|
رد: ديوانية مجالس الفردة . خذها يابن جضعان ....
الشاعر اللي معجبه بيض ساقه=توهّ شباب وجاء على العود صايل ياربعنا من فيه شدّة نزاقه ؟؟؟=يفكني من شوق ضاف الجدايل دايم بحقي يرتكب للحماقه=بيّن خواف العود والعود شايل الكبر دايم فيه قدر وعراقه=والعدّ مايشابه صغار الثمايل وانا خبيرٍ بالامور الدقاقه=ما هو انت يالمغرم بسلك (الدسايل) شريت لي بيضا وملسا رقاقه=والا انت للمودم تحط الشمايل ............... وسلامتكم ياعيالي |
رد: ديوانية مجالس الفردة . هاهنا في هذه الديوانية تتلأل بالقصايد والمساجلات الشعرية الرائعة من شعرائنا الافاضل ( الله يطول باعمارهم ) صح لسانك يابو عمر على هذه القصيدة والفزعة وصح لسانك يابو عبدالعزيز على هذة القصيدة الردية والله مافيكم حيلة فالكم البيرق |
رد: ديوانية مجالس الفردة . من خلال إطلاعي على هذا المتصفح الجميل الذي لا يزال يتلألأ بكل جديد وفريد أشكرك أخي " مزعل الفريدي " وأعتبرك قد تميزت وتستحق التميز وفقك الله .. كان هذا المرور لأسجل إعجابي فقط .. ودمتم .. |
رد: ديوانية مجالس الفردة . هلا هلا بولدي مزعل بل مفرح منذ اليوم .... الله يمسيك او يصبحك بالخير ..حديهن والله مادري وش وقتكم ... اليوم الاثنين ابشرك اخبارنا زينه وحلوه وجائني من طيبه الطيبه ابن العم سالم بن سمير الفريد وعزّمت انا واياه والاخ الحبيب عبد الله بن ناصر بن فلي بن راكب نقلع اليوم على (تمساح) باتجاه سدير حيث الربيع ثم نسندها على النفود ونزور الاخوان /نايف بن جازي بن راكب واخوانه عند ابلهم ونفلها يومين ، وبعدها نشوف وش يصير بآخر هالاجازه ..... بشرنا عسى الحرايق طفت ... وعسى الربيع زين ..وعسى دفيتم ..وعسى ...
وياليتني بديار مزعل وربعه=اباتعلم واستلذ الدراسه دراسةٍ مابين دخله وطلعه=حرٍ محرّر ماعليّه حراسه اكلتها مابين رمعه ورمعه=في مجلس الالغاز رمز الفراسه ابي اولع في شقى العمر شمعه=ولا يهمكم العود يلقى مقاسه تكفون ويكفيني خميسٍ وجمعه=من عودكم ياعيال هذا التماسه ولايهمكم ضعفٍ بشوفه وسمعه=يدل دربه مع ضجيج وحساسه وسلامتك ياولدي ............... |
رد: ديوانية مجالس الفردة . مساء الخير للموجودين اخوي بندر الحطاب اهلا وسهلا فيك ونورتنا بحضورك لديوانية وهذه الشهادة منك وسام اعتز بها ونتمى ان تكرر حضورك مرارا لنا .................................................. .... أبو عبدالعزيز الله يمسيك بالخير وصح لسانك على هذه القصيدة الرائعة وسلمت لنا يالغالي والله يطول بعمرك ماقدر أرد على قصيدتك الا ان أقول الله يعافيك وأن شاء الله تستانس في رحلتك مع ( التمساح ) ولاجيت خبرنا عنها وعن الربيع وعلوم النشاما أما خباري الحمد لله انا طيب والحرايق مازلت موجودة ولكن خفت بعض الشئ عن قبل وأبشرك جانا أحد عيال راشد في استراليا ليكمل دراسته عندنا وهو نواف مزيد الفريدي وأحد أعضاء مجالس الفردة اتمنى له التوفيق |
رد: ديوانية مجالس الفردة . السلام عليكم ورحمة الله وبركاته مرحبا مزعل وكيف حالك امس سيرت مع الوالد على علي بن جضعان ولقيت ابوعمر ومشعل الجضعان وحمدان الجضعان وباسل الجضعان عاد ابوعمر مشاء الله عليه مايفوت شي قال عضومجالس الفرده هذا صغير بس خطير وكلهم ماهم مصدقين والله ياهلا ويامرحبا والله اني استانست معهم وقلت لبوي كل مره تروح لهم خذني معك وقال ابوعمر حنا بنمشي لشرقية اناومشعل ومعهم واحد اسمه خالد وهذي علومي |
رد: ديوانية مجالس الفردة . مساء الخير للموجودين اهلا بك بدر زين قابلت ابو عمر بس ماقلت لنا وشقالك من القصايد ولا نسيتها هههه حلووووه قال هذا صغير بس خطير هو صادق والله يرجع ابو عمر من رحلته سالما ولايرحمنا من قصائده الرائعة |
رد: ديوانية مجالس الفردة .
