مجموعه من قصائد الشاعر الشاعر الكبير سهل الكسر

بسم الله الرحمن الرحيم

يطيب لي بأن انقل لكم ديوان احد فحول الشعر اللذين يتلذذ المتذوق
لقصائدهم النادره والرائعه ..





فهذا هو الشاعر / سهل بن نايف بن عقاب الكسر المرشدي العتيبي ..
اترككم مع قصائده الممتعه ..







(( هات الحطب ))






هات الدلال وولـع النـار ياجـداع عجـل عليـه ياعـد و الرخـامـه
هات الحطب ياجداع من جبـر وولاع جبره خشـب وولاع نـاره ثمامـه
وليا غـدا للنـار ياجـداع شـلاع وشفت الخشب منها تدانى صرامـه
احمس من الخولان ياطيـب النـاع لين النجاض يبـن منهـا وشامـه
ودقـه بشامـي ٍ يجيلـه تلـعـلأع يصح النيام ليا صحـا مـن منامـه
ثم هات لي صهب ٍ يداون الاوجـاع اللي من الصالـي عليهـا سحامـه
قفز الغوارب والمقاضـب والاكـواع وبطونهـا ياجـداع فيهـا هيـامـه
لا وقفـن ياصـاح فيهـن ترفـاع وفيهن على جبر الحديـده ضخامـه
صهب ٍ مثاعبهن مهاديـف ووسـاع وفيهن مثل حد السيـوف استقامـه
سميتهن ياجـداع والاسـم ماضـاع هيفـا وهيفيـه وشيمـه وشامـه
لاشافهـا اللـي لالبغاديـد مـولاع شوش شعر راسه وطـش العمامـه
ولقـم وبهـر وانتبـه للتـسـراع واحذر يجي بك يالبناخـي غشامـه
خل المبهر تهتـوش فيـه الانـواع لبين الشقـاره والحمـر والدهامـه
اضن هاجـوس القصايـد ليـا راع يقـرب ليـا فـك المهيـل بلامـه
ويحضر عيون الشعر موجدت الابداع معانـي ٍ فيهـا طـراه وجسـامـه
تذكر الفايـت وتصحيـح الاوضـاع حـب البـداوه والبـداوه شهـامـه
يامحـلا ياقيـل لسهيـل مـطـلاع شافـوه تـال اليـل يلمـع زمامـه
من نجد يزمي فوق نجـران لمـاع شافوه اهـل تثليـث واهـل تهامـه
وجى للهبوب من ايمن الشرق ذع ذاعوالعد عقب سهيـل راعـت جمامـه
وفزر هجير القيض واضفى له قناع على السلم والسمر مثـل العمامـه
والبل تلافت للجمـل وابـرد القـاع وقامو هل البـل ينزلـون العدامـه
والنار شفت الها مع الفجر شعشـاع وقامو يحزمون الحطب في حزامـه
من عقبها خمسين ليل ٍ لهـا اتبـاع ليا بكـر الوسمـي ودلـى غمامـه
وجاله على ساقان من غرب ميقاع ويجنب ولا يملـك عريـق الثمامـه
ويشمل ليا القرعا وبير بـن هـزاع على رجـم بـذال يرخـي خطامـه
وليا نهمل ودقه ومزنه ضفى ومـاع على قراء الصمان يبخـص سنامـه
لين النبات اللي يجـي لـه تنـواع يفراء الحزوم ليـا تملـت محامـه
وضاقت مع المشقر زهازيم الاقطاع لاجاك راعـي نجـد يدفـع جهامـه
بدو ٍ تبي المرباع ثـم جتـك نجـاع وكل ٍ عصب في سلت السقس خامه
قامت عطايا الله تضيق بهـا الارواع شول ٍ يازين مـع الحمـاد ادحامـه
اول معاشيهـم مشابيـع وجـيـاع وراحو على ماقيـل شـده وقامـه
وشفت العسوس جيوبهم تقرع اقراع اللي مدح واللي قصر فـي كلامـه
مالو علـى دار ٍ للبـواش مرتـاع فيها يجـي لهـل الحـلال التمامـه
كل ٍ معه وايت وصنـدوق وشـراع ونـار ٍ رمادتهـا سـوات الردامـه
وذبايح ٍ تشراء مـن البـدو وتبـاع وكـل ٍ تجهـد ماتـرداء مقـامـه
خذولهم قامـات ثـم قيـل لالـراع عن ضهر الركبي يحـذف المسامـه
قرو ليـا قامـت تمريـع تمريـاع سـوا لهـم راع الكرامـه كرامـه
ثلاثت اشهـر كلهـا وقـت مربـاع وقامه إلين العشب يقـرب صرامـه
ولاقيل صيفي ٍ علـى نجـد تنـداع كل ٍ صفط عفشـه وقشـع خيامـه
تمزعـو مـن كـل جـو ٍ تمـزاع بطرافهـم يكفـى المـدور يـدامـه
و راع الغنم مع دربهم شد ثم ضـاع ايطوي الشبوك وقام يجمع رمامـه
ماعـاد يلحـق لاذراع ٍ ولا كـراع الشـاوي اللـي در شاتـه طعامـه
ألي خذتلي مع مقدم البـدو مـذواع فنا ماعاد الحقـت نفسـي ملامـه
هاذي طرات العمر والوقـت خـداع وغارات بقعاء ماش منهـا سلامـه
وصلو عدد ماغرد الـورق سجـاع على النبي وازكى الصـلاة الختامـه





