ديوان الشاعر / محمد بن فطيس المري

هذا ديوان الشاعر / محمد بن فطيس المري
وان شاء الله تستمتعون بقصائدة الجميلة والمعبرة

سولفوا تكفـون لا عـاد تسكتـون=قبـل لا أهوجـس وياتينـي بـلاي
السكـات يـزود طعونـي طعـون=وتنكسر لا جا على راسي عصـاي
سولفوا لو مـا بغيتـوا اتسولفـون=قبل لا اقعد في الحزن رايح .. وجاي
واضحكوا لو بالعمالـه تضحكـون=وجاملونـي لـو يضايقكـم حكـاي
لي وليفٍ راح جعلـه مـا يهـون=هــو دواي وداي .. أو داي ودواي
راح لكن طيف زوله فـي العيـون=مــرةٍ قـدامـي ومــرة وراي
وإن سكتوا جا وهو طيفـه يمـون=رحت أهوجس له وأبيـن لـه ولاي
مكسب عيوني من الفرقا مـزووون=تمطر لطاريه .. والبرق ؟ أصدقـاي
كل ما طـروه لـو هـم يمزحـون=احرموني من غداي ومـن عشـاي
أدري إنه ما تناسـى الـود كـون=تسمع إذنه في قفاي اللسن عـداي
وكانهـم قالـوا نسيتـه يكذبـون=وإلا أنا فيـه أمتلـك نظـرة وراي
كان حبه لي على خبـري مصـون=والله ان كنـي بقـدري .. وبغـلاي
ذي بقايا الحـب وأطـلال الجنـون=والله أعلم في ضميـره وش بقـاي
غير طيعونـي ولا عـاد تسكتـون=ولا والله إن أسمعـكـم بـكـاااي

البارحـة ربـي كتـب لـي ومريـت=دربٍ عليـه بـروق الأحبـاب لاحـت
جيت المكـان اللـي جمعنـا وخفيـت=وقامت جروحـي للجـوارح وصاحـت
ياليتنـي فـي لفـة الـدرب زلـيـت=كان العيون مـن الدمـوع استباحـت
التم غيـم الدمـع مـن يـوم لفيـت=وورقا القصيد لشوفـة الغيـم ناحـت
وضحكت ماأبغي الناس تدري يبالفيـت=لكنها غصـبٍ علـى العيـن ساحـت
حارت دموعي في عيونـي وصديـت=وأرمشت مابيهـا تبيـن .. وطاحـت
وعقبه برق في العين براق .. واسقيت=خـدي ووناتـي بصـدري تـلاحـت
وأنا أحسب إني فـي فراقـه تشافيـت=وان عبرتي من مدخل الـزاد زاحـت
اللي يحسب إني على البعـد سجيـت=والا ان عيونـي للرقـاد استبـاحـت
ياليتنـي مـن قبـل لا أحبـه اقفيـت=والا ان دروبي عـن دروبـه تناحـت
أهون علـي مـن البكـا والتناهيـت=وأشلا من سدودٍ على النـاس باحـت
عرفت كيف الحي يفرق عـن الميـت=وعرفت قيمـة نعمتـي يـوم راحـت
قولولـه انـي عقـب بعـده تدانيـت=ورجلي عن دروب المعافيـن شاحـت
البعـد نـار وطاعـة العـذل كبريـت=يقصر على بعده .. ترى الكبد فاحـت

ماهو بكيفك عقـب شـيٍ حصلـي=من ذوّق المحتاج يصبر الى احرجْه
خليتني مـن حلـو حاليـك احلـي=واصبحت مدمن حب والقلب روّجْـه
بين العروق وصار مافيه " ملـي "=الا ولـه جُـرّه تمـرّه وتسهَـجْـه
وذود الغلا في عشب قلبـي تفلـي=وتراب صدري للمطر منْك ما احوجْه
يمحل الى صدّيت ويموت يـا اللـي=صديت عنّه والله احيـاه واخرجْـه
ولي خاطر ٍ يسألْك من لي ياخلـي؟=غيبتْك تلعب به وشوفتْـك تبهجْـه
ولي عين حالي دمعهـا لـك يهلـي=وانْ رحْت راحت مالح الدمع تزعجْه
غالـي ولا يحتـاج بسّـك تغـلـي=غلاك اخذ قلبي وروّضْه واسرجْـه
ولو قلت ياعينـي بصـدره تملـي=شافت خفوق ٍ حبك الـذرْب توّجْـه
وماهو على كيفك عقب ما حصلـي=من ذوّق المحتاج يصبر الى ازعجْه
عطيتني وجهك وانـا جيـت كلـي=محروم والمحروم ما ينعطـا وجْـه

