في زحمة أشواق البشر عشت محتاس=حتى الظروف إن قلت تقسى علينا
كني وحيد ٍ ما تهنى مع الناس= أقسى هموم الكون موجود فينا
أجامل احساسي أنا حيل حساس=وأقول عادي لو علا ماشكينا
أقدر ظروف البشر صدق واهلاس= وأصبر على حقد الحقود الدفينا
يوم(ن) غيري عاش في عيشت افلاس= مغنيني الله لو نبي ما حكينا
نصبر على مر الليالي والأتعاس= ونشيل حمل(ن) لو ثقل مرتكينا
لاباس عندي لو علا الهم لا باس= بكره نقول الهم منه سلينا
مادام جاني من جمع لول وألماس= المترف اللي كل ما به يبينا
اللي جمع غير الحلا صدق الاحساس = ما ضن مثله بالخلايق وزينا
دامه يفوح العطر مع عذب الانفاس= وش ينقصه لا قلت كامل رزينا
زينه على كل المزايين نبراس= وحده ولا مثله مع الناس زينا
بسم الله الرحمن ماهب نسناس=بسم الله الرحمن عن كل عينا
دامه شرى قربي على كل الأجناس= جيته أنا والقلب بالحب جينا
ياقلب قله مابقى شي بالرأس= ياقلب قله بالمحبه بدينا
قله عروق الحب ياقلب يباس=قله سنين تمر ماأذكر روينا
قله مادام الموج هادي من الناس = قله على شط المحبه رسينا
قله كتبت احساس حبي بقرطاس= عساه يفهم كيف نكتب بدينا
الشاعر: محمد عقيل الفريدي
قصيدة لشاعر :محمد الفريدي 
العرض الشجري