(( يافهيد شب النار ))






يافهيد شب النار مع باحـة الشـوف ترى حلات الكيف مع فكـة الريـق
عان الحطب في ثنوة الدعب مجعوف والما من القلتـه قـراح المذاويـق
أخذ الكريك وحـط للنـار مجـروف نـار عليهـا يجلسـون المطاليـق
خل الخشب في ترعة النار مصفـوف وادفق عليه القاز من فـوق تدفيـق
ولا جا لشعلتها تواشـي وعاصـوف حط البريـق وفـرق النـار تفريـق
ومن ماركة بغداد قم هات لي نـوف عفراً تنافـس بالبيـاض الغرانيـق
عفراً طويلة جيد والوسـط ملهـوف مكبوسة الغطوه على حلقها الضيـق
طويلة العرقوب والخشـم معكـوف جبـرة حديـده والجوانـب لواهيـق
من البكار العفر تاخذ لهـا وصـوف وتاخذ وصوف ملهفـات السماحيـق
تاخذ لهـا منهـن مثنـاه وكتـوف لوكان محرقها سنـا النـار تحريـق
والثانيه رسلان والشكـل معـروف والثالثـه رسـلان والرابـع بريـق
واحمس لنا بـنٍ شرينـاه بجـزوف جابـه يمانـيِ عيونـه بلاحـيـق
من شجرته من يم خولان مقطـوف من وارد الخـولان مافيـه تبريـق
خابرك انا يا فهيد فالشغل شاحـوف وموفق في حمسـة البـن توفيـق
لا تنطل المحماس يا فهيد فالجـوف اخاف يلحقهـا سنـا النـار بلحيـق
للنار جوف وجال وجنوب وطـروف وللحمس يفهق صالي الجمر تفهيـق
حفها على سمرِ شديد اللهب حـوف حتى تعرق من سنـا النـار تعريـق
ولا اندار لون الحب ثم صار مشيوف جاءللنجاض ابها صفـار وتراميـق
قم صبهـا بمبـردٍ عـود وسعـوف مقمـرٍ عـوده يجـي لـه تباريـق
ثم هات لي نجر كما الطير مكتـوف وقفـة نـداويٍ يـتـل المسابـيـق
اطول من الرسلان يوم انها وقـوف ليا ناشها المهوى يجي له تصاعيـق
ولقم وبهر واودع الهيـل مدغـوف ومن العويـدي ذوق الهيـل تذويـق
حتى يجي الفنجال لا صـار محيـوف دم الغـزال اللـي يجـي فالمعاليـق
والا الخضاب اللي على كف غطروف نجلاً تخـازر بالعيـون العشاشيـق
يجمدعلى الشـارب لياصارمشفـوف وصف الخوير إن صارفالوصف تدقيق
بريةٍ تبعـد صلـف كـل مصلـوف تجلا العمس ماهيب شاهي سواويـق
ليا ذرف منهـا علـى الكبـد ذاروف يبي يهـود شـارد الفكـر ويريـق
هات الشداد وعطني الجاعد الصـوف فراش اهل هجـنٍ تبـوج الرقاريـق
تراي انـا والهـم لايـف ومليـوف وهجسي من البارح يجي له تخافيـق
وليا عزف هجس الغنا كل معـزوف تنفـك بيبـان القصيـد المغالـيـق
جني بنات الفكـر زافـات وصفـوف وقمت اتخير فـي قـراح الطواريـق
للشعر مثل الصيد قطعان وخشـوف الصيـد طعمـه والنـوادر توافيـق
نبا نخلي عاصـي البيـت معسـوف ثم راحت القيفـان عقبـه مواسيـق
وليا اعتدل هجسٍ له ايـام معكـوف يمـة طريـق معلقـات العشاريـق
ياصاح انا قلبي من الـود مشعـوف حب البنـات ملصـقٍ فيـه تلصيـق
شاعيه مجمولٍ ولي فيـه معـروف وموثقٍ لي معـه بعـض المواثيـق
غيدا النوابي عمرهـا متـن وردوف زملوق غصنٍٍ من طـوال الزماليـق
ليا بينت خـدٍ كمـا بـارق قنـوف رخم السحاب اللي خشومه مدانيـق
وعينٍ هدبها لا شبح كنـه سيـوف عين اشقر مربـاه روس الشواهيـق
تنسف فليل غاطن ٍالمتـن منسـوف على مثل غرمول عـرق الصعافيـق
مرودمٍ بالحـال ماهيـب حرجـوف ولا شافها راع الهوا جالـه شهيـق
ملهوفة السرجوف والجسم غظروف والمفرع اللي فيه للشمس تشريـق
صدرٍ تقول من ابيض القطن منـدوف طلـع النهـود مفتـقٍ فيـه تفتيـق
ياما عليك الاحي الـورق واسـوف ورق على دوحٍ غصونـه مواريـق
أمـر بيتـك واتـعـداك واطــوف وانا على شوفك شفـوق المشافيـق
ادرا علـى سمعتـك واذل واخـوف من اهل الهروج مكثريـن النقانيـق
كم واحدٍ لوكـان ماهـوب مكلـوف يطقهـا لـو جنبـت عنـه بلحيـق
ترى التعب في راحة النفس مخلـوف شوف العيون يزود النفـس تشويـق
هذا ويا من له نحـا البـال ملفـوف شوفك يسليني عن الهـم والضيـق
ليتك تصافحنـي بذرعـان وكفـوف والا علـي تدنـق الوجـه تدنـيـق