لا ضاقت الدنيا عليـك وتشاويـت=خلق الله اللي فالرخا كـان واجـد
ومن العرب والصوت والثوب مليت=وقامت عليك هموم بأقعـا تراجـد
فارفع يديـك لخالقـك لا توضيـت=وادعو تراك أقرب إليا صرت ساجد
ووقت من أوقاتك للأوقات توقيـت=وسجل لنفسك في المساجد تواجـد
وأبشر بفزعة حامي الدين والبيت=إليا هجدك من الهواجيـس هاجـد
اللي يميت الحي ثم يحيـي الميـت=لرضاه شف كثر البشر بالمساجـد

في شاعر المليون للشعـر مضمـار=والسابقة في الشوط تظهـر بيدهـا
امضمريـن أبكـار الأفكـار شعّـار=وكلـن يحضّربكرتـه فـي وعدهـا
واللي تردت لا يـدور لهـا أعـذار=معـذورة مـا دام قـد ذا جهـدهـا
واللي تعوص وتضرب الحاجز يسار=تشـلّ ف الدنـة وترجـع بلـدهـا
وأنا ذلولي بنت صوغـان الأشعـار=من حبهـا عنـدي تفحـم وحدهـا
إن جاره الله من تصاريـف الأقـدار=جاتك وجـاك الجيـش كلـه بعدهـا
الله عليهـا مـن مقاريـد الأنظـار=وصلت تحست مـا غشاهـا زبدهـا
وتلقوفهـا بالعلـم رمـز وإشعـار=وصفق لها منهـو بعينـه شهدهـا
ومن روبها أول ما تنصـخ تمطـار=ياللي تزعفرها مـن الطـاس زدهـا
شبهت بالهجن الأصيـلات الأشعـار=وقصيدتـي تـراث أهلنـا مـددهـا
أعتزبـه وأقبلـه إجـلال وإكـبـار=واحة شرف يا سعد منهـو وردهـا
أغلبنا في موجب الضيـف والجـار=يحلـب لبنهـا قبـل يذبـح ولدهـا
وتراثنا من دونـه نبيـع الأعمـار=وبأفعالنـا روس المعالـي صعدهـا
واليوم ضاق الجو من كثر الأقمـار=تبـث حقـد لـي لحقـده رفـدهـا
غزا الشعر قبل أمس غازين الأفكار=قومن على الساحـة دفعهـا حقدهـا
تلفقوا ثم جاؤوا مـن كـل الأقطـار=هـذا يصبحهـا والآخـر هجـدهـا
هذا يحرف في الأسف سر وإجهـار=وهذاك يذبـح موهبـة فـي مهدهـا
وقفوا علم للشعر في وقت الأسحـار=غاروا على الساحة وعروا جسدهـا
وصاحت بعد ما شافت سترها طـار=ووقّف ولد زايـد محمـد ساعدهـا
قال أبشري بالستـر وبـردة الثـار=وأضفى عليها سترهـا مـا نشدهـا
واستل سيف فـي المواجيـب بتـار=واطلب وردن في العلا مـن فقدهـا
على خطى زايد خطاويـه مـا بـار=والحاجة اللي فـي خيالـه وجدهـا
أغنى العرب من شوف أكاديمي ستار=ومن شوف أمر من السخافات وأدهى
شفت الشعر بستان وأبوابه أزهـار=وقطفت ما يسقي المشاعر شهدهـا
قطفتها مـن ديـرة تنبـت أحـرار=من دار بو مشعـل ذراي وسندهـا

