الضيق ما هو بالسعه ... و المساحه

الضيق لا ضاقت بك قلـوب و ارواح
والبعد عن ما تكره النفس ... راحـه
من لا توده ... فارقه يوم ... ترتـاح
وتبسمك بوجيه ربعـك ... سماحـه
خلك بشوش ... تعيش بـأيامك افراح
وحظك يعزك مـن يرفـرف جناحـه
يجيب من ودك يجـي لـك ولـو راح
والكبـر لله ... والتكـبـر بجـاحـه
والوقت نصه "جد" ... والباقي "مزاح "
والصوت حشمه ... وارتفاعه وقاحه
كذاب ... من قال انطح صياح بصياح
والحب يبدل صحـراء الايـام واحـه
اذا حضر ... يلغي مسافـات وجـراح
و أما الزعل ... لا بد تكبـح جماحـه
اصبر تشوف ان الفرج بارقـه ...لاح
والحق يثبـت فـي كـلام الصراحـه
مثل السماء ما همها النجم لو طـاح
بعض العيون تشوف فيها ...شفاحـه
ما كنها الا بس " نظـرات الاشبـاح "
وعيون تاخذ هاجسـك لـانشراحـه
نظراتها تحنـان ... والرمـش ذبـاح
كم كحل ضم الشوق والدمع ... ازاحه
و ياما كحل يقعد له سنين ... ما ساح
ودنياك لـو ضاقـت بكـل المساحـه
تلقى السعه والحب ...بقلـوب وارواح