(( الله من قلبِ ))





الله مـن قلـبٍ تـجـدد غـرامـه شيً جديد وشي قد فـات ممـروس
لاجيت أبـي درب النجـا والسلامـه عن ساهيات الطرف عودت منكوس
هيـمٍ عـلـي يـقـومٍ القيـامـه ومحالفٍ بالـي تفاكيـر وهجـوس
والحال عـود مثـل عـود الثمامـه عايـن شرايينـه لواليـح ويبـوس
لاشفت لي نجـلاً عليهـا العلامـه وعيونها ملياً من السحـر وتهـوس
واليا مشت تدرج سـوات الحمامـه وأقدامها ماهيـب لقـفٍ ولا حـوس
هيمـاً عطاهـا الله زيـن وفخامـه وحسن طوارفها عن المتن والـدوس
الزيـن تأخـذ فالمحاضـر وسامـه لافرعن الشعو في عيـد وعـروس
غظن من الخفـرات مربـوع قامـه وكثر جماله ياهل الصنف مدسـوس
معـزلٍ جسمـه وعـدلاً قـوامـه الصدر والأرداف والبطـن ملحـوس
وعاتق وجيـد ولفتتـن وابتسامـه وشفايفاً منها العسل تـو معـروس
والخد الأيمـن فيـه للخـال شامـه ومن ضيق فمها كن ماجالها ضروس
وأليا هرج يسبى ضميـري كلامـه من كلمته كني على الكبد ملمـوس
يأخو فهيد المـوت شـرع خيامـه قـام يتهددنـي بخنجـر ودبــوس
وين أنت عني يا حريـب الرخامـه ترى العلوم ألها جواسيس وعسوس
أشكي عليك الحال عقـب أنحطامـ هيوم أنت فالوقفات كسـاب نامـوس
خابرك أنا منتـه براعـي غشامـه رجلاً فهيم وعندك الفهـم مـدروس
والنبت تعرف طلعته مـن صرامـه وترد العدود الهوج ماتارد رسـوس
ويوم أنت من ربعن تقـود الجهامـه غلباً عوايدهـا تـدوس العـدا دوس
خـلاً ذبحنـي ماتحلـل عظـامـه مركن على كبدي من العام بالمـوس
مع ضف بـدوٍ بيـن شـده وقامـه بغيت أروس العلم والعلـم مريـوس
لقيتهـم فـي ديـرةٍ يــم رامــه في خبتٍ فيهـا غراميـل وطعـوس
وغرزبي الموتـر بـراس العدامـه متعلـقً صـدره كفراتـه تـلـوس
وحولت رجلي ثم ضربـة المهامـه حل الصفاري يوم هب الهوا كـوس
مافوقـي ألا مجنـدي والعمـامـه مع جرهدٍ ماهو من الناس مانـوس
وسريت مع وسط الدماس وضلامـه مافيه غار الريم ماتسمـع حسـوس
أبى الشداد وطحـت دون المسامـه حاستني الدنيا عن اللي نبي حـوس
وأذن منـهـا ماعلـيـه مـلامـه مادام دربي صح ماهـوب مدنـوس
وترى حـلاة البـر عجـلاً ولامـه عجل مراديدك ترى الحبل ممسـوس
وشعرك جزيل وفي بيوتـك جسامـه وتجـاري الشعـار منتـه بدنفـوس
لزرى عن المردود خطـو الهلامـه يقعـد يفتـش فالمراديـد ويحـوس
وأليـا لقالـه بيـت حلـل حرامـه ماكنـه ألا يأخـذ الشعـر بفلـوس
تـم الكـلام وفـي مطافـة ختامـه تسلم عدد ماخلق من جسم ونفـوس