ودي بك وابيـك وابـاك وابغـاك=جمّعتهـا لرضـاك واختـار فيهـا
شف ويش منها يتبع احكاك ورضاك=ولي لك اسقي مسمعـك لا ضميهـا
غديت افر احكاي واسايـر احكـاك=و انـا تشّـرف لكنتـي واهتويهـا
مضمونها ودي بشوفتـك واهـواك=يلي دروب اهل الردى مـا تجيهـا
صانك ولي امـرك وحبـك وداراك=و لاقـدر ردع الحظـوظ ومجيهـا
نفسـك مهذبهـا وعـز الله ربّـاك=مايدري ان جيش الهيـام يغزيهـا
يامرك قلبك بالوفـا لـي وتنهـاك=ناس(ن) على لاماك تفـرك يديهـا
رزين عقل ومـن مزايـا مزايـاك=نفسـك تحـب وعفتـك تمتطيهـا
ياعزوة اخوانك ومطلـب هـذولاك=نـاس(ن) محبـة والـدك تدعيهـا
ناس(ن) تخدم ابيـك كلـه لعينـاك=وهو يحسب ان الله عليـه يهديهـا
ياجعلها تفدى على الارض ماطـاك=والله بمـن هـو مثلهـا يبتليـهـا
لكن لعـب فـي ياوليفـي تغّـلاك=نفسي غلاك من الصـدود يحديهـا
تبطي علـي وانـا هنـا واتحـراك=كبدي لواهيـب الصبـر تشتويهـا
كانك مشكك في الوفا والغلا هـااك=جوالـي اقـر القائمـه كـل ابيهـا
رقمك مع الصادر ولا وارد اسـواك=الناس في اللـي لـم يـرد عليهـا
وايـاك واياني...وايانـي ايــاك=من غيبة(ن) من دون عذر يحميها

الله يجازي مـن يسـوي سواتـك=بذنوب من سوا سواتـك يجازيـك
مشيت درب الثقـل وتحـب ذاتـك=ماتـدري انـه للمهالـك يـوديـك
غـرك جمالـك ياخسـارة حلاتـك=ماتـدري ماغيـر طبعـك يحليـك
اتقـول زينـك يشفـع السيئاتـك=الحسن ماهو عن وفا الحب يعفيـك
لو التواضع والوفـا مـن سماتـك=بعت الحبايب كلهم ديـن وشريـك
لاكن عجـزت اغيـرك ياجراتـك=على الغياب اللي بلا عـذر ينجيـك
خطاي في توضيح وشهي غلاتـك=وخطاك في توضيح وشهو تغليـك
وشلون توصيني وتنسى وصاتـك=وتصد عن صوت(ن) تقطع يناديـك
مافـادك التجريـح والعـذر فاتـك=تبغي رضاي الحين ماعـاد يمديـك
صحيح احبك بـس هـذي جزاتـك=بعلمك درس(ن) يفيـدك وينجيـك
تدري وش ابيض من خفوقك عباتك=وتدري وش اللي غرني نظرتي فيك
أدري بتستغـرب تصبـر وجاتـك=قصيدت(ن) من واحدن كان يغليـك
تبغي تناظر وانت عايـش مماتـك=شف وحدتك والناس تجلس حواليك
وتبي تشوف أشجع رجل في حياتك=شفني وانا راحل وانا ميتـن فيـك

