ياشين رجلن على ربعه رفع خشمـه=لو كان طيب ابكبـره هـد مقـداره
عمر الكبر ماغـدا للمودمـي نعمـه=الا علي نذر نغمه واكبـر اعيـاره
ويش الرجل دون ربعه لحمه ودمـه=في ليل ماعاد ينفـع مـال وتجـاره
لاصكت اصدوف بقعا وارتخى عزمه=وقد المصايب اضيوفه والحزن داره
ياطول ليلـه هـذاك وياكثـر همـه=لامن جفـوه اخويـاه وقـل زواره
يوم الرخى حولـه العربـان ملمتـه=واليوم ماعنده احـدن كنـه ابغـاره
ماجاه كود الشلي لا راحـوا الخمـه=اللي على ادناة شي اتذيـع بسـراره
مسكين ذا اللي يحسبنه علـى القمـه=وانه كبير وغني والنـاس طـراره
بكره يعرف الصحيح ويعرف اليمـه=ويعرف وقته ليامن حـس بمـراره
ولا صارت اهموم بقعا كلهـا يمـه=بيعرف بن الليـال السـود غـداره
ماعاد ينفعه كود اخـوه ابـن عمـه=ماينفعه لا صديقـن لـه ولا جـاره
اقولها لـك وانـا صـادق وبالذمـه=مانيب مـن قـوم ذمامـه وهـذاره
ليتك اتصحصح معي واتكب ذا الزمه=اسمع رفيقن يعزك واخـذ بشـواره