يا نفس صدّي عمد وأرقي من رفاع أليا رفاع=وانتي عزيزه مارضيتي بالتدني والخضـوع
تجاهلي وأرقي على قمـة مراقيـب السبـاع=لو التذلل يشبع الانفس يموت الذيـب جـوع
مير المثل قال القناعه كنـز والدنيـا متـاع=والمغريه لو تغري الطماع ما تغـري قنـوع
وانا احمد الله يوم اسوق الرجل فالسبل الوساع=وأن سقتها قدام مايطري على بالـي رجـوع
اصدّ عن بعض المداخل عمد قصـرٍ للنـزاع=من خوف لا تجذبني الزله وأنا رجلٍ جـزوع
تجزعني الزله ليا جتني من لسـان الشجـاع=لو كنت اصم ابكم ليا صارت من لسان الدنوع
مانيب جاهل مير تحكمنـي تقاليـد وطبـاع=واشوف ناسٍ مايعرفون النزول من الطلـوع
من يطرد الدنيا محبة قدر يبشـر بالضيـاع=واللي يعدّي فوق مايحسب,مصيـره للوقـوع
واللي يعبد وجيه خلق الله مثل عابـد سـواع=انا دخيلك ياعظيم الشان من بعض الركـوع
يالله لاتظفي على وجهي مـن الغفلـه قنـاع=والهمني الطاعه ولا تجعل جبينـي بالمنـوع
انا عليّ من الذنوب السـود مـا لايستطـاع=تاخذني الغفلات والانسـان مخلـوق هلـوع
غرقـان فاللـذات والايـام تطوينـي تبـاع=على سفر واليوم يقرب من ربوع ليا ربـوع
أسألك حسن الخاتمه يارب لحظـات الـوداع=والعفو والغفران من شيٍّ ورى حدب الضلوع
اناعدوّ أبليـس والشيطـان معصـيٍ مطـاع=احيان يغويني على ذنبي واطيع النفس طـوع
وأذنب وانا من رهبة الموعد معاليقي شبـاع=والخوف يدخل في شراييني على مليون نـوع
خوفي من اللي مقتفيني بعد ما يطوى الشراع=والصحف والميزان والانكال في يومٍ يـروع
والعمر مهما طال حبل العمر لا بـد أنقطـاع=وأليا ذكرت اللي مضالي كنه أقصر من سبوع
يارب زدني خوف وأيمان وتأمّـل واقتنـاع=ونـور وهـدايه منك وأسكـنّي ملذات الخـشوع
وزدني يقين ومتع اسماعي بحسن الاستمـاع=يالله ولا تجعل عيوني منك تبخـل بالدمـوع
النفس أمّاره وانا والسوء في حرب وصـراع=والفاتنه تلعب على عيني مثل لعـب الفـروع