ترجمة هاجس

أنا لا بغيت أسج وأسلـى مـع الساليـن
تعـرض لقلبـي مـا يجـدّد معانـاتـه

همـومٍ بقلبـي طاولتنـي ثمـان سنيـن
هنّـي الـذي لا طـرّف الليـل ماجاتـه

وأنا في رجا اللي ما يخيّب رجا الداعيـن
يـعـدّل زمــانٍ كـاثـراتٍ ملفـاتـه

عرفنا من الدنيا صديـق القسـا والليـن
ومصير الرجل يِبحـث خفـاه ونهاياتـه

ومن سَمْع ما هو مثل من شاف بالثنتيـن
ولا كل مـن يـروي تصـدق رواياتـه

ومعدن ردي الساس وقت اللـزوم يبيـن
ومعدن عريـب الجـد تظهـر علاماتـه

وسيع المعرفه واجبـه يرشـد الغاويـن
ولا كـل مـن قصّـر تقصّـر طويلاتـه

وعمى عيني الرجال يركض ورى المقفين
يسوم الكرامـه بالفلـس عنـد شماتـه

ولا يثلم الرجّـال مثـل الفقـر والديـن
ولا تنفـع المبغـوض كثـرة علاقـاتـه

ولا كل من سولف وغنى يجيـب الزيـن
هـدور المجالـس مـا تفيـده دعاياتـه

ولا يجرحك مثل الخطا من طرف غاليـن
وكـلٍ يجـي رزقـه علـى قِـدّ نياتـه

وراعا الوفا ينهج على منهـج الوافيـن
ومتصنّـع الطالـه تضيـع اتجاهـاتـه

وأنا منزلي عند النشامـا يسـر العيـن
وقسمي مع اهل الطيـب علّيـت راياتـه

هذي ترجمة هجسٍ لفاني عصر الاثنيـن
وكـل مـع هجسـه يترجـم معانـاتـه


الشاعر سعد بن جدلان