يا اهل النفود اللي شمالي زرودي = بالله ماشفتوا مع اللغف مظهور
مظهور بدوٍ قاطعين النفودي =صوب الشمال بوجهة الجدي وحدور
مع طلعة النجمه يطيح العمودي = والبيت يطوا واول الزمل مقهور
وشالوا وحالو والضعن مايعودي =مغير آواسي عنهم القلب ماجور
فوق الجمال محجلات العضودي =من فوقهم شالو قبل فجت النور
واشمل سلفهم لـ الضعاين يقودي = قاد السلف قدامهم كل منعور
وتبرالهم قطعان وضحن وسودي =اليا اقفا الطياح واقبلت كنها القور
مثل الغيوم اللي قفتها الرعودي =مزنٍ تردم من مناشيه مزبور
يتلون شقحٍ ينطحن السنودي =حما الشعاف متعبت كل مصطور
تقطع رهاريه السهل والحيودي = مع دربهم سرحان جايع ومخطور
لو تسئله قال بادت ازنودي =ماتشوفني مع دربهم تقل مسعور
والجوع طاويني حياتي نكودي = بسبابهم هلكان ماني ابمسرور
شدوا لعشبٍ فايحن بالورودي =وسمن بكور بوسط الوقت ممطور
الصبح طل القبس فوقه يزودي =والعصر نواره مثل شعت النور
شقاي فيهم والقصايد شهودي =عز الله اني في غلا البدو مجبور
بدوٍ غلاهم مال وصفه حدودي =ماطيع فيهم لانصيحه ولاشور
سكن غلاهم في مكامن خلودي =واحبهم من دافع احساس وشعور
اهل المكارم طيبين الجدودي =اللي مكارمهم لها اعلام وجذور
ومضايفن لضيف دايم تجودي =على الرخا ولا بلجداب وعسور
نوادرن ورجال مثل الفهودي =وكلن على طيبه بالافعال مخبور
فهود الزراج وباتعين الورودي=كواسرن واحرار من ماكر اصقور
اهل المهار وناطحين الجرودي =اللي مع الغبشه لها جرود وسبور
منهم خذن قلبي عماهيج خودي =عفايفن ماضاحكن كل مثبور
بيض العذارى ناعمات الخدودي =قلبي معاهن صار مبلي ومسحور
ومن لامني بصغيرات **=لاكاسبن حسنه ولاهو بمعذور
يلومني فيهم قضيف البنودي =اللي حياته في مناقيد وغرور
عنهن حدوني ميبسين الكبودي =وراحت ضلوع القلب فتحات وجحور
يقطعك يالحظ التعيس اللدودي = اللي على راعيه جاير وعاثور
باح العزا مني وباحت سدودي =يامن يقول انته مبايح ومعذور
عنهم بعيد ومحكماتن قيودي =ولاحدن يساعدني على الراي والشور
وجدي عليهم كل مقبل وجودي =وجود من حول ورا الفطر الخور
اللي يفك الجاذيه والحرودي =مصطور مايقبل على حالة الجور
حول عليه مغربلن مايحودي =من فوق قبن عرفها تقل صاطور
صفرا مناخرها تقل خشم جودي=وصالي مناخرها تقل نار دافور
اليا ارخا مصارعها الطلب مايكودي=وكنه يلاكشها مع الرفغ دبور
واستفرده شبلٍ شجاعٍ زهودي = قدام من تلبس خلاخيل وخصور
قدام عينه كشفت بالجعودي =ونسا الحياة وجاب ماكان مذخور
وتناوله في راس رمحن سرودي= بمشنشلن صكه على مشة الزور
وتمت وضاعت بالتماني جهودي =وارجي عسى حقي من البيض مستور