لاتعتذر مال الهجر منك تبرير=صدك بليا ذنب والله ظليمه
ماصارلي بعدك يفوق اي تصوير=تجددت كل الجروح القديمه
بعدك لعبي هاجسي والتفاكير=وقلب (ن)جريح وروح صب(ن)مهيمه
ماغير اسلي خاطري بالمشاوير=اروح وارجع والهواجس مقيمه
ياحبي اللي بين بيض الغنادير=لك في عروش القلب قدر وقيمه
ان كان صدك ماخذك عني لغير=روّح ولو ان الخساير وخيمه
وان كانها عني خذتك المقادير=فالعفو عند المقدره فيه شيمه
يامرحبا والحب كله معاذير=تشفع لك ايام الغرام القديمه
يوم الهوى لازارني منك أعصير=أضم في صدري من اجلك نسيمه
واليوم اصبر خاطر الوجد تصبير=واقول صدك عقب وصلك جريمه
ولاجاك مني ياهوى البال تقصير=مواقفي وياك والله عظيمه
صخرت لك مشاعر الشوق تصخير=وامطرتك بحبن تقفاه ديمه
وظللتك بجفني وصارت مسافير=يوم الغلا بين النديم ونديمه
واليوم ماتنفع كثير المحاذير=تفاغمت بين النفوس الحشيمه
عسى سنينك روض عشب ونواوير=محد لنفسه يرتضي بالهزيمه
اما تخاويني على الشر والخير=والا السلامه منك راس الغنيمه

صح لسان الشاعر زايد المري
ولاهنت اخوي ذعذاع الشمال على الاضافه الجميله
تحيتي