يا مبارك قصة الربع القديمه " للشاعر شريف "

13-12-09, 02:15 PM

هذه القصيده للشاعر الكبير / شريف بن راكب الفريدي
وهي مسنده الى الشاعر القدير / مبارك بن ناصر بن حديد

يا مبارك قصة الربع القديمه=حاصلٍ لي مثلها لكن الحالي
فرحةٍ صارت عواقبها وخيمه=اعترضت لموقفٍ ماهو أبالي
كلمةٍ مختارها راع العزيمه=كنها من ناتج القطب الشمالي
ولا نقول ان نيته ماهي سليمه=لكن المنطق سعد من ذا الجلالي
قمت احسّب يوم ذبيت الخريمه=بالخطأ اللي صار ماهو من إهمالي
والله إني ما توقعت القسيمه=ما سكن خطي مع السيد الموالي
وخابرٍ لي مع هلا المعروف قيمه=دارجٍ معهم وارداتٍ حبالي
والسلامه ياولد ناصر غنيمه=يا خلف من عادته فك التوالي
قلتها لو مابها نصر وهزيمه=عارفٍ رد الإجابه من سؤالي
جتك ذاهبتي ابلا اسم ولاوسيمه=وخلها تبقى مثل بير الهلالي
ولو تخليها بعد عندك عقيمه=ان سكت او قلت طول الوقت غالي

منصور الوسوس · 13-12-09, 02:19 PM

وهنا رد الشاعر القدير : مبارك بن حديد

دار خطٍ من ندي اليا نديمه=مرحباً به عد دورات الليالي
للكتاب ومرسله قدر وحشيمه=وقيمته ما تزول لو طويق زالي
ابن عم وجار ويدينه كريمه=وله مقامٍ عاليٍ بين الرجالي
لامدحته مالحق حضي ضليمه=عارفه ومجربه مرٍ وحالي
ما سلك من خلقته درب الشتيمه=ولاطلع صوته على الجيران عالي
وبالمواقف عادته لطمت خصيمه=وايتجاهل ما يجيه من الموالي
هو خويي عارفه سيره وقيمه=ومن عرفته بالوفاء رجلٍ مثالي
يا شريف خلها مرواح غيمه=كانها ماهي من الوزن الثقالي
كان مايقصد بها راع الوليمه=غايةٍ يلحقك منها شي تالي
وانت قلت ان نيته تبدو سليمه=لكن المنطق تعثر بالمقالي
خلها ما دامها كلمه سقيمه=لاتشقق ثوبها خله اجلالي