ماني برايق بس شفته بسرعه = وشلون أصدق قلت هذا أنتكاسه كنت أتمنى نسخته عقب طبعه = الزرع لوتسقيه يطلع غراسه من شأن نعطي صاحب العرف جرعه = كل الهدف منها نطيرنعاسه لو قال يالشاعرنبي منك فزعه = نبي على الصمان كشتة عساسه أن كان ابو هنود ضبطة وضعه = وخليت راع الثوب يضبط مقاسه على البحر مغير نزله ور فعه = وسط المحيط ولاعرفنا السياسه الرقم س6ته بس زودت س7بعه = شاعر ولاحدٍ عارفن وش براسه |
رد: ديوانية مجالس الفردة . حياك الله يامزعل واشكرك على كلماتك الرائعه وثنائك العطر لاهنت .. ابشرك عدنا الاربعاء مساء بعد ان كنا بضيافة الاخوان ابناء جازي بن راكب الفريدي رحمه الله وقد امضينا عندهم ثلاثة ايام في نفود الدهناء في مكان يسمى خب الرضم ونقى الشيخ ... وقد كان الجو ربيعياً رائعاً ولله الحمد وقد اكرمونا ابناء العم وطفنا بتلك المنطقه للتعرف عليها وقد جاءنا مجموعة من ملاك الابل هناك ومن كل القبائل وقد لاحظنا المحبة والالفة بينهم والكرم الزائد وهذه عادات ابناء الباديه الاصلاء ...... والحمد لله اولاً وآخراً ... وبرعاية الله ......... |
رد: ديوانية مجالس الفردة . صباح الخير للموجودين صح لسانك ابو عمر على هذه القصيدة الرائعة والحمد لله على سلامتك ورجعتك من الشرقية ودائما مبدع في حضورك وشعرك ونحن فخورين بك وها هي الديوانية تعيش اوقات رائعة مع الشعر الجميل .................................................. .................. اهلا بك ابو عبدالعزيز والحمد لله على سلامتك ورجعتك من الرحلة الجميلة والبدو هذه عاداتهم الكرم والطيب والعلوم الزينة وهاهنا يرجع الابداع برجوع شعرائنا الكرام واخواننا من اجازاتهم القصيرة ولكن ابو راكان طول الغيبة شكله استنانس في سوريا الله يرجعه بالاسلامه ويعطينا اخباره واخبار رحلته |
رد: ديوانية مجالس الفردة . اقتباس:
الف شكر على الاطراء وتستاهل غزليه هاليومين ذيبان طول فعلا اكيد يبي يجيب حلويات شاميه وزيت زيتون وصور عن الرحله لاتعجلون تقل شام خبر الصبر زين والغيب حجته معه |
رد: ديوانية مجالس الفردة . صباح الخير للموجودين اهلا بك ابو عمر وانا بانتظار الغزلية منك وانت قدها وقدودها ............................................ يعني نقول ان ابو راكان بجيب معه حلويات شاميه وووووووو واهم شئ نبي منه صوور لرحلته الشامية |
رد: ديوانية مجالس الفردة . مساء الخير للموجودين مالي ارى الديوانية خالية على عروشها وهي التي تكتست من شعرائنا الكثير من القصائد ممكن نعذر البعض لمشاغله وممكن لانعذر الاخر اما انه يتغلى علينا او انه في خاطره اشياء مخفيها ابنتظار الوعود ولاخبار |
