الله يباشر خبـة النقـع بالسيـل= من المزون اللي حقـوق ٍ هللها
عسى عليها كل ليلـة هماليـل =عقب المحل . . لين يتشابك نفلها
ياما أذبح فيها من الحشو والحيل=بمخيمات ٍ تكرم الضيـف أهلهـا
وياماسطع فيها شعاع القناديـل=عنها غياهيـب الظـلام يعزلهـا
عشرين ليله كن مالله خلق ليـل=أضواء ونيران ٍ تشاعـل كتلهـا
كل القبيلة دون شرح وتفاصيـل=ماغاب غايبها بكامـل خصلهـا
تكاتفـوا بالمهرجـان الرياجيـل=كل ٍ حضر وأقصى جهوده بذلهـا
وسدم طريق اللي يدور مداخيـل=وكل القبايل في نجاحـه ذهلهـا
وحرب ٍ هل الامجاد جيل ٍ بعد جيل=لهم فعـول ٍ غيرهـم مافعلهـا
موثقه من دون إضافـه وتعديـل=ومن لايسنـد حجتـه ماعدلهـا
فعل الوسيدي صدق ماهو بتمثيل=دون الخوي روحه تسبب بأجلهـا
والقبع خاله قص يمنـاه تنكيـل=وستة نفوس بحد سيفـه قتلهـا
وحجرف ذلوله يوم جوه الهواشيل=قام ونحرها للضيـوف ونجلهـا
والليا تعلم ضمر الجيش والخيـل=كـم قطنـة ٍ ماخلـوا إلا حللها
وفعولهم ماهي ماغير المصاويل=حتى العجم خاضوا معارك دولها
واليوم توه قـام حـظ الوبابيـل=كل ٍ عرض ذوده عقب ماسملهـا
في عدها المطلوب غير المخاليل=خمسين متن وكـل ذود بفحلهـا
كله بسبة ثالث الجـدي وسهيـل=أبن دليم اللـي بجهـده صقلهـا
عبدالله اللي ذلل الصعـب تذليـل=يوم أوثقت بـه لابتـه ماخذلهـا
شق الطريق وطنش القول والقيل=تمـره العوجـا وتمشـي قبلهـا
من كل جانب كلل الجهـد تكليـل=لين الأمور اللي يبيهـا وصلهـا