العام خذت البيرق وصـدت العقـاب=يوم الرجال حلوقها مـن دون ريـق
أسرجت شعري والجماهيـر الزهـاب=وإسنادي بـلاد وولـد عـم ورفيـق
وحوّلت فالوادي وهو دونـه ضبـاب=مدري ورى الوادي مطر ولاّ حريـق
كم فـارس وده يحـوّل غيـر هـاب=يستوحش الماخوذ لاشاف المضيـق
أقدمت والفرسـان ترتـاب وتهـاب=أجـرّي الهيّـاب وأجـرّ الطـريـق
ومثّلـت داري بالقصيـد وبالجنـاب=من الشمال إلى العديد إلـى العريـق
ترابهـا بالحـسّ ماحسّـه تــراب=وحزومها تسوى الزمـرد والعقيـق
ومثّلت راية من تليـن إلـه الرقـاب=صليب راي وكفو وحجاجـه طليـق
ممشـاه للعليـا ذهـاب بـلا إيـاب=الشيخ ابو مشعل حمـد علـمً دقيـق
ومثّلت كل الشعب من شايب وشـاب=بدو وحضـر تاريخنـا عـزً عريـق
ومثّلت ربعً فالوغـى مخلـب ونـاب=مريّـةً تاريخـنـا مـاهـو لفـيـق
حن مزبـن اللـي لايجـار ولايثـاب=وحن فزعة اللي ذودهم راحت وثيـق
أقدامنـا جبـال وعمايمنـا السحـاب=وأمجادنا تشبه سهيـل إلهـا بريـق
ومثّلـت يـام بكبرهـا والإنتـسـاب=إلى بني همـدان نجـمً لـه شعيـق
الله خلقنـا سيـلاً متونـه هضـاب=كـل السـدود يحطهـا حـبً دقيـق
شاركت متوكل على منشـي الحقـاب=وحزامي من الشعر والعـدّة يضيـق
وطرقت بيبان القواقـي بـاب بـاب=وقدّمت ماشفتوا جميـع إنـه يليـق
وحشمت أذانيكم عن سقاط الخطـاب=ورقيت بأيديكم علـى قمـة طويـق
وعدت داري بالفخـر قبـل الكتـاب=ووفيـت بأمـر الله بالعهـد الوثيـق
وسترت بأفعالـي مزينّـة الخضـاب=وقهرت عدواني ونومسـت الرفيـق
ولطم بعيري شـوط واحـد للركـاب=يقوم راس وينتهـي ماهـو زريـق
ومن كف ابو خالد تسلمت النصـاب=من كف من عينه على القمة تويـق
شيخ يروم المجد ويـروم الصعـاب=خلّى الشعر من نومة الغفلـة يفيـق
واليوم لاوالله شفـت القـاف شـاب=صار الشعر كورة وكلً لـه فـر يـق
وضاع الهدد بين الحديـا والغـراب=وضاع الصهيل مكرّمين من النهيـق
إلا الرجال اللـي قصايدهـم عـذاب=اللي لها معنـى بهـا حـسً رقيـق
لاتشعـل الفتنـة ولاتطـرد سـراب=ولايـرقّـع مانقصـهـا بالزعـيـق
بس العرب ماعاد تـدري بالصـواب=ماميّزوا ويش الزفير مـن الشهيـق
من جاب ضيعة قيل شوفوا ويش جاب=انا اشهد انه جاب له معنـى عميـق
الذيب كانـه ذيـب يـدرع فالذيـاب=يخلـي الخرفـان للضبـع العـويـق
ماجيت انافس جيت دعمـاً للشبـاب=وفوزي دمه عاده على القمة يريـق