رد: ديوانية مجالس الفردة . هلا هلا مزعل حياك الله .. والله ياولدي الخرج فاضي ...وطلبات هالورعان ودوجة المكتبات دوخت الراس ...... لكن شب النار وخل الديوانيه مفتوحه واللي يشوف النار يجي مسيار (هاااااااه ماهو مسيار زواج) لكن والله علينا براد هاليومين والعباه بعناها ... ضحك علينا دفا الايام السابقه .. ولا درينا الا الثلوج والامطار على الشمال وبسرعه وصلنا بردها وصرنا في بيات شتوي .... والربع اصبر عليهم شوي حتى يسخنون ... وعسى علومك زينه ...طمنا والسلام .......... |
رد: ديوانية مجالس الفردة . مساء الخير للموجودين اهلا بك ابو عبد العزيز انت دائما منورنا بحضورك الدائم واشراقتك الحلوة وابداعاتك المتميزة في الديوانية والله يعينكم على البرد هاليومين ويعينك على طلبات الاولاد والعائلة وان شاء الله نشوف الربع قريبا بحضورهم بعد الغيبة حتى ابو عمر وعدنا بقصيدة غزلية ولكن غاب ولم يرد علينا ياجعله خير |
رد: ديوانية مجالس الفردة .
انا بلاي سعود يوم أحرق العود = ريحه يذكرني حسين الدلالي أدري حداك الطيب يامنبع الجود = ورث (ن) وعاده ياكريم السبالي والله لولا الجودلاأقول مقصود = أنت الوحيد اللي عرف وش جرالي تراء الصخاء دايم يحدك على الكود = وبعض البشر عليه صعب المنالي مريت بيته وأرسله يمي النود = يشبه لطيبك بس ماهو قبالي وأحاول أسلا باذلن كل مجهود = أغديني أمسح صورته من خيالي وارجع أدور شئ ضائع ومفقود = وفجئه يجي المفقود خلي إبالي ولاكل من ودعت في بالك يعود = ياشين فرقا من على البال غالي وأدري على فرقاي غصب(ن) ومحدود = وهويدري أن البعد فوق احتمالي القصيده أطول من ذلك |
رد: ديوانية مجالس الفردة .
ابو عمر ملح البحر كش جلده=من عقب ماهو ليّنٍ صار تمساح .....مايحس لو يجلد ثمانين جلده=لو ما وطى حدٍّ ولا ماه ضحضاح يامن يوصلني لورشات خلده=نبي نجدد له مسامير والواح وتراي بوجيهكم ياعيال راشد :eek: |
رد: ديوانية مجالس الفردة . اقتباس:
العود هذا كل شئ يعده = عنده كلام وخاطر العود ما !!أرتاح يوم(ن)شبيه الزير ماأحد(ن) بقده = ويوم(ن) من الذله مثل زول وضاح لكن حشمت العود من شان جده = من شأن راشد سمها كلها أمزاح |
رد: ديوانية مجالس الفردة . مساء الخير للموجودين ولشعرائنا الكرام صح لسانك ابو عمر وبيض الله وجهك على هذه القصيدة الغزلية وعدت ووفيت وماقصرت ............................. ابو عبدالعزيز هذه القصيدة كلها علشان تحليقة ابو عمر لك وانت نايم من جد ناويلك على نيه والله يستر عليك وتتجدد الاحداث والمساجلات بين الشاعرين الكبيرين في هذه الديوانية العامرة باهلها بداية من الحلاق الى الجلاد الى .............. وننتظر الاحداث القادمه |
رد: ديوانية مجالس الفردة . وهذي هدية خاصة الرجاء تسليمها للعضو المبدع ولد اخوي عبد الله الميسوي f15 http://alfredah.org/up/uploads/c22db4927b.jpg |
رد: ديوانية مجالس الفردة . ياشباب التوزيع عندي في بيتي اللي يبي هديته يسير عليه الكميه محدوده من سبق لبق الفريد مستبعد تقل سمعت ان ذيبان جايب له هديه خاصه بالأنتظار0000000000000 |
