يلي تقول ان كل مطرود ملحوق

يلي تقول ان كل مطرود ملحوق=ماني مصدق قولك اللي تقوله
كم واحدٍ راحت له حقوق وحقوق=ضاعة احقوقه والايدين مغلوله
امن اولٍ قالوا يبى الحق لحلوق=واليوم اقول الحق يبغى عموله
ضاعة احقوق ومثلها الطاق مطبوق=لو كان تحكمنا شريعه ودوله
لاصار منته تاجرٍ مع هل السوق=وكل الرصيد اصفار مابه سيوله
اليا صار بالبزنس مالك ملك صندوق=بعيونهم تصغر ابمعنى الرجوله
بالقايمه تراك ملحق ومرفوق=ابمقام صفرٍ بالشمال امعزوله
ولالك مكان ومنزله مع هل الذوق=اللي لهم بالمال صوله وجوله
نضراتهم يمك تقل منت مخلوق=ابليس غوّاهم وعنوا اخيوله
بوقتٍ تغير واختلف كل منطوق=وكلٍ على ماقيل يشعب ذلوله
يشعب ذلوله مار في رجله سبوق=يشعب ذلوله والذلول امعقوله
بالمال يكفخ مار ساسه له ايعوق=يكفخ يبي له شي ماهو ابحوله
المال شيّخ له اشيوخٍ ابلا عروق=بالمال شاخ وشلّته صفقوا له
هو مادرى ان المال فاني ومسحوق=وكلٍ على ماقيل يرجع لصوله
وبيتٍ بداء بنيه على هبوج وطبوق=ينهار ساسه ما يقاوم احموله
ولا أحدٍ طلع قمة جبل واعتلى فوق=إلاّ قبل يطلع يطالع نزوله
واستثني اللي من هل المال ماثوق=اللي سخر ماله وجهده وقوله
لوجه الكريم اللي ترجاه بوفوق=يبذل لوجه الله بنفسٍ خجوله
ونفّذ احقوق المال هذاك مرموق=كسب رضاء ربه وخلقه دعوله
واختامها ما كل مطرود ملحوق=ومن قال مهما قال ما اطيع قوله

الشاعر / مبارك بن ناصر بن حديد

الله لله درك اباناصـــر توي تذوق عذب الشعر كل بيت حكمه


نعم كلام قرار والله هذا حال الأمه هذه الايام راحوا عياله الحمايل


وبقي الأذناب شيوخ سجل أعجابي وتسلم ابايارا على أتحافنا

بهذه الدره النفيسه من شاعر يعرف يصوغ المعاني

ابم ناصر لاتحرمنا وبالأنتظار

روائع ودرر قالها ابو ناصر الحديد وصح مليون لسانة

وقام بنقلها منصور الوسوس مشكورا ومليون سلمت الايادي

وجزاكم الله الخير كلة

صح لسان الشاعر*مبارك بن حديد

وقصيدة تحمل عده معاني
"
وتسلم يمين ناقلها اخي منصور

صح السان الشاعر ابو ناصر على القصيدة التي
يظهر بها قوة الشعر وقوة المعنى التي يمتلكها ابو ناصر
كل الشكر لك منصور الوسوس(ابو يارا)
على الدره الثمينه التي اتيت بها من الشااعر
تقبل شكري ومتناني وتقديري لك إالى الأبد

نعم كل ماقله ابو ناصر من حكم ولو انه عارض المثل المعروف ( كل مطرود ملحوق)
لا كن شاعرنا ابن حديد اتى في البراهين
والبراهين حجة دامغه
هكذا يكون الحكيم في مقاله

شكرا شاعرنا بن حديد ،، وشكرا مراقبنا منصور

لله درك يابا ناصر هذا الشعر ولابلا

صح لسانك على هذه الحكم الرائعة

وانت شاعر جزل وشعر جزل

لك خالص الاحترام

ولا أحدٍ طلع قمة جبل واعتلى فـوق

إلاّ قبـل يطلـع يطـالـع نـزولـه

واستثني اللي من هل المال ماثـوق

اللي سخر مالـه وجهـده وقولـه

ونفّذ احقوق المال هـذاك مرمـوق

كسب رضاء ربـه وخلقـه دعولـه

الشعر نعمة / والقول حكمة
صح من قال / وسلم من نقل

صح لسان شاعرنا ابن حديد

ولا هي غريبه من ابوناصر قول الحكم

وتسلم يمينك يابوياراعلى النقل الرائع

اقدم شكري وتقديري لكل من ناقل القصيده ومن اثناء عليها
وثناكم اعتبره تاج ٍ على راسي ومجاملتكم اعتزبها
وشكرا ً للاخ ابو يارا وللجميع

اخوكم مبارك بن ناصر بن حديد