الضيقة اللـي دايـمٍ تالـي عصيـر=وش حيلتـي وأردهـا لا تجيـنـي
لا طال ظل العود حزة عشى الطيـر=كنها على سجـن الحديـد تحدينـي
يضيق صدري كل ما جـات وأسيـر=ولايخفـف سـوج رجلـي حنينـي
لا حولنا مشـراف ولا اقـدر اطيـر=يالله قمـسـة خـيـر لا تبتليـنـي
وعقارب الساعة توقف عن السيـر=ولاكن في الدوحة سواتـي حزينـي
والعبره اللي تاصل الحلـق وتحيـر=يا قربها لو قيـل لـي يـا عوينـي
أمل شـوف النـاس ورد ومصاديـر=واللي يقول اشفيـك كنـه يهجينـي
يعني على ما قيل من بـاب تصويـر=(لاحدٍ أبي قربـه ولا أحـدٍ يبينـي)
أروح أدور خـط مـابـه دواويــر=وأدور الـلـي هـادهـا تهتديـنـي
وآخذ مع الهاجوس سجـة وتفكيـر=وأراجع اللـي فـات بينـي وبينـي
وأحسـب ذنوبـي وأدور التكفـيـر=عساي مـا قصـرت فـي والدينـي
وعساي ما قارنت من ينفـخ الكيـر=واللي يحمل المسـك جعلـه قرينـي
ويطري علي يوم الحشر وأطلب مجير=ما أعطى كتابي في شقيقـة يمينـي
ويطري علي صدقان كثـر الدنانيـر=اللـي اتعادينـي إلا كـثـر ديـنـي
وراعي الهروج اللي سوات المناشير=أصـد عنـه وأدري انـه يعنيـنـي
الله حسيبه يـوم عـرض القواويـر=والله حسبـي مـن صـواب مكينـي
وإلا طرالـي واحـد كانـه اصغيـر=أم أصغـر بيومـيـن ولا سنيـنـي
دريت وش قومـي وعينـت تفسيـر=للضيقة اللـي مـن زمـن تعتلينـي
حبه بصدري سالفة سـر فـي بيـر=وكـن الفـواد يقـول هـذا زبينـي
أشفق على علمٍ يجي منه من غيـر=لا يسمع اللي سولفـوا بـه ونينـي
يا كثرهم غيرهم ولكن خبـر خيـر=ما غير شوفه في الوجـود يهنينـي
رايي كـذا يـا عاشقيـن الغناديـر=ماله على وجـه البسيطـه وزينـي
العام أجيهم من حسـاب المساييـر=واليوم حـال عـداي وينـه ووينـي
خطاي تعليق الأمـل فـي المدابيـر=اليـن راح وشفـت حقـري بعينـي
صبرٍ جميـل وخابـر إنـه مقاديـر=والله على تخفيـف حزنـي عوينـي
ذي حالتي لين اتغبا الشمس واصيـر=معطى سراحي عقب مانـا سجينـي
واذا امتلى جوف الشجر بالعصافيـر=طلبـت مـن رب العبـاد يهديـنـي
يعتقني المذن عقب ضيقـة عصيـر=اللي على سجـن الفـراق اتحدينـي

في كفهـا خاتـم وفـي خدهـا خـال=وفي عينها غيـم وعمـارات وبيـوت
الخال شفته واضحٍ مـن ورى الشـال=والخاتـم المـاس مرصـع بيـاقـوت
والعمر في العشرين كنـي مانيـب زال=والجسم كنه من جبـل ثلـج منحـوت
جبل ولكـن لا طرقـه الهـوى مـال=وخطواتها ماهـي بالأمتـار بالفـوت
ماهي تشوف الشمس من ظل الاظـلال=ومصيافها مـا بيـن لنـدن وبيـروت
الشمس لو تشرق على جسمها سـال=كنهـا مجسـم محلبيـه وبسـكـوت
ومن صغر مبسمها شقى حالها الحـال=ما تاكل الا اللـوز والخـوخ والتـوت
ماهي تشوف الناس تمشـي وتختـال=ومرٍ على جاكور ومـرٍ علـى حـوت
وخدامتيـن وهـي بـلا زوج وعيـال=وسمعتهـا تدعـي الدريـول يياقـوت
وثـلاث جـوالات مـاهـو جــوال=ومن يوم خلقت كـل شـيٍ بريمـوت
لكـن قلبـي مالهـا فـيـه مثـقـال=وش قرب البشت الحساوي من الكـوت
ياجعلهـا للـي خـذت قلبـي نـعـال=اللي غلاها عنـدي الشـرب والقـوت
حوريـةٍ مـن فوقهـا الليـل شـلال=كنهـا صبـحٍ فوقهـا الليـل مكتـوت
قلبي لها من كثـرة الشـوق مشخـال=وللسر عـن كـل المخاليـق تابـوت
تنحت لي من الحب في القلـب تمثـال=وحبي لها ينحت على الساحـه بيـوت
فـي عينهـا ماكـل رجـال رجــال=وأقصى حدود الوصل في سلمها الصوت
زودٍ على القلب وعلى الحسن مـن آل=روسٍ لهم روسٍ على متونها بشـووت
الى رضت موتوا يا أهل روس الأموال=وإلى زعلت جربت وش سكرة المـوت
من دونهـا رجلـي وراكـب وخيـال=والسيف والأمـواج والبحـر والحـوت