(( ليا زوعت برقا واحالت تباري روق ))





لعل السحـاب اللـي يخيـل وفيـه بـروق على اول دخول الوسم مع طيحـة الامطـار
تساقا ثعولـه مـن سميـره ليـا ساحـوق على الديـره اللـي تنبـت الربـل والنـوار
تباشر بـه البـدوان معهـم يزيـد الشـوق مشوا واشملوا من عقب ما انووا علىالمحدار
ليا جاهـم العسـاس والعلـم جـا ماثـوق ولقـا شبعـة البـل فالخزامـى وفالصفـار
ليـا زوعـت برقـا واحالـت تبـاري روق تخالـط دبشهـم فالمضحـى وفالمحـضـار
منازيلهـم دايـم دكـاك ودمـاث عــروق ويشبـون للبـل لا ضـوت فالمـراح النـار
نباهـا تـزوع يـا محمـد مـع المشقـوق تحـط الينوفـي والعبـل والجذيـب يـسـار
مجاهيم شول يـوم تزمـي مـع اللاهـوق كما الغيم الاسود يـوم يزمـي مـع النهـار
سوادت وبرها كـن فيـه الكحـل مسحـوق هي البل ليـا قامـت تبـادح تقـول احـرار
عددها يجـي تسعيـن ملحـا ومنهـا فـوق فطاير وسدس وربـع واثنـا ومعهـا بكـار
تخازر تبا الراعي ليـا سـاق لـه مسيـوق طوال الغـوارب واللحـي والـردوف قصـار
مذاريـب اذانيهـا كمـا الخنجـر المذلـوق وساع المناكـب والنحـر والظهـور كبـار
مواريث اهلنـا مـا شرانـا جلايـب سـوق لـو ان البـداوه عـودت فـي يـد التجـار
بنات الجمل حرشان هـرشٍ بعيـد عمـوق كبير الخفـاف وطـول جنبـه ثـلاث امتـار
سنامه عـن الغـارب ورا فاهـقٍ مفهـوق طويـل السنـام ليـا زمـا يجحـد الفقـار
عريـض بخـده رخـوم ووسيـع شـدوق جليل العضـود وشطـحٍ مـا تنـوش الـزار
انا مولـع ٍ فالبـل واوصـف وراعـي ذوق ولـي نظـرةٍ والنـاس تخالـف الانـظـار
ترى البـل تسلـي واحـدٍ خاطـره مخنـوق اناسـه ورفـع حجـاج وتهيـض الشعـار
تخض العشوب وتقطـف الربـل والزملـوق ثلاثيـن ليـل يبيـن الــزود فالمشـكـار





(( ياملّ قلبٍ ))






