يافهيد شب النار مع باحة الشوف = ترى حلات الكيف مع فكة الريق
عان الحطب في ثنوة الدعب مجعوف = والما من القلته قراح المذاويق
أخذ الكريك وحط للنار مجروف = نار عليها يجلسون المطاليق
خل الخشب في ترعة النار مصفوف = وادفق عليه القاز من فوق تدفيق
ولا جا لشعلتها تواشي وعاصوف = حط البريق وفرق النار تفريق
ومن ماركة بغداد قم هات لي نوف = عفراً تنافس بالبياض الغرانيق
عفراً طويلة جيد والوسط ملهوف = مكبوسة الغطوه على حلقها الضيق
طويلة العرقوب والخشم معكوف = جبرة حديده والجوانب لواهيق
من البكار العفر تاخذ لها وصوف = وتاخذ وصوف ملهفات السماحيق
تاخذ لها منهن مثناه وكتوف = لوكان محرقها سنا النار تحريق
والثانيه رسلان والشكل معروف = والثالثه رسلان والرابع بريق
واحمس لنا بنٍ شريناه بزيوف = جابه يمانيِ عيونه بلاحيق
من شجرته من يم خولان مقطوف = من وارد الخولان مافيه تبريق
خابرك انا يا فهيد فالشغل شاحوف = وموفق في حمسة البن توفيق
لا تنطل المحماس يا فهيد فالجوف = اخاف يلحقها سنا النار بلحيق
للنار جوف وجال وجنوب وطروف = وللحمس افهق صالي الجمر تفهيق
حفها على سمرِ شديد اللهب حوف = حتى تعرق من سنا النار تعريق
ولا اندار لون الحب ثم صار مشيوف = جاللنجاض ابها صفار وتراميق
قم صبها بمبردٍ عود وسعوف = مقمرٍ عوده يجي له تباريق
ثم هات لي نجر كما الطير مكتوف = وقفة نداويٍ يتل المسابيق
اطول من الرسلان يوم انها وقوف = ليا ناشها المهوى يجي له تصاعيق
ولقم وبهر واودع الهيل مدغوف = ومن العويدي ذوق الهيل تذويق
حتى يجي الفنجال ليا صار محيوف = دم الغزال اللي يجي فالمعاليق
والا الخضاب اللي على كف غطروف = نجلاً تخازر بالعيون العشاشيق
يجمدعلى الشارب لياصارمشفوف= وصف الخويرإن صارفالوصف تدقيق
بريةٍ تبعد صلف كل مصلوف = تجلا العمس ماهيب شاهي سواويق
ليا ذرف منها على الكبد ذاروف = يبي يهود شارد الفكر ويريق
هات الشداد وعطني الجاعد الصوف = فراش اهل هجنٍ تبوج الرقاريق
تراي انا والهم لايف ومليوف = وهجسي من البارح يجي له تخافيق
وليا عزف هجس الغنا كل معزوف = تنفك بيبان القصيد المغاليق
جني بنات الفكر زافات وصفوف = وقمت اتخير في قراح الطواريق
للشعر مثل الصيد قطعان وخشوف = الصيد طعمه والنوادر توافيق
نبا نخلي عاصي البيت معسوف = ثم راحت القيفان عقبه مواسيق
وليا اعتدل هجسٍ له ايام معكوف = يمة طريق معلقات العشاشيق
ياصاح انا قلبي من الود مشعوف = حب البنات ملصقٍ فيه تلصيق
شاعيه مجمولٍ ولي فيه معروف = وموثقٍ لي معه بعض المواثيق
غيدا النوابي عمرها متن وردوف = زملوق غصنٍٍ من طوال الزماليق
ليا بينت خدٍ كما بارق قنوف = رخم السحاب اللي خشومه مدانيق
وعينٍ هدبها لا شبح كنه سيوف = عين اشقر مرباه روس الشواهيق
تنسف فليل غاطن ٍالمتن منسوف = على مثل غرمول عرق الصعافيق
مرودمٍ بالحال ماهيب حرجوف = ولا شافها راع الهوا جاله شهيق
ملهوفة السرجوف والجسم غظروف= والمفرع اللي فيه للشمس تشريق
صدرٍ تقول من ابيض القطن مندوف = طلع النهود مفتقٍ فيه تفتيق
ياما عليك الاحي الورق واسوف = ورق على دوحٍ غصونه مواريق
أمر بيتك واتعداك واطوف = وانا على شوفك شفوق المشافيق
ادرا على سمعتك واذل واخوف = من اهل الهروج مكثرين النقانيق
كم واحدٍ لوكان ماهوب مكلوف = يطقها لو جنبت عنه بلحيق
ترى التعب في راحة النفس مخلوف = شوف العيون يزود النفس تشويق
هذا ويا من له نحا البال ملهوف = شوفك يسليني عن الهم والضيق
ليتك تصافحني بذرعان وكتوف = والا علي تدنق الراس تدنيقٍ
من اجمل القصائد التي كتبت في وصف القهوه ووصف المرأه وأجاد الشاعر في التشبيه كثيراًً
واحمس لنا بـنٍ شرينـاه بزيـوف ****جابـه يمانـيِ عيونـه بلاحـيـق
لكن لاأدري كيف لعب على ابو يمن و اشترى البن بزيوف!!!!
لاهنت,,,,,,, ابوراكان,,,,,,,,, لاهنت
ناصر بن راكب
ما اجمل ذوقك يا الغالي فقد اخترت بيتا رائعا
وللمعلوميه لاخواني الذين لايعرفون معنى كلمة ( زيوف ) ,,,
كلمة زيزف تعني ::
الزيوف::: هي المطلية بالزئبق المعقود بمزاوجة الكبريت، وتسكّ بقدر الدراهم الجيدة لتلتبس بها.
والتزييف هوإظهار زيف النقود.
وقد تحدث الفقهاء عن الدراهم الزيوف فقالوا: من اجتمعت عنده زيوف فلا يمسكها، بل يسبكها، ويصوغها، ولا يبيعها للناس، وقد أستشير الإمام أحمد فى رجل اجتمعت عنده دراهم زيوف ما يصنع بها؟.
قال: يسبكها،
رد: قصيدة روعة لاتفوتك !!! 
العرض العادي