رد: ديوانية مجالس الفردة . اهلا بعودتك ابو راكان والحمد لله على سلامتك ومن طول الغيبات جاب الغنايم وانت كريم ابن الكريم وماشاء الله عليك جايب لنا اشياء حلووه بالمرة وتراثية وخاصة اذا كانت جايه من سوريا اخوي ابو راكان لاتنسانا من الهدايا الخاصة واذا كان التوزيع عند ابو عمر فهو فيه الخير والبركة وهو ماهو ناسينا من العطايا والهدايا لكن ماقدر اسير عليك يابو عمر ممكن تحفظها لي لين ارجع او ترسلها لي .... تراني اول واحد يطلب منك ومن سبق لبق |
رد: ديوانية مجالس الفردة . هلا هلا يالربع انا الليله الثلاثاء مساء مدعو من قبل اخواني الحديد اهل كبد القصيم حيث سوف تبدأ فعاليات منتدى الربيع لهذا العام 1430هـ ومن ضمن الفعاليات فقرة (الشعر الواجب في شهداء الواجب ) حيث سوف يكون لشايبكم ابو عزيز قصيدة بالفصحى يلقيها بالافتتاح مع ثلة من كبار الشعراء ومنهم رشيد الفريدي ومشعل الفوازي وغيرهم ..... وارجو من اخي ابو راكان التنسيق مع ابو راكان حديد لنقل ماتيسر من الفعاليات .... ((وانا آسف على عدم التنويه عن المناسبه في المجالس بسبب النسيان)) الكبر شين ههههههه بعد العشاء ان شاء الله سوف نتجه مع مجموعة من الاخوه الى عروس الشمال مدينة تبوك -كان مازعل عليّ ابو راكان-لحضور حفل زفاف الخال راضي فالح الفريدي لدى عائلة الخالدي هناك ... وسوف نكمل الرحلة بجوله على الساحل الغربي الشمالي ونوافيكم بالتفاصيل عند العوده ان شاء الله وابو راكان مدعو لمرافقتنا ان كانت الظروف تسمح له لقرب المنطقه هناك .... ............. لكن اسمحوا لي بكلمتين : تكفون ابن جضعان مستحي منكم لانه الموزع ..ابي نعطيه التريك -لو ماله قزازه- لان الكهرب بالحي الاخضر دايم تطفي والشمع اللي عنده تايواني بسرعه يميع هههههههههههه اما الحذيات ابا اعطيهن ولدي مزعل تخبرون الشتاء مقبل عليهم والهديه مهما كانت حلوه :o اما الدافور وما ادراك مالدافور ..فهذا كنت ابا اعطيه القاصفه لكن بما ان ذيبان سبقنا وقدم له هديه مستقله فاني اهدي الدافور على -الصغير الخطير- تخبرون كشتات الشباب كثيره ... ونوب تضيع الولاعااااااااااااااااااا ااااااااات والشخط ما يعرفون له ههههههههههههه اما هاك الصنيديق الكويتي ...فمعروف راعيه الله يخليه لنا ....خالي منصور الوسوس ::mad:: الادراج عندهم ضاعت مفاتيحها ...والرخص والاستمارات على الماصه معرضه للضياع ... وش بعد وش بعد ......بس اشكركم لاهنتم .......... |
رد: ديوانية مجالس الفردة . اقتباس:
عظم العرب والله مافولك ولكن مر على ذيبان بالقريات قريب منك واجلب لنا الهداياء ودوووبك عليهن لاتكسرهن ثم اكسر راسك خابرك عجل والسواق ابو حكيم انتبهوا للأمانه وبسرعه الهمام الهمام |