يامـل قلـب ٍ يتلـه ود سلطـانـه تلـت قضيـبً يتلـنـه مسابيـقـه
يا ناعس الطرف كبدي منك مرضانه والنفس سواء بها جور الهواء ضيقه
العي مع الورق واغرهد مع اللحانه واقنب مع الذيب وابدي في شواهيقه
راعي عيون ٍ بخمر الحب سكرانـه ومبيسـم ٍ مانشـوف الا تراميقـه
اما تقـول البـرد معطيـه غزلانـه ولا تقول العسل مجناه مـن ريقـه
خل ٍ رموشه تعـدا فـوق حجانـه تضفي على مفرع ٍ تجهـر تباريقـه
عن مدمج الساق يثني الردف فستانه لولا الشعر يوم تستهرهـا تواليقـه
غيد ٍ لراع الهـواء يافهيـد فتانـه ونا كثيـر الهـوا يافهيـد ماطيقـه





(( عديت لولاحٍ ))






عديـت لـولاح ٍ طويـل ٍ مهـايـف للحر الاشقر فـي علاويـه مسكـان
وللريح في شامـخ ركونـه هفايـف لاسقاه مـن وبـل الشخاتيـر ودان
لانـه شعـف قلبـي وزاده شعايـف وذكر علي صويحبـي ناعـم البـان
لاعـاد مبـدا ً بالرجـوم النـوايـف من واق راس الرجم جا منه ندمـان
وحولت للموتـر واخـذت الكلايـف نويـت للمطـراش مانـي بكسـلان
مالي لزوم ولا ذكـر لـي وظايـف الا دواليـب الحشـا شـب نـيـران
طرى عشيـر ٍحـط قلبـي نصايـف وبيني وبينه يقنـب الذيـب سرحـان
ماني من المطـراش والبعـد خايـف باجيه لـو دونـه قرايـا وشعبـان
اركـب الدربـيـل روس الحتـايـف واهزع وانشد كـل ماشفـت بـدوان
بـدو ٍ يعنـون القلـوب الـولايـف شهرين باوطان ٍ وشهريـن باوطـان
يمشون في شف البكـار السهايـف ليا لاح وسمي ٍعلـى جـو ساقـان
ومصيافهـم لازاف نبـت المصايـف بيمن حجول وبيـن خثـل وحيـزان
معهم غنـوج ٍ للعشاشيـق عايـف وانا تسلهم لـي بخـدرات الاعيـان
سـود ٍ هدبهـن للمحاجـر لحايـف من ناوشنه بالهوى طـاح مرضـان
عين القضيب اللـي دعـي للعلايـف جاي ٍبه الطاروح مـن يـم حـوران
عـدل المناكـب والمواكـر كلايـف جبر الثنادي واسود الريـش عريـان
وان بلجـت لـي الثمـان الرهايـف عفر ٍتحـط عـروق كبـدي هذيـان
يذبل عسلها بيـن حمـر الشفايـف تقـول واشعـا مـن اللـون دمـان
هيما ًشنـاح الطـول نبيـا ردايـف والعنق نابـي فـوق والعـود ريـان
والصدر بـارز والخواصـر نحايـف وعفر ٍمثل لـون الدراريـج سيقـان
ونهود حمـر ٍفـي حشاهـا وقايـف مابيـن تفـاح ٍومابـيـن رمــان
لـولا الجدايـل دونهنـه سـدايـف شفت القمر في مفرع الصدر لابـان
جدايـل ٍ تلفـح سـواة السفـايـف يلحق سبلهـا روس الاقـدام لحقـان
غيد ٍمـن الغـزلان فيهـا وصايـف ركـزت معنـق والتفاتـه وحجـان
تلحنـي لـحـة قطـيـع ٍسنـايـف جاي ٍبها من ديـرة القـوم عتبـان
لو بان لي منهـا الجفـا والجفايـف صديت عنه ورحـت ميـس وقنعـان
خل ٍطواني طـي بيـض الصحايـف واومابي اوماي الهبايـب للاغصـان
وعيني عبرهـا كـل يـوم ٍذرايـف دموع ناظرها كمـا وبـل الامـزان
والقلـب عـن كـل الاوادم مسايـف ويلاحـي الورقـا بجـرات الالحـان
لولا الضلـوع الـي تضبـه كتايـف يبا يجي لـه مـن سبايبـك جنحـان
يازيـن خلـك بالمضانيـن رايــف واعطف على صاحبك ما انته بخسران
خلـك تعوضـه بالجفـا بالخلايـف والسـر لاتبديـه والامـر كتـمـان
اكمـل جميلـك بالعلـوم الطرايـف وماتفعله محسـوب مافيـه نسيـان
لاتستمع باهـل الهـروج الخرايـف اللي مصادرهـا مناجيـب شيطـان
نـاس ٍتحـط الهـا وقيـده وحايـف وتولع النيران مـن بيـن الاخـوان
حتـى المقفـي يلحقونـه قـذايـف لو كان مالـه فيـه مدخـل وبيبـان





