يامسافره مع جنـاح الطيـر=حسبي على الطير من هـدّه
ضفّك جناحه وعيّـن خيـر=وحبـال الأشـواق ممـتـدّه
يابنت .. ما للسفـر تبريـر=خـص ٍ ليـا طالـت المـدّه
أنتـي تقوليـن جـدّه غيـر=وأنتي بعد غير عن جـدّه ؟
جيتي بحرها وجـاك مغيـر=مشتـال موجـه علـى يـدّه
المـوج ودّه يضمّـك ميـر=الـبـحــر .. ودّه ولا ودّه
يانفحـة الشيـح والنـويّـر=سـداح بـاح الجفـا سـدّه
وش خانة الشعـر والتعبيـر=أبنـي لـك البيـت وأهـدّه
دايم وطيفك ضحى وأعصير=يشـنّ هجـمـات مـرتـدّه
واليا عرض لي عكست السير=وسيلّت دمعي على خـدّه ‍ !
الياس يقضى علـى التفكيـر=وافزع ورا الصبـر وارتـدّه
وأنـادي الحلـم للتفسـيـر=ولازلت .. ولا زالت الشـدّه
من يوم كنتي وكنت صغيـر=نضحك على العمـر ونعـدّه
واليا حصـل بيننـا تقصيـر=نصدّ .. ولا تبطـي الصـدّه
لين أبتدا الشيـب والتوقيـر=وعلاقتـي معـك مشـتـدّه
محبّه .. وحشمه .. وتقديـر=ويضدنـا الحـظ ونـضـدّه
منتي علـى موجـة التغييـر=يابنـت الأجـواد محـتـدّه
لقيـاك مـا تقبـل التأخيـر=خص ٍ بعـد طالـت المـدّه
ويا اللي تقولين جـدّه غيـر=أنتي بعد غيـر عـن جـدّه