ديوان الشاعر الكبير / علي بن زيد الفريدي (قصائد)

بسم الله الرحمن الرحيم

اتشرف بوضع باقة من قصائد شاعرنا المجيد والحكيم علي بن زيد بن نغيمش
شاعر كتب الشعر بأقتدار وطرق جميع اغراضه فكما كان في بداياته ينشد الغزل غضا عذبا طريا عفيفا تميل له القلوب وتهتز له الرؤؤس .
كذلك انشد الحكمة والنصح في كهولته وسكب لنا ثمار تجربته في درر شعرية تستحق الحفظ والتدوين والوقوف على معانيها كثيرا , ولم يترك بابا للشعر الاوطرقه سوى أني لم أقف له على شيئا من الهجاء .
وابدع كثيرا في فن الالغاز وانشأ مايزيد على ألف وخمسمائة لغز

قال من يدخل على الشعرمع بابه=وان دخل بالشعر يعطيه ماجوبه
ان مدح يشرح عن المدح واسبابه=ون نطق بعتاب مايجرح اسلوبه
ون سمع كلمه مع الناس تغتابـه=يتجاهلها ولـو وجهـت صوبـه
ان تكلم منطقه يحسـب احسابـه=المثل من قال بالنـاس قالوابـه
يبغض اللي للاجاويد سبـا بـه=التعـرض للمقفيـن لـه حوبـه
والمشاكل ساسهـا نـاس كذابـه=صنفوا مايشتهـون وتواصوبـه
والكـلام ليـا لقوافيـه متشابـه=فسروه برايهم ثـم تنـادوا بـه
من يود الهرج من صاحبك جابه=حش عرقوبك وهو حش عرقوبه
من عرفنا سيرته نفهـم اطبابـه=ونتوكـد والموازيـن منصوبـه
واعرف الطيب ولاارميه بغيابـه=ولااستمع في هرجة عنه منسوبه
لكـن اناديـه وازيـد بعتـابـه=واخذ المطلوب واعطيه مطلوبه
آه من قلب جديد العنـاء صابـه=كن فيه النـار بالغـاز مشبوبـه
من زمانن كل مابغاه عيـا بـه=كنه يجازي على الصبر بعقوبـه
عملة تلمع بهـا سـرق ونهابـه=لوتحقق بامرها قلـت مضروبـه
مايغث الرجل ويثـور اعصابـه=مثل كلمة صاحب فيـك مقلوبـه
كلمة الطيب ليـا جـد مشذابـه=عند من لا يفهم الوضع محسوبه
واحد ما يفهم العلم يسعـى بـه=غيره واستدخله من تحت ثوبـه
واعذروني من هرج حق ماعابه=وان حصـل منـي خطـأ يالله

ابغى اتكلـم والمعانـي تصاريـف=والحق حافظه الولي عن ضياعـه
اما كتب به حامـل العلـم تاليـف=والاهرج به مـن يعرفـه واذاعـه
والطيب لاهل الطيب ماهي سواليف=ماهو ب للي ون تعب منـه باعـه
أحد مكانه فوق عالـي المشاريـف=واحـد بحرمالـه احـدود وقاعـه
واحد نهر وأحدمواسـم وتخطيـف=وأحد تسـاوت قاعتـه والفراعـه
وأحد مماته عن عوانيـه تخفيـف=مافيـه خيـر ولايجيـد الصناعـه
والقول طاب وهيض القلب توصيف=وقاف يشجع والطـرب باستماعـه
قول على معنـى ولافيـه تزييـف=من شاعر عبّر ببعـض انطباعـه
قول الحقيقه ماحصل فيه تحريـف=وكل اليا سمعـه شعـر بالقناعـه
اقول حـرب مفرقيـن المواليـف=خصيمهم بالحـرب مالـه شفاعـه
ولياانفقوا ماحسّبـوا للمصاريـف=أهل الوفا والجود واهل الشجاعـه
للاجنبـي بديارهـم كلهـم ريـف=ويرجعون الحق عقـب انقطاعـه
قلته وانا منهم وهم لـي تشريـف=طاب العميل ولا تبـور البضاعـه
اعرف بهم ويزيد عرفي بتعريـف=والعز رفرف فوق ربعي شراعـه
منهم مدفنة الركب فعلهـم شيـف=في ماقف مافيه عطـف وضراعـه
اللي طمع به من عقب فعلهم عيف=في موقف حرج تشابـك صراعـه
وثواب ابن حماد وقت العواصيـف=ياما فرق شمـل يهـز اجتماعـه
وايضا الفروم اللي للانفس نواتيف=ليا جاء النهار اللي تناهش سباعه
ونهار ونويشي وجهجاه وخليـف=كل عـن الواجـب قـويّ دفاعـه
ومنهم معقّلة الجمـل والمخاليـف=اللي ثنوا والحـرب زاد بشناعـه
وذكر الذويبي عند عدوانه يخيـف=وسلطان كم جمع فتك بـه وراعـه
اهل كرم وان جا الملاقا شواحيـف=من فعلهم يشيب طفـل الرضاعـه
أفعالهـم بمصـقّـلات مـراهـفوريف=وعز الضعيف اللي قليل متاعـه
ياما ثنوا ذربين الاريـاء مناكيـف=في مغنـم كثـرت وراه الطماعـه
هم مسندي وان عاكسن المجاديف=وان طار عن وجه المقنع اقناعـه
وفي حقهم لوقلت بالقول تقصيـف=افعالهم تتعـب احـروف الطباعـه
والمعذره يـا متعبيـن المواجيـف=ماقلت ما يكفـي ولوهـو طواعـه
وما قل دل وحكمة القول تصريـف=يثبت صحيحه والبواقـي اتباعـه
وصلاة ربي عد ما ذعذع الهيـف=على النبي اللـي رضينـا اتباعـه

