بيني وبينه غايتي حد وحدود

بيني وبينـه غايتـي حـد وحـدود
وعزاه مـن حـدٍ تعـدى الحـدودي

احبهـا والحـب مـا فيـه منـقـود
واشـوف حبـه كـل يـوم يـزودي

يقودني سلـك الهـوى يمهـا قـود
وثقنـي حبـه فـي قـوي القيـودي

راحت وهي ما نيته هجـر وصـدود
لكن ظـروف ونيتـه لـي تعـودي

وأمسيت من فرقاه والقلـب ملهـود
وابكـي عليهـا والمدامـع تجـودي

قلبي عليها من الوله صـار مقـدود
والعين مـا تقبـل لذيـذ الرقـودي

حبيتها حب ٍ عـن النـاس مجحـود
وبينـي وبينـه خافيـات السـدودي

لو صرت عن حب اريش العين منشود
اخفيت حبه عـن خطـاة النشـودي

ابدي على المرقـاب لا هبـت النـود
لو كـان مـا بـه للمشقيـن فـودي

لكن اهيض به مـن القيـل مـردود
معانـي ٍ جمـه غزيـر الـعـدودي

يـوم ان مثلـي بالتماثيـل معـدود
ارجـي عساهـن يـبـردن اللهودي

وارجي لعل الحظ في وصلـه يجـود
ياحيث ما هي فـي كثيـر الجهـودي

لكن حظوظ وبالوصل صرت موعـود
وانا على وعـده حفظـت العهـودي

كريم يا برق ٍ تـلا ضوحـه ارعـود
خلانـي اذكـر مبسمـه والخـدودي

ريمية ٍ مثله علـى الزيـن محسـود
الله يجنبهـا عـيـون الحـسـودي

سنه صغير وبـه علـى غيرهـا زود
في ناظري مالـه حلـي بالوجـودي

مـا سنـدت بذراعهـا لأي ممهـود
ولا قربتـه مـن النحـر والنهـودي

تسبي صويب الحب بعيونهـا السـود
وغميزتيـن اخدودهـا والجـيـودي

وجوابه احلا من لبـن نقـوة الـذود
اللي رعت بيـن الحـزم والنفـودي

بارض ٍ خضاره باول الوسم ممـدود
ومن النوايـع تلتقـط كـل عـودي

وصبري على فرقاه بالحيـل محـدود
وعزاه من صبـر ٍتعـدى الحـدودي

إحدى قصائد الشاعر : سليمان المطرودي (ابو عبد الله)

مشكور اخوي على الكلمات الرائعه

صح لسانك
مشكور على النقل الجميل