(( لا واهنيّ اللي عن الود ماسيل ))






لا والله الاّ صاحبـي شـد ومحيـل اتلا العهد به في ضحى العيد ماشي
تشاوروا ثـم صملـوا بالمحاويـل وضفوا دبشهم مابقى منـه حاشـي
اقفت بهم شيب الغـوارب زعاجيـل وقاموا عليهـا يبعـدون المعاشـي
تسابق الخلفـات والـدق والحيـل واللا المتالـي سربـت بالمماشـي
من يوم قالوا صدّق الوسم ياسهيـل والله كريـم ورد لاهـل المواشـي
عان الخيال اللي مزونـه مطافيـل مثل الهضـاب مصنبـر ٍبالمناشـي
مدلهـم ٍنـوه يجـي لـه هماليـل برقه مع الظلمه يجي لـه تواشـي
نو ٍعلى نـو ٍوسيـل ٍعلـى سيـل سيله يطـم المرتفـع والحشاشـي
جات الفعوم اللي تشيل الوطا شيـل خلت حشاط القاع مثـل الهشاشـي
مير احسب ان ياسهيل مافيه تاجيل خابرك انا ياسهيل مانتـه بلاشـي
شجيع راس وفي القسا مانت ببخيل وتصمل ليا بار الرفيـق الجغاشـي
شريت لي من صنع الالمان دربيـل وحذفت في وسق الونيت الفراشـي
جهزت عفشـي ماعليّـه مداخيـل مـن كـل الـسـلاح الكـلاشـي
وانته عليك تجيب صفـر المعاميـل صفر ٍحدايدهـا تراعـش رعاشـي
هات الدلال وعطني البـن والهيـل والخير ياسـر والذبايـح بلاشـي
احسب حسابك للسفـر والمراحيـل تبينـت ماعـاد فيهـا قشـاشـي
نبي لنـا لديـار الاحبـاب توصيـل اظن من عقـب الفـراق انتعاشـي
خلي بعيـد ولا يوصّـل لـه التيـل اللي غـلاه مخيـم ٍوسـط جاشـي
نلقاه بيـن المستـوي والغراميـل في صفح نزوىً قد غسلها الرشاشي
خل ٍمسـوّن بـي غـلاه البهاذيـل وشربت لي من خمر حبه غراشـي
اقضي سبات الليل وانا على الحيـل واجحد واجاحـد واتعـذر واخاشـي
ياما عليه اجـر عـزف المواويـل وللي نصحني ما استطيع النقاشـي
عليك يـاراع الوسـاع المضاليـل اللي هدبها فوق الاوجـان غاشـي
هـدب ٍبهـا لمتيـم الـود تتويـل اليـا اشتبـك حجانهـا بالرماشـي
وخدود عفر ٍمثـل لـون القناديـل للبدر في لونـه خشيـر ومعاشـي
وغـر ٍلواهيـق ٍعـذاب ٍذوابـيـل ليته عطاني من عسلهـا نواشـي
راعي جديل ٍفـوق متنـه ثعاكيـل شعل ٍسبلها فوق ردفـه طشاشـي
كنه شليل اللي تكف اسبـق الخيـل لا صاح صيـاح ٍنهـار الهواشـي
مفصل ٍجسمه على الذوق تفصيـل لا هو جـلال ولا نحيـل ٍنشاشـي
يلحنـي لـح الجمـوس المحاميـل باقبال ليـل وعرضوهـا هلاشـي
وان كان ياغض النهد مثل ماقيـل راس الظبي محد ٍ لقابـه عراشـي
قفلت بيبان الهـوى معـك تقفيـل وقصرت رجلي عن طريق ٍعكاشـي
لا واهني اللي عـن الـود ماسيـل ولا عذب ٍقلبـه مـلاح البهاشـي
نجل العيون مخـازرات الرجاجيـل لا جاهن الميلاف صابـه خراشـي





جصرياً للهــــــــيلا *** منتدى قبيلة عتيبة ..