رد: ديوانية مجالس الفردة . الله يستر عليك ابو عبدالعزيز تروح وترجع لنا بالسلامة والهدايا لاتنساها ولاتنسى تمر على ابو راكان وتشوف علومه واخبار رحلته .................................................. ... علومك ابو عمر مارحت للحفل كبد وشاركة فيه والقيت علهم بعض قصائدك الجميلة والرائعة |
رد: ديوانية مجالس الفردة . اقتباس:
لم توجه لي دعوه مع ان اهل كبد لهم عندي معزه خاصه ومن مايثلج صدري جمالة الحفل وحسن الترتيب وبعدين انا مرسل الفريد للمشاركه ومعطيه الضوء الأخضر وقدر غرد وجازله التغريد أواصل لتبوك ابن بطوطه الله يرد بالسلامه لعائلته ومحبيه لك وحشه اباعبدالعزيز بصراحه افتقده اذا سافر ان يجيب معه اي شئ جديد من طول الغيبات!!!! |
رد: ديوانية مجالس الفردة . يــا كــل الخــير بدنــياي .. صبــاح الخــير ,, صــباح .. يــصحى بــضحكـة عــيونــكـ ويــتنــفس بجـــنونــكـ .. صبـــاحي بهــجة العــشاق عــند اللقـــا ,, وصبـــر الجـــروح على الـــوفا ,, وفــــرحة المــشتاق بعــد البكـــا ,, صبــــاحً .. ممتـــلي ألــوان من ألـــوانـي .. وتـــمطــر بســماي أشــــواقـي تتـــرجم لهـــفتي وبــــوحي ,, متــــى بـــلــقاكـ ؟؟ حـــديث الــــروح ,, لأفـــكــاري طــال البــعاد ... وكـــل يــوم أحتــري طـــلتكـ بميعــادي ,, عســـاكـ بخـــير يــا رجــا سنــيني .. من عـــرفتــكـ .. كــل أيــامي بــلون الــورد ,, صـــباحــكـ ورد .. يـــاروح الـــورد ,, صبـــاح يـــدفيــني بكـــل الــــود ,, عــلى صــوتـــكـ تغـــفينـــي .. وبـــصباح الخـــير ,, تــبعــثرنــي وتــجمعني .. صبـــاحي اليــــوم غـــير ,, صبـــاح متـــشبّـــع بجـــنوني ,, يـــاكــل آمـــالــي ’’ هـــذا يـــوم مـــن أيـــامي ,, صـــخب تـــفاصيـــله تــحكــيني .. كـــلي أمـــل إنــكـ بصبـــاحي تجــــيني ,, يـــاكــل الخــير بدنــياي .. صبـــاحــي "خـــير " بـــوجــودكـ .. وصبـــاحكـ أحلى من الــورد لكــل من مــرّ من هنـــا ,, دمتــــم بقـــلوب يــملؤهــا النـــقاء |
رد: ديوانية مجالس الفردة . ياسلااااااااااااااااااااا ااااااااااااااااااااااام يارمنسي روعه روعه روعه كأروعت كاتبها أسرجت خيولي معها ودخلت عالم |
رد: ديوانية مجالس الفردة . مااجمل الشمس حينما تشرق وبضيائها المشع للعين تسرق وبهمس الطبيعة الخلاب تفرق تأتي تلك الطيوروتطربنا بألحانها وبروعت اشكالها تندمج ألوانها وبين الأشجار تكثر أنوعها يهب النسيم على خيالي العابر ويرفرف الحزن وهو مكابر ولا أملك الا صبراًمثابر تأتي ذكرى ذلك الحبيب الذي كان المداوي والطبيب وأنادية ولكن ليس هناك من يجيب أزور تلك الديار التي أصبحت في حياتي خالده وأتذكر حبها وحنينها وشوقها وهي عائده ونسيت أنها لقلبي وحبي هي فاقده أعلم أنها تشتاق لي