هذا الزمان اللي كثيـره بلاويـه=اللي به المعروف يطلع جريمـه
ليـا زارك اللـي زاوي الوقت زاويـه=عليه من غبر الليالـي وسيمـه
ياصلك في بيتك يبوسٍٍ لواحيـه=الين عظامه من نقيض الجميمه
يبيـك تقضـي له لـزومٍ موازيـه=موقف عليه اللي يتل الشكيمـه
وطلبت عون اللي نخافه ونرجيه=رحمن رجوى مد غيره هزيمـه
وفضيت جيبك ماليٍ له مخابيـه=شيمة عرب مانته مدور غنيمه
علي اللزوم اللي يخصك مبديـه=فل الحجاج وذب ذيك الخريمه
واليا خذيت سنين وانته تراجيه=ماجاك جيته والجوارح سليمـه
عنيت يمه مستحي حاسبٍ فيـه=لكن ماعند اسود الوجه شيمـه
اليا سمعك بطيب اسمه تناديـه=جابهك بالعليا ورمحـه وريمـه
كنك تبـي تبـلاه والله معافيـه=لكن ماتمشـي عليـه الظليمـه
يصيح ويحط الشواهـد بذانيـه=والله ذكر في سيـرةٍ مستقيمـه
من زل حرف من الