عبدالله ابن دويرج رحمه الله00

عفا الله عن عين جداهـا ونينهـا
ياوي لها من كان يوحـي حنينهـا
على طفلة عمهوجة غضـة الصبـا
تسبي قلوب اهل المـوده ابزينهـا
تباهى بمجدول على الـردف كنـه
ثليـل شقـرا باللقـا مسرجينـهـا
والعنق منها عنـق قـوادة المهـا
بانـت علـى تفّـاقـة ذايرينـهـا
ذرعان بالكفين هـي غايـة المنـا
مع حسنهـا بخضابهـا ناقشينهـا
انا ما ذبحني لين شفته وبـان لـي
كما اللولو المنظوم بيـن اشفتينهـا
وخد كما المصقول في كـف نـادر
حامي بهـا ورد علـى وجنتينهـا
ومحاجـر ذبـحٍ لطلابـة الهـوى
لكن ذحاح الموت في حجـر عينهـا
زهى الصدر منها كالرماميـن تـرّز
حمر ثمرهـن مـا لهجـن جنينهـا
والبطن لا ديباج لا المرعـز الـذي
كمـا دارة الدهـدار لونـه ولينهـا
وردف يعوقه عن مسيره الى مشت
.............( )............
وحدر الردوف احزوف تزهاه ما حلا
ساقيـن صافيـة البهـا واقدمينهـا
فلاشـك واعـزاه ماهيـب ضنتـي
خيـره لغيـره وابتلتنـي بحينهـا
زهت بالشباب وغاية الحسن والبها
وهي له ثلاث وعشر عدة سنينهـا
ابت لا تمنينـي ولا تقطـع الرجـا
ولا تنفع الشكـوى لمـن يزينهـا
وهي سمحة الاطراف ملهوفة الحشا
الا واهنيـك بالطـرب يـا خدينهـا
كما دوحة البان الذي هـزّه الهـوا
الى هب ذعذاع تمايـل اغصينهـا
حشا الله ما فيها من العيـب ذارب
حذا في ليال اشباط لـذة حضينهـا
ولا ظن له عندي حتين مـن المـلا
حذا موق عيني ربما انـه حتينهـا
تهاوي هواه النفس وهو على النقا
فلاشك اعذل النفس عنها واهينهـا
ماهـوب لا بغـض ولا محقـريـه
فلاكن اخاف النفس تبـدي كنينهـا
الى انتحت نفس آدمي على الهـوى
فهي ربما يصبح ضعيـف يقينهـا
فلاكن على المخلوق يسـال خالقـه
يعينه على نفسه ويخـزي لعينهـا
تزريت من قـول القلـوب شواهـد
وانا اظن هذي هرجـة ناسخينهـا
يود هبيـل القلـب مـن لا يـوده
على عصر بن بدران يا جاهلينهـا
ومني ومن يوحي صلاة على النبي
ماحي ظلام الشرك بانـوار دينهـا
والآل والاصحاب ما قلـت مبتـدي
عفى الله عن نفس جداهـا ونينهـا





...( ) ... النقص من المصدر ديوان ابن دويرج