شوقا كبيراً وتتنمى لقائي وحظني كثيرا ولكن قلبها بات كسيرا فلا اعلم اين موطنها ولا اعلم اين مسكنها الى متى أصارع لحظات الفراق الموجعه التي سرقت ضحكت شفاتي الموسعه وتركت في صدري جروحن موجعه ياترى كيف حالها وماهي احوالها بعد مافقدت احلامها كيف اوصف شعوري والهم يحرقني ولهيب الشوق في صدري والحزن يغمرني صارت حياتي بلامعنى وانا وقلبي فالهم ضعنا لم اجد من اشكو اليه سوا هذه الصفحه الحزينه لأعبر لها واشكي لها همومي واحزاني الدفينه ولكن لن ولا انساها مهما مر من الزمان ومهما تغير المكان لأنها حبي الأول وحبي الخالد وحبي الاخير |
رد: ديوانية مجالس الفردة . مالي ارى اصحابي وقد غابوا عني !!!!! مالي ارى مجلسنا وقد خلا من رواده !!!!!! مالي ارى نشاطنا قد قل عطائه !!!!!! مالي ارى حالنا وقد تغيرة مسارها !!!!! مالي ارى شعرائنا وقد بخلو علينا !!!!!! مالي ارى رؤسائنا وقد قلو زيارتهم !!!!! مالي ارى مشرفينا قد قطعوا وصلنا !!!!! مالي ارى ديوانية ربعنا قد خوت عروشها 1!!!!! مال ومالي ومالي ومالي ومالي !!!! |
رد: ديوانية مجالس الفردة . موجدين وابشر بعزك نحن في استراحه محارب انا والفريد نضبط الخنادق والدفاعات الارضيه ولنا عوده بجميع الاسلحه الفتاكه والمحرمه دولياَ |
رد: ديوانية مجالس الفردة . اشكرك ابو عمر وبيض الله وجهك ودائما حاضر ومتواجد ومتميز في عطائك والله لايحرمنا من اطلالتك الجميلة وانا بنتظار عودتك انت وابو عبدالعزيز مع الاسلحة الفتاكة .................................................. ...... ولكن لي فترة لم ارى اخوي ابو راكان ومن زمان لم يمر علينا في الديوانية عساه خير وان شاء الله يرجع مثل اول واحسن |
رد: ديوانية مجالس الفردة . اقتباس:
ارسله على الخااااص الرجال يسج هاليومين وطايحن بالضبان في بسيطاء وانت تعرف الضبان لها مفعول سحري!!! وتعالج الرماتزم والبرد وضعف النظر |
رد: ديوانية مجالس الفردة . ههههههههههههههههههههههههه هههههههههههههه ابو عمر ضحكتنى من جد الضبان في هذا الوقت !!!!!! والله مادري عن ابو راكان وش يسوي من ورانا وان كان هذا العلم صحيح نبي منه يخبرنا ويعلمنا بالطبخة السرية لضبان |
رد: ديوانية مجالس الفردة . هلا هلا ولدي مزعل ياشمعة استراليا لالا اوقيانوسيا كلها ... بداية اشكرك على تلك الكلمات السحريه العاطفيه ...وين مخبي هذا عنا ياولد اثرك شاعر ومشاعر ... الحقيقه استمتعت بقراءة تلك النصوص النابضه الجميله وانا اصنفها من فصيلة... خلجات الغربه .. اما بالنسبه لعلوم شايبك : فكما ذكرت تشرفنا بحضور حفل كبد والقيت تلك العصماء الموجوده الان في اصيل القوافي كما تعلم .. ثم اتجهت مباشرة بعد العشاء مع اصحابي الى الشمال ومررنا بالعلا ومدائن صالح واخترقنا الجبال غربا الى الوجه ثم ضباء والبدع وحقل وكلها على الساحل الغربي الشمالي تم عرجنا على تبوك حيث الافراح والليال الملاح وكان حفلا رائعا وموفقا ولله الحمد ثم عدنا ادراجنا الى قصيم النماء .... هذه محطات الرحله باختصار شديد ...