الشعر شعري ماخذيته بالاسلاف ...

أولا اشكر كلا من الاخ : منصور الوسوس

والاخ : مرسى السفينه

على نقلهم لبعض قصائدي لكم هنا

ويعلم الله لي الفخر والشرف أنهم نقلوها لمنتدى ربعي وجماعتي

وحبيت اشاركم بهالقصيدة المتواضعه عساها ان تنال إعجابكم

أخوكم

محمد بن عقيل الفريدي

الشعر بحر وجيت للبحر غراف = ماني محمد كان ماجبت صافي
من دنيتي ما طاف ياصاحبي طاف = نذر ٍلا أجيب الجزل من نظم قافي
ماضرني من قال من شعرنا عاف = والله لا اورده الدروب العجافي
ماجيت أبكتب لأجل زينات الأوصاف = جيتك وجيش الشعر يمشي خلافي
شاعر وأعرف الشعر سيف ٍ وسياف = وأنا مسكت السيف بأول مطافي
قطعت رأس اللي كسر داخل القاف = وبارزت من وزنه نزيه ٍ وشافي
كسبت ناس ٍ عرفها فوق الأكتاف = أفخر بها مفخار وافي لوافي
مقدام شعري ما ضرينا للأنكاف = امواصل المشوار ما قلت كافي
الشعر شعري ما خذيته بالأسلاف = إزهم جزيل الشعر ويجيك لافي
احسب جزيل الشعر في كل ميقاف = ما جيب شعر ٍ بالمواقيف هافي
واحسب حساب اللي لهم نور منشاف = ربعي هل الطولات نور ٍ يشافي
أفخر بهم واثق ولاني بخواف = ما دام ربعي عزها دوم ضافي
ولا أحتاج في ربعي سواليف عراف = نور ظهر للكون ما هو بخافي
وبعد القصيدة ماعلى قلبي خلاف = ولاني بمن يمشي على الشوك حافي

بيض الله وجهك يامحمد على الدرر ونا شهد انك شاعر متمكن
وقوي الى درجه عاليه وألمس من الابيات قوة المعنه
ولاكن عندي لك طلب نبغى قصايد أخرى فقديمك جديد عندنا

ونحن نفخر بوجودك معنا في مجالس الفرده

واهنئك على الذائقة الشعرية

لك مودتي

صح لسانك وعلاء شانك

يابو مها شاعر مميز

وقصيدة جزلة تستحق

الثناء

وإلى الأمام يابو مها

وفالك التوفيق والصحة

والعافية

ولا تبخل علينا من جديدك

لكي يزود عندي رصيدك




تقبل تحياتي \ أخوك أبو سامر

بيض الله وجهك على هذه القصيدة

وصح لسانك ياشاعرنا المبدع محمد عقيل

اعجبتني قصيدتك وياليت ان لاتبخل علينا من روائعك

وتقبل تحياتي

الشاعر محمد بن عقيل الفريدي

صح لسانك


والله انا سعداء بتواجدك في مجالس العز والشموخ

وبيض الله وجهك على هذه الجزاله

اشاركهم الراي ياحبذا من قصائدك القديمه

كما قال اخي ابن مطيع فقديمك جديد عندنا

اشكرك على هذه القصيده الرائعه

كما ارحب بك بمنتدى ربعك وجماعتك فاهلا وسهلا

اخوك / ابو عبدالرحمن

الشاعر محمد عقيل الفريدي
افتخر بوجودك هنا في صرح الفردة العامر

مجالس العز والشموخ ترفع لك الراية

خفاقة تفاخر وتفتخر بوجودك بين اعضائها

كنت اتوقع ان لك ابداع لم نشاهد منه الا القليل ولكن عذري

انني نقلت هنا ما وجدت والجود من الموجود اما الان وقد شرفتنا

بهذه المقطوعة الادبية فلا اجد لك عذرا عن مواصلة الابداع والتالق

فاصدح لنا بمثل تلك الابيات وشارك نجوم شعراء الفردة شاركهم

التوهج في مجالسهم التي تسعد بوجودهم وبوجودك معهم

تقبل باقات من الورد والكادي لشخصك الكريم وياهلا ومرحبا

صح لسانك ,,,

	صح السانك شاعر جزل ونفخر في وجودك بيننا وهذا منتدى ربعك وننتظر جديدك وياهلابك