يالـلـي عـلـى الـمـرواح قـدكــم مشـافـيـق

14-06-07, 03:40 PM

للأسف لم أجد اسم الشاعر

ومن يعرفه لو سمحتم يكتبه

ياللي على المرواح قدكم مشافيـق‏=فوق العديـم اللـي تلامـع بريقـه
من فوق صالونٍ فيـوزه مطابيـق‏=مافتّشـوه اهـل العقـول الطّفيقـه
وما قلّبوه اهل الورش بالمطاريـق‏=وما لفّقوه اهـل المعـارض لفيقـه
وما عِرْض فالصالات لاهل التّوافيق‏=اللي تـدوّر فيـه كسـب و وفيقـه
صوت القزوز تقول جـرّة طواريـق‏=عذراً على شوفـة غلاهـا شفيقـه
وبْدق سلفه كـن قطـف الزّماليـق‏=بين اصبعيـن صغيّـرٍ فـي حديقـه
حافه خبيـرٍ مـا تجيـه التّعاويـق‏=متْزهّـلٍ بـه ليـن يكْمـل طبيقـه
نسل القروم اهل الوجيه المماحيـق=‏فِنْس الخشوم اهل العيـون الغليقـه
سليل عود ومـن سلايـل مطاليـق‏=الكيـف بيـره والدّيانـه محيـقـه
فالليل يسهر بين شـرْب وغرانيـق‏=مايشـرب الا بالسّحـال العتيـقـه
والصبح يسـرح حافـظٍ للمواثيـق‏=ما قد تأخـر عـن دوامـه دقيقـه
يسـرح ولا لـدّ النظـر للمطافيـق=‏حتى اكْتمل شغله على احسن طريقه
ساعة خَلَص والمصنع ايضجّ تصفيق‏=واكبر مديرٍِ فيـه تسمـع صفيقـه
والشيك بيمينه عليه الـف تصديـق‏=مليااار ينّ اللـي عطـووه ويفيقـه
ثم استقال وقال باعيـش ترويييـق‏=وانا الوحيداللـي وصلـت الحقيقـه
حقيقة الفكسـار صنعـه وتطبيـق‏=موديـل نـادر والصناعـه عريقـه
أبيض شطرطونات حُمْـرٍ ملاصيـق‏=علـى جنوبـه والمرايـا فهيـقـه
لِدْبـار ريـمٍ ذيّـروووه التفافـيـق‏=واقبالـه اقبـال السّبـاع المويقـه
عـدّوه للـي حبهـا بالمعالـيـق‏=فالقلب غادٍ لـه غصـونٍ وريقـه
حب الشرف طيـرٍ يتـلّ المسابيـق=‏حب النّقا ما فيـه غـشّ وسريقـه
عقب البطا عنها وعقـب التفاريـق‏=وبفراقهـا قلبـي تطـارخ شهيقـه
والليـل لا مِنْـه ابتـدا بالغواسيـق‏=قلبي حطيمـه زاد واسـرع خفيقـه
واونّ ونّه واغْشِي شـوي وآفيـق‏=وياخوفتي مـن غشيـةٍ دون فيقـه
فيا وجْد حالي وجد من طِرْح ثم سيق=‏فالمعركـه خلّـوه ربعـه وسيقـه
كسير ساق وبـه جـروحٍ مفاتيـق‏=وطـاح بيديـن الرجـال الحميقـه
على مشاهدها علـى فكـة الريـق=يا كود تبرى بـي جـروحٍ عميقـه
هي شفّ بالي دون كـل المخاليـق‏=وباقي الخلايق جعلهم فـي حريقـه