لان كثر القرق وانا عمك ماينفع ..يبي يتخلص !!! اما ابو راكان فهو ملبد ليه؟؟؟ ما ادري ماعندي الا ابن جضعان الله يخليه لنا يونسنا بفرفشاته ومقالبه لو ان خيره اقل من شره... اشوف وشك بخير ... تحياتي ..... |
رد: ديوانية مجالس الفردة . اقتباس:
مزعل تراه ماعطاك العلوم كلها لايهمك حلاوت لسانه العود عود اعرفه زين احم ماقلت شئ زلت ألسان:o |
رد: ديوانية مجالس الفردة . هلا وغلا فيك ابوعبدالعزيز وبعودتك الجميلة والطلة الرائعة الحمد لله على سلامتك ورحلة جميلة وبيضت وجهينا في كبد وماقصرت وهذه عوايدك كافي ووافي وعلومك زينه. .................................................. ...... اما ابو عمر عنده خبر انا مادري عنها وش العلوم اللي عندك وماعلمتنا فيها ياابو عبدالعزيز صادوك من غير ماتدري ؟؟؟؟ |
رد: ديوانية مجالس الفردة . مسيكم بالخير والنور حيا الله ربعي عيال ابوي راشد قبل اسبوع سافرت الى عرعر لزيارة خوالي ( من ريحة امي الله يسكنها الجنه ) انا للمعلومية امي الله يسكنها الجنة هي يسرى بنت ابراهيم النجيدي من أهل القرعاء وهم من المصاليخ من المنابهه من عنزة عيال وايل ,, وانا كل بعد فترة أزورهم واحب خشومهم وروسهم.... واخذت عندهم يومين ثم كشتنا باتجاه جديده عرعر وهي تبعد عن عرعر 65 كيلو وهي منفذ حدودي مع العراق ولكن حرس الحدود ردونا وقالوا لنا روحوا للحزم افضل لكم وامتع ,,, وبالفعل رحنا يم حزم الجلاميد وهي تبعد عن عرعر 100 كيلوا بالضبط وتقع بين عرعر وطريف وتبعد عن طريف 125 كيلو منر ,,, ودخلنا بالبر باتجاه العقم والحدود العراقية ,,, ربيع وعربان وهبة ريح ( لكن بالليل برد شديد ) ,, ثم دخلنا الى الاردن من منفذ الحديثة واخذنا يومين ورجعنا يوم الاثنين اللي طاف وعقب دخلنا جانا عجاج وغبار شديد على القريات لم يذهب باذن الله الا يوم اذن الفجر ,,, لك الله ,,, الرؤيا 10 متر فقط ,,, ويوم جيت اشغل الكمبيوتر والا هو عطلان ,,, وقد تم اصلاحة قبل قليل ,,, وهذا انا اصافحكم وامد لك يدي وقلبي واقول لكم ,, السلام عليكم ورحمة الله وبركاته اخبارنا على ما تحبون واشكركم انكم سألتم عنا ؟؟ واخبركم ان ::: العيال وخواتهم وامهم كلهم بخير وستر وعافية من الله وربي يرفع شأنكم يا عيال ابوي |
رد: ديوانية مجالس الفردة . اقتباس:
هلا بهالطله اباراكان والحمدلله على السلامه ومعلومات طيبه ومفيده ورحله تمنيت اني معك ملاحظه : الاخ مزعل الفريدي00 شف الاخبارماهي أخبار خلف الفريد نصفها مشفر خذ الاخبار سنعه |
| الساعة الآن 07:41 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO TranZ By
Almuhajir