شفـاوه

ياللي على الماضي كثير التناهيت .. وعقلك يزوغ ليا ذكرت البـداوه

والله مالومك لو من الدمع هليت .. وبيّحت مابين الضمايـر خفـاوه

ولاقول وشوله على الرجم عديت .. لانك تذكر وقت فيـه السـلاوه

من طلعتك وانته عليها تربيـت .. واليوم قفت عن زمانك نحـاوه

هيضتني يوم انت ليّه تشكويـت .. وزودت جرح بالضماير لجـاوه

وفيضت ياشليل ماكـان كنيـت .. فيما جرالك باعتبـرك القـداوه