يامالك اسمع جابتي يوم اوصيـك = واعرف ترى يابوك بامرك وانهاك
وصية من والد طامع فيك = تسبق على الساقه السانه العليـاك
اوصيك بالتقوى عساء الله يهديـك = الها وتدركها بتوفيـق مـولاك
اجعل دروب المرجلة من معانيـك = واحذر تميل عن درجها بمرقــاك
واحذر تضيع كل منهو ذخر فيـك = معروفه لا تنساه واوفه بعرفـاك
واوف الرجال حقوقها قبل تعنيـك = والا تعتمد بالقول والحق يقفــاك
وهرج النميمة والقفا لا يجي فيـك = واياك عرض الغافل اياي وايـــاك
الضيف قدم له حيــــن يلفيـــك = مما تنوله يا فتى الجود يمنـــــاك
اكرم اقباله فانها من شواديـــك = وابذل له المجهود ما دام يعنــاك
واحذر عدوك لو ظهر بي يصافيـــك = خلك نبيه وراقبه وين ما جــاك
لا تامنه واطلب من الله ينجيــك = ويكفيك ربك شــــــر ذولا وذولاك
ثم العن الشيطان لياه يغويــك = ترى ان تبعته للشرا بيـك وداك
والطف بجارك وقم دون عانيـك = وافطن لما يعنيك عن ربعة اخواك
وعن صحبة الانذاك حاشاك حاشاك = ترى العشير النذل يخلف طواريك
لا تسمع قول الطرف يوم يلفيك= بالكذب يقضي حاجته كل ما جــاك
من نم لك نم بك ما فيه تشكيـــــــك = ويلاه قد ازرا رفيقـــــك وأزراك

يا مل عين في محاجيرها شوك = والقلب به عن لذة النوم تكاك
لادك في قلبي من الهم داكوك=جاوبت طربات الحمايم على الراك
عزي لحالك ياعزيز وانا ابوك= كان الزمان اللي وطاني توطاك
افهم وصاتي ياعزيز وانا ابوك =دامك صغير وغاية العلم يقراك
تراه ماينفعك خالك ولاخوك = لاصار ماتقضي لزومك بيمناك
وربعك الى بان الخلل فيك عافوك = اقرب قريب لك من الناس يشناك
ان كثر مالك اصدقولك وطاعوك =وان قل مابيدك شانت حلاياك
لو تطلب الما عندهم كان ما ا سقوك= ابعد مزارك عن وطنهم ومرباك
وان طاب حظك اصدقولك وحبوك = وان بار بك كل مايبي غير فرقاك
وهرَاجه المجلس الي جيت وروك = منازل تطرب نظريك بدنياك
والي قضوا منك اللوازم وخلوك= تفرقوا وانت احتمل كل ماجاك
كنك سراج البيت للنور شبوك= والي انقضي اللازم حدا الربع طفاك
ولاكما ليمونه الحمض مصوك = الي قضي منها الطعم فرغوا ذاك
واللي يجي من رفقته ريب وشكوك = احذر عنه إياك تصحبه بمسراك
والي جفوك اهل الوطن واستخفوك = قلع غريسك منه واهدم ركاياك
تراك لو ترجع على الرجل صعلوك= احسن من اللي تلتجي به وياطاك
وعطهم حقوقهم الي منهم جوك= واغلق ضميرك لاتعلم بقصاياك
ان طبت ماحبوك وان عبت زلوك = تمضي حياتك ناقل داك برداك
والي نفوك من الوظيفه وعافوك= خفت موازينك وكل تهقواك
واصحي لخلان الرخا لو تغالوك= اعرف تري اطيبهم الي احتجت يجفاك
كنك خوي امقيط دهووك واغووك = وحقك عطاك ارشاك واقفا وخلاك
واحذر عن العيلة تري الحق مدروك= مثل العمل يدركك ما منه فكاك
وان كان عدوانك علي الضيق حدوك= فاخصم طلابتهم بجفاك وقداك
وان كان هم لمشرف الحق ماشوك = ناظر مطاليع الفرج قبل مبداك
وان طاوعوا شيطان الانفس وهانوك= فاصبر علي البلوي ودفنك رزاياك
زرهم تراك اليا ونيت زاروك = ان ما بديت لصاحب السوء بيبداك
مادامهم ماطاوعو لك وعرفوك = اضرب علي الكايد الي عمست ارياك
لو هذبوك من المصاوب وضدوك= مايذبحونك قبل تدني مناياك
واحلم علي الجاهل ترا الحلم مبروك = وقم للضعيف اللي من الظلم ينخاك
وادمح خطا جيران بيتك ولو اوذوك = تري القصير وحرمه الجار بحماك
عطهم رواتب حقهم لو تناسوك = في كل ما يصلح لدينك ودنياك
وقم للضيوف اللي عنولك وضافوك = اغلا كرامتهم حجاجك وبشراك
واعرف تري مالك من الضيف مشروك =لولاة يطلب حاجته منك ماجاك
وقم للرجال ان رايعولك وحبوك = واحشم خويك واكرمه عند ملفاك
ولاتبات بهم دنياك مضنوك =ماطاب لك مادام لك وافتهم ذاك
لو يطلبون اخفايك الناس مااخفوك =الرجل مثل النجم في كل الافلاك
وصلاة ربي عد الاوراق والشوك = او ماناض براق وماهل سفاك
على الذي مافيه ريب ولااشكوك = محمد مادك بالقلب دكاك