قصيده مختارة في وصف الــــ gmc جــمــس .. للشاعر العلم / سهل بن نايف المرشدي العتيبي






راكب اللي يوم يزجر وصوته له عويل
صوت ندراً خيلت بالمطر بأول نهار
لا اونس البنزين بالمشي سوّى المستحيل
وصلو شكمانه من النار يقدح له شرار
من وكالة جمس شد الجميح آخر موديل
ابيضٍ لونه كما لون غرنوق البحار
كن وجهه لا نطحته مثل وجه الاصيل
الحصان الاصفر اللي نجب روس المهار
وان قفيته تذكر الله وتذكر بتهليل
وان سنحته يلفت العين شواق النظار
كن لمباته على تندته تشعي شعيل
يوم ولع نورها من صفار ليا حمار
داخليه كله ادهم وطبلونه جميل
وترس قيره بالتماتيك وابوابه زرار
والمراتب فوقها جاعدٍ شكله قليل
وفوق راس القير برقع صواريم الحرار
والمكينه زيتها ما يغيّر بالموبيل
والاديتر خمس رصات ما جاء ماه حار
مايرهم فيه ترهيم من شد الوكيل
نيكل الصندوق مبروم واعصيّه كبار
ولا وقف عند الورش من عميل في عميل
ولا ركب فوقه سرابيت ولا عريب دار
مركب الربع النشاما منزحة القبيل
الرجال اللي تعز الرجال اهل الوقار
منوة اللي حده البعد عن شوف الخليل
منتولّه ديرتن دونها يزمي ديار
لا مزعته وانت عجلان والمسرا طويل
ينتهض مثل النداوي ليا انوى بالطيار
واليا عطاله حزمٍ اجرد يميل ويستميل
مشي غيدا ضايمن ساقها تقل الفقار
تلتفت يم العشاشيق وتقض الجديل
ولا تعشق من الرياجيل الا كود الخيار
المصفّح يبرد الكبد ويزيل الغليل
لا عطاله مع حزومٍ مسايلها قرار
وان عطاله من شعيب على قشعه نثيل
كن مشيه لا عطى الدعب مشيه فوق قار
وان نتلته من وقوفه يشيل الصم شيل
مضرب المخباط لا ثار والديره عفار
وان عطاله مع نفودٍ خببها ما تسيل
ما يجنب عن صعافيق مزموم الزبار
من صناعة قوم ريقٍ هل العقل المهيل
كيفهم بالبير هم الولد ولا السكار
من يحط الجيب للجمس فالدنيا زميل
مار قالوا جكس ولا شاص ولا فكسار
الجويب مويترن زين وفالرمله حليل
مار عنه الجمس مثل الحصان عن الحمار






(( النياق السود ))





عسى الله يوفقني فحل للنياق السود يجيني ابه الجلاب من ديرة المره
على شان سودن في وبرها سوادن زود تجي واحدتهن يوم تزمي كما الحره
ابيلي فحل للذود حتى يعمر الذود على شان يطلع من ورى البوش بالمره
مثل ماحصل للعود فايام وقت العود عنا للسديري من طمع فيه ماغره
وشرى منه (شيوبان) جابه وهو قعود يحسبون سنه هرش لان الصبي فره
كبير الاباهر مارق الجنب جبر عضود تطاول رقبته كنها الونش منجره
غضاريف خشمه رثم وافنس عريض خدود وله جرتن بالزمل ماكبرها جره
سواده سواد الكحل مع لابس الماهود غنوجن تحط الكحل بالعين وتذره
وانا اليوم ابا من ساس (شيوب) لو مفرود وابا البل تعود عقب مابطيت بالحره
على درب عودن قد سبقني بدرب الجود وانا احب دربه مير الايام مفتره
ابمشي بها وقت المحادير والسنود واخلي ضعوفن بالقري جالها صره
ولو المرجله بمداحم الجنب والمجهود ابه ناس منها ماتحصل سوى الذره
نفعها زمان حط له للرجال قيود وغدت بالبحر ثم عينت بالبحر دره
وعسى الله يعز الامن مع راية ابن سعود هو اللي حكم بحر الجزيره على بره
وابا العفو من رب الملا ربنا المعبود عساه يعاوني بساعة مالنا فره



م/ن مع احمل تحيه عطره للمنتدانا العاااااااااااااااااااااا اااااااااااااااااااامر وأعضاءه الكرام 00