سلام حيث ان السلام اتحيه=سنه وفي سلم العرب ممشيه
على عموم الحاضرين اهديها=لكنها للي دعوا مثنيه
عيال جازي يرحم الله جازي=اللي علومه كلها منقيه
راعى الكرم والجود شايع صيته=مايختفي قصرٍ يضلل فيه
كلٍ يجيله من بعيد ادياره=ياحي ذاك الملتقى ياحيه
وكلٍ يعرف اسمه ولو ماشافه=اسمه شهر والوسوس الماريه
الله يسقي بالسحايب قبره=سحايبٍ طول السنه مقفيه
غادر وهو بقلوبنا ماغادر=لازال ناره في مكانه حيه
يدوم ذكره في وجود عياله=مافيهم اللي ما تلبّس زيه
بالعرف والحكمه وحسن المنطق=والطيب والخوه وصدق النيه
مبروك ثم مبروك يبو نادر=مبروك في ليلٍ تكاشف ضيه
ياللي نقيت الخيل من مربطها=بنت الصويتي من رباط عبيه
ناسبت ربعٍ عاليٍ منسبهم=على العزاز بيوتهم مبنيه
ابن شطينه هابس ابو درزي=انشهد انه رجل يسوى ميه
ياقل مثله بالزمان الحاضر=يمناه في بذل العطايا اسخيه
وان جاه كفوا وطامعٍ في قربه=يقول في شيمة عرب مهديه
هذي حقايق واضحه شاهدها=في نضرة عيوني وسمع اذنيه
احمل تحياتي واحر اشواقي =وسلام ربعي محتمين الهيه
الله يبارك فيك يبو نادر=ويصلح لك الاحوال والذريه