سلام وتحيه وافيه مثل ريح العــــــود..= تحيـة وفـا والـورد والحـب يحــــــــملها
على حرب ربعي عدمابالوطى من عود = هل الجود واهل الطيب من عصراوايلها
ارجال الشهامه والكرامه ارجال الجود = نقول الحقايق والبشر مانجـــــــامــلها
اذاعدت الافعال جاعلمهم محمود = قبيلة وفا مافيه مخلوق يجــــــــــهلها
حماة الوطن والدين واهل الوفا والزود =قبيله تعامل بالوفا من يعاملها
هل العلم واهل الحلم عند اللزوم وسود = ليامن نار الحرب شبت مشاعلها
اقوله وانا منهم ولي الفخر ياسعود = اقول الحقيقه وانت ياصاحبي قلها

يالله يامجري ذوار الهبـــايـب = يارازق الواد المحل بالسحـوبي
الواحد المعبود جزل الوهايـب = رب المــــــلا والمطلع بالغيوبي
يارافع عن المصاب المصـايب = يالله ياساتر جميع العيــــــوبي
ياقابل التوبه لمن جاك تــايب = يالله ياغافر جميع الذنــــــوبي
انت المعين بنازلات النــوايب =ياخير من يدعى لكشف الخطوبي
تزيل عني موجعات صعـايب = من فعلهن ضاقت علي الدروبي
اقفت زهور العمر واصبحت شايب=والعمر في حكم الحكيم محسوبي
وعاصرت بالدنيا زمان العجايب= عصر لقيته مثل ليل صلوبـــــــــي
مسايره لين انكفن الركايب= واحـاوله باللـــين عيـــا يتوبــــــي
واسوق الاريا بين مخطي وصايب=حتى تعبـت وفاختن الذهــــــوبـي
وحسب اعتقادي معظم الوقت عايب=وسبب عيابه ناقلين العيوبي
احدحضر جسمه ومبداه غايب= واحد لغيره دون تفكير لـوبـي
وبالناس من يسعى لعوج الطلايب= رايه يعاند فيه لوهو كــــذوبي
برايه يحب معقدات النشايب= و هذ المرض سبب خراب الشعوبي
وقت ليا فكرت كله غرائب=ليا بغيت الحق صار محـــــــــجوبي
حيرت فكري يازمان العجايب=عجزت لاشرح قصتك في سلوبي
أحد ضعيف الراي مهزوز خايب= وأحد مهماته كذوب لســـــوبـي
وأحد يعرف العلم لاشك هايب= ساكت ويجامل ميتين القلوبي
تم الكلام وصدرن النجايب=والشمس مالت ونتحت للغــــروبي
وصلاة ربي عد وبل السحايب= وما با لفضا من غالب ومغلــــــوبي
على نبي كل ما قال طايب= العادل المختارخير محبـوبي

يا كريم الوجه ياسامع الــداعــي = عالم سـري ووضعي وموضوعي
ياجزيل الـمد يامبــري الاوجـاعي = يالعظيم اللي له السمع والطوعي
يارحيم عــالم كل الاوضــــــاعي = وامرك ونهيك منفذ ومســموعـي
اشتكي لك علة بين الاضـــــلاعي =احكمت واستحكمت داخل اضلوعي
مالها من غير رحمتك مطـــــلاعي = الرجاء في غير رحمتك مقطوعي
انته المعبود والرب والراعــــــي = المرض تشفيه والهم والــجوعي
ابتدت تظهر علامات مرجـــــاعي = والحمول اثقال والعلم متبـــوعي
والليال السود ينهن الاطمــــاعـي = طالت الايام مانهيت مشــــروعي
مايريد الله يسعى به الســــاعــي = والبشر دوني وحولي ومن نوعـي
مكسبي في قدرة الله بذراعــــــي = ماتبعت اللي من الدانيه يــــوعي
غير حقي ماتمــاديت باطــماعــي = وتحاشى كل طامع ومطمـــــوعي
لااجهل الواقع ولاقـاصرٍ بـــاعـي = بس لي طبعٍ على الحق مطــبوعي
والكلام الزور مايدخـل اســماعي = ماينـــاسبني ولايــوافق اطبوعي
واتجنب هــرجةٍ مالها داعــــــي = وأجتنب رجـلٍ على الزور مدفوعي
والزمن ماينصف المنصف الواعي = مطلبه مرّ على الحـــــــر ممنوعي
لايجير ولايجامل ولايـــــراعـــي = كم كريمٍ من معـــــاديه مفجــوعي
وان بغيت اعــدّل الميل مــاطاعي = به اعناد وله محــابيل وفــروعي
واسع ضيّق لو فجوجــــه اوساعي = مفرح محــزن ولوعاته تروعـــي
انتهى شرحي وابا اصفط اشراعي = والكلام اللي على حق متبــــوعي

الف الف شكر لك يا ابوزيادعلى اضافة ديوان الشاعر علي بن زيد الفريدي

درر نظمها في عقد من الشعر الجزل والحكمة والقافية الراااائعة

تسلم يمينك على الاضافة الرااائعة

شكرا لك ابو زياد تعودنا منك مثل هذا الاهتمام

اتمنى ان تضيف بقية قصائده لاهنت

يستاهل شاعر المجالس علي بن زيد

مشكور ومبدع دئما

مشكوووووور والله يعطيك الف عافيه