غبطت طفلا جاهلا مابعد طاش =ما غيرت دنياه شكله ولونه
يليهيه عن جور الدهر حس لولاش =مافات ليله بالسهر من شجونه
يبكي على عاجه ويرضيه فشفاش =اهله كرام ابرار ما يغضبونه
قلت آه من دمعا هماليل وارشاش =كن الثريا ترتطن في مزونه
توي عرفت ان الدهر صحبته ماش =يصك من صكت لياليه شونه
والا البشر دم ولحم كثر ما عاش =لابد له من يوم تسبل اعيونه
ماله عن المقسوم لو كان ينحاش =يأتي له الديان ياخذ ديونه
من شال عن راس ابرهة تاج الاحباش =يمر عقب آدم وهم ما يبونه
الموت يأخذ عكف الاشناب ببلاش =ويختار وأهل الدم ما يطلبونه
ياليت عزراييل مامر هواش =ليت السليمي قصر الموت دونه
ياليت ما يملك يميني وماحاش =يفداه لو هو بالثمن يعرضونه
بالعون ما ينسى صديقه سوى اللاش =ولا انساه والله لو تقافت اضعونة
ذكرى وفاء ينبض بها الدم بالجاش =الشاعر اللي مثلنا يذكرونه
شاعر فحل يعجبك قافه الى شاش =كن الجواهر من مصانع الحونه
بحر الأدب تلطم شواطيه وإن طاش =تلقى البواخر سابحه في اركونه
عفيف ما يرمي على الناس بطفاش =ما هان احد ولا يداني مهونه
والله لو ان المقادير تنهاش =لاأحماه عن شر الدهر لايخونه
واللي فقد مثلي كما الحر هواش =يفقد مراسيل النعاس بجفونه
لفوه من تحت الثرى بأبيض الشاش =ياكبر قدره عند من يدفنونه
روابعي وردن على جوه اعطاش =حامن على قبره وعافن سكونه
عساه بالجنه من الخلد بفراش =في جاه من كون على العرش كونه
اليت عزراييل مامر هواش =ليت السليمي قصر الموت دونه 
العرض الشجري
