الجرده ... والجراديه
صبجتم بالخير يالربع ولا يهونن الربايع بنات راشد...
انا يالربع والعياذ بالله من قولت انا .. رجال بدوي على خبركم ولا ني راعي دلوله بالمدينة .
ويوم وصلت المدينة وسلمت على ربعي واخذت واجبي وافي وزود ..
بغيت اطب السوق اتقضى للعيال .. حج وحاجه ، سلام ومقضات لزوم .
ويوم اصبحت ولا ابو ريم مخدرن هاك الفنجال بالهيل والزعفران ، تقهويت واللي علي بالخير ثم طلع ابوريم لدوامه وانا لبست عباتي وقلت ابي انحر لسوق علشان ارجع بدري .
الغدى عند ابوفيصل منصور الطهيمي حالف علي وناب على الجماعه.
تلفت ادور حدى الربع يروح معي ولا ماهنا احد .. الا اجذعن دبيبة راقد بزاوية المجلس جاي البارح على قولتهم من الجبيل تالي الليل ... عليه له عربيدتن طايره مامشطها ...تسنه مشتدن بها البارح وهو يسوق مع الخط.. تسان ماني غادي عليه دمت الهبيرات ...
المراد اني طلعت من المضافة وخليته راقد .. قلت خله يرتاح ...
ونحرت هاك التكسي واقف .. وقلت ابي الجرده ياولد ..
قال اركب بابا ..
وهو يهمز الموتر تقل جني .. ول طار وقعك ياهذا ..
واصيح عليه ابك اركد اركد وش بلاك انت ؟؟
ترانا بصبح ولا علينا عجله ..
ولا رفيقي ماهو يمي يهز راسه... ولا يحتسي ،
وهنا كورتن بفمه الله يتسرمكم يلوكها مع صبح الله ويتافل على الطريق ..
وانا اوقفه وانزل ...دبل تسبدي المذهوب ... لابوك لابو من جلبك علينا ياملعون الصلايب...
وانا اقف على الخط شوي ولا واحدن ثاني واقف عندي بغى يدعسني ...
وحلالاه ليتني مصحين بناخي يوديني ولا نزلت الحالي ...
المراد اني ر تسبت معه ولا مثل رفيقه تقل وخي (ن) له ...
وانا اركب ورى هالمره ... قال وين قلت ابا السوق انحر الجرده ...
وهو يغير تقل قريص قامزن من فراشه ..
وانا اتمسك بالمرته اللي قدامي واتربط بالحزام تسني خواجه.
وهذا انا مشتد و اطالع قدام ... ماقدرت اغفل عن الدرب اتفرج على الديره..
وعندك عندك عندك عندك لين وصلنا هاك الحاره قال انزل وصلنا .
قلت هذي الجرده قال ايه هذي الجراديه ..
ابك وش الجراديه ؟؟
انا اباي الجرده السوق بطن الديره
قال مافي بطن فيه بطها يبغى بطها قلت
بطها بطها وش نسوي والغريب عمى ...
وهذا حنا من كبري بكبري لين يسر الله علينا وصلنا
عقب مادبل تسبدي من كثر مايحك علباته لين ادمى فيها تقل اجرب ..
يامل الحتسه اللي ماهي هذي ان شاء الله .
ايه ترى صارة لنا سالفه انا وياه على سالفة الحتسة ابرجع لها .. عقبين ان شاء الله .
المراد طببني هاك السوق اللي مافيه ريحة سعودي .
تقل موديني ديرته .. طرت علي يوم اروح ارتسب سنون بالهند ...
وانا اطالع بالسوق اللي ماهو هين
بس البلى كل اللي فيه من شلة ابو نسافه وجيرانهم من ابو وزره .
يالله اني داخلن عليك .. ابكم الديره وش صار فيها منقلبه .
والعالم هذي وش قصتها بديرتنا ...؟
ومن جابهم لنا ؟؟؟ ومن جلبهم علينا ؟؟؟ امحق من جلاب ومجلوب .
محتلين السوق اذهبهم الله مافيه غير انا والعسكري راعي الدورية بينهم والباقين هم!!!
سواق التكسي منهم ... البياع بالدكان منهم ... راعي المطعم منهم ...
اللي بالفندق منهم من الفراش الى المدير...
وان طبيت الصحية ولا منهم من الحارس الى التختور!!!؟
السالفه وشنهي ؟؟
هي احتلال ؟ الا احتلال عيني عينك بس مقنع باسم عماله للحاجه!!.
عساها تنقطع من حاجةٌ حدت عليهم ايوالله .
انتم ماتعلموني الحين من هو المسؤل عن هالسيبه؟
من مسكهم البلد وخلالهم يستولون على اقتصاده بهالشكل ؟؟
لاتقولون لي الحكومة .. الحكومة الله يعزها ماجابت احد على كفالتها .
ولا ردة راعي حاجه.
بس من هو اللي جابهم من غير حاجه وكبهم علينا تسذا ؟؟؟ علموني ..
ترا ضوايتي مولعه وعيت تطفي..
وانا ودي اتقضى بس مقدر لين اطفيها وهي ماتطفي وهي شايفتن خمال.
على علمي وحسب ماسمع بالرادو
ان الاسواق الشعبية في أي بلد يقصدها الزوار للاطلاع على
موروث البلد وثقافته وارثه الحضاري والثقافي .
وش عندنا من هالموروث ؟ الا وش بقى لنا منه عقب مانقلب لبنغالي ؟
الاجنبي يجي يتفرج على ارثنا الثقافي والا على البنغاليه ؟؟؟
اترك لكم الموضوع تناقشونه وتعلموني وش اللي حصل بالديره..
ومن تسبب علينا؟؟؟
وعجلو علي تراي وراي مقاضي ومشواري ماخلص وضوايتي مولعه .
ابوضواية
العرض الشجري
