حراير نبتت على النـار والنـور=تحدث الكون الفسيـح ببهاهـن
من حكمة الخلاق ولدن بديجـور=وبدد ظلام الليل عالـي سناهـن
حسابهن في خانة البضع محصور=وبعصرهن غطن على من سواهن
خوات مختلفات باحوال وعصور=متشابهات بوصفهـن وبنماهـن
ياللي بحل رموز الالغاز مشهـور=هات الخوات الغـر والا حداهـن

على الشريعة مجد الأدوار مخبور=أدوار ربـي رافـعٍ مستـواهـن
الدور الأول صار له بالوطـن دور=ساده " محمد " بالعدل ما تماهـن
والثاني اللي جدد العهد منصـور="تركي" وتركي قاد ركبه واراهـن
والثالث اللي فك داره من الجـور="عبد العزيز " احياض داره ملاهن
عدلٍ وأمانٍ صار له بالوطن طـور=بثوبٍ من المجد الحنيفي كساهـن

الحل شفته يابو راشد على السـور=في فرجة المصمـك بقايـا نباهـن
ثلاث حلن في الجزيـره بـلا جـور=ياطيب مبداهـن وماكثـر عطاهـن
ريف الضعيف اللي من الظلم ممرور=وعز لمن صان الشريعـه معاهـن
تاريخهن في صفحة العـز منشـور=سمي جـدك يابـو راشـد بداهـن
وانا اشهد ان اللغز جزل ومحكـور=مير الفكر بالطيـب دلـل وجاهـن

ياللي بدعت اللغز وافي ومشكور=الله يجملنـا نـجـدد ولاهــن
ثلاث اخرهن لها النور دستـور=وارواحنا لعيونها مـن فداهـن
ترثة معزي عقب دابان والكور=وام الرياض وروسا الله وراهن
روسا"تورث طيب كابر لمكبـور=ياجعل ربي يسعد النا مساهـن
هذي محل الظن والنور يانـور=الله يجملنـي مـادور سواهـن

حراير "من طهرهن كنهن الحور=متفاوتـات بعمرهـن وبحلاهـن
حراير" خلقن بلا ارقاب ونحـور=وكم "عاشق" من دم قلبه رواهن
هلهن هل الطولات والعلم والشور=وكم "فارس" عدوه ماجا حماهـن
في خدمة الإسلام شفنالهـن دور=والثالثه فاقن جميـع انظراهـن
دوله سعوديه لها الشرع دستور=وفي ظل ابومتعب تطاول مداهن

باشارك برمعه ليا جانـي الـدور=دام السوالف عالـي مستواهـن
مراحل الدوله على سنين وشهور=قامت و تاريخ العرب ماناسهـن
الاولـه و الثانيـه مابـه جـور=والثالثه على السعد من وراهـن
بقيادة آل سعود و العلم مخبـور=قوم مـع عدوانهـا مـا تداهـن

يامير حل اللغز هيـن ومقـدور=حراير قـد كمـل الله حلاهـن
الأوله دولة لها قـدر مخبـور=هي ساس للتالي وهي مبتداهن
والثانية كانت على مد وجـزور=لكنها نبـراس فـي مستواهـن
والثالثة حصن مشيد بدستـور=مسك الختام اللي ختم مبتغاهن
ثلاث مزيونات يمشن على الدور=متساويات بزينهـن وبنقاهـن

حل اللغز يبغي علـم والعلـم نـور=والغر أنا منهـن وعمـري فداهـن
النايفات الغر فـي أسـم مشهـور=دولة هل العوجأ سعـودي أنتماهـن
الأوله حـر دخـل سـور وقصـور= راهـن أبوتركـي وكمـل بنـاهـن
عاش الملك عاش الوطن خير دستور=حكمه بشـرع الله رفـع مستواهـن
مشكور يامير الفخر الـف مشكـور=من دونك الابيـات ينقـص حلاهـن

يااللي كتبت اللغز مشكور مشكـور=باابيـات شعـر عالـي مستواهـن
في عهدهن ما حد رأى الظلم والجور=والعدل رفرف فوق عالـي سماهـن
ثنتين فاتن والزمـن كـان لـه دور=الله يرحـم كـل شيـخ حمـاهـن
والثالثه عشنا بها بأمـن وسـرور=الله يعـز اللـي بروحـه فـداهـن