صب أشقر الفنجال وأسمع يا عواد = لو ما أنت داري وش يقول المنادي
دارك من أقصى الهند لا شك وش عاد = منكم كسبنا أرقامنا والهنادي
وأرطانتك عندي ولو حاست الضاد = تسوى قصيد مدوزنين الدوادي
وأرتح وهز الراس من عهد ابن عاد = منا وفاء الرفقه بليا ملادي
تلزم بنا الكلمة ويلزم بنا الزاد = ونجير عن ثار القريب البعادي
وأعز ما نملك تواريخ الأجداد = وأجل ما نبدي صدوق المبادي
وأوتاد لو زالت عن الأرض الأوتاد = والجدي فالطولات وأن كان هادي
بأيماننا سبابة المجد ترتاد = بين التشهد للولي والزنادي
وأنته جليس تسوق دله وبراد =والجزل لا ضايع ولا هو بغادي
والبارح البارح على صفق الأنواد = في ثلثها الآخر حلول البرادي
ضاقت علي الأرض مع وسع الأوهاد = ومغرّبّ لو كان هذي بلادي
في خاطري عبرة وفالصدر رعاد = والعين فيها مثل قدح الزنادي
وأقعد وأوقف وأمشي شوي وأنقاد = مع هاجسى يقفى عنادي عنادي
النفس صلفى وأصمك الراس معتاد = نطح السنين العوج فأول وحادي
واصبر ولو الصبر سلال الأكباد = والجرح صدري عن شموته ضمادي
وأن صار حظك وأنت صادر ووراد = يابو ولي عيدت قبل العيادي
والحاجة اللي بين عايد وعياد = مالي بها ياللي مشيت متحادي
لو شلت ضلع طويق شدة ومعواد = أخف من منة خطاة الربادي
ما ضاق باب الله على وجه الأجواد = الا ولا حطيت الاسود رمادي
للرجل مع وافين الأشبار ميعاد = والهند تذخر لإحتكام العوادي
واللي قراء المصحف وثنى بالأوراد = ما هاننا عبدالمجيد وعبادي
وأن صد وجهي يوم عن شي معتاد = ميعاده الوقفة ويوم التنادي
جاك الكلام الجزل وأسمع وتنشاد =نوادرٍ ماهي بحادي وبادي
منقودة تنقد على كل نقاد = والذ من خزن الصفى للغوادي
شرد بيوت الشعر طاعت لمن ساد = وعن غيري أذير من ظبيّ الحمادي
وأنا أدري أن العلم ما عنه نشاد = عندك ولا تعلم بما في فؤادي
وتهز راسك طرّب سرداد مرداد = وأنا أحتدم من ضيقتي بإنفرادي
لا شك ما لومك وما أخطتك الأنكاد = وأن مرك المضمون وأخطيت عادي
لا نته بلا مفصح ولا نجدي آباد =والسالفة ماهي بهرجة روادي
وأنا بعد شعري مضامينه أضداد = وآخر مراد أنك تميز مرادي