مساجلة بيني وبين الأخ سليمان الخضراني

المشاركة الأصلية كتبت بواسطة ((نواف))

هـــذه الأبيات إعتذار لأخي وعزيزي
الشاعر / سليمان بن معيبد الخضراني .. أبوبـــدر
الــمنــاســبة : كلّمته وعلّمته في قصيده وقلت راح أكتبها
على موقع من المواقع أحتفظ باسمه , المهم أبوبدر جلس
يومين في إنتظار القصيدة على ذاك الموقع وعلى حد كلامه
يقول : ( شوي أشغّل الجهاز وشوي أطفّيه , بانتظار القصيدة )
أنا بدالي راي آخر وكتبتها على مجالسنا العامره ، وأدخلت عليها بعض التعديل , عــلّمته بالسالفه بعدما إنتظر
ومـــلّ الإنتظار , ويوم علّمته قال : نواف هاذي والله بحق , فأرسلت
له هذه الأبيات وعساه يقبل عذرنا :

حقّك على راسي وعيني ومعروف=كلي عذر يفداك راسي وعيني
تدري وش اللي صار مايلزم حلوف=يا ابوبدر أنت أبخص الناس فيني
المسأله برق ورعد يا اهل الجوف=مابي مراسل عــلّــمتني سنيني
مع البشر أمشي ولا كنّي آشوف=أُمــا تروح بعيد وإلا تجيني
تمشي كــذا شغلة معازيم وضيوف=خَلِّي أرسطو دنيتي فلسفيني
ماني من اللي تذهله رعشة الخوف=أنا كذا يا دنيتي سامحيني
إمسلسل الايام مخفي ومكشوف=مافات منه إلا يجي حلقتيني
يا ابوبدر حكمة علي هلّت اقنوف=الله يرضى عنه والله يعيني
اليوم بظروفه وبُكره لــه ظروف=عاقل مع العقّال والجاهليني
مسلسل الدنيا بلاجيك وسيوف=وامصوّر النشره معه لمبتيني

المشاركة الأصلية كتبت بواسطة سليمان الخضراني

وهذا ردي على نواف فارع

عذرك لفاني وارتفع عالي النوف = نواف ابن فارع ذريف اليميني
الطيب بالطيب ترا دين وسلوف = قدرك سبق عذرك ولو مايجيني
قلبك نضيف وكل مافيه مكشوف = عندي قريته قبل مايبتديني
مايلزمك ياطيب الساس محلوف = الطيب من ساسك و قلبك فطيني
وانا عرفت الوقت دايم له ظروف = اما حداك الوقت والايحديني
خذني معك شيكٍ من البنك مصروف = لاعاد تشري لك بضاعه بديني
والا كما سيفٍ ماهوب ايه سيوف = تظرب به الاعداء على ماتبيني
فرشتلك درب الحصى ورد مقطوف = تحزمي يابيوت شعري عطيني
تفداك نجد ومن سكن داخل الجوف = والي سكن بقراه والا البطيني
شبيتلك ناراً مع دلالن اصفوف = اقلط على الفنجال والغانميني

هذا ولكم مني فائق التحية وخالص الاحترام

هامتان عاليتان

وقمم شاهقة بالأبداع

وقاف قوي صخري

ونثر من زهر

ما اقول الا صح لسانك نواف

وصح لسانك سليمان

وسلمت يمينك من النار يا ابن فارع على امتاعنا بهذة الروائع

عوايدك ما تجي غير بالجزلات

شاعر لك احترامي وتقديري

واعطيك تعظيم سلام

صح لسانكما وبيض الله وجهوكم

مساجلة رائعة من شعراء لهم وزنهم واحترامهم

دمتم في هذا التميز الشعري

وتقبل تحياتي

صح السانك أخووووي نواف على المساجلة الرائعه وصح السانك والسان الشاعر سليمان الخضيري
وبيض الله وجهـــــــــك أخوووي نواف

صح بدنك أخي ابن مطيع وأشكرك على مبادراتك ونشاطك ومشاركاتك اللا محدودة فدمت سالما ومعافا

صح السنتكم
مشكور اخي ابو عبد السلام
على الايراد الرائع
لك مني وافر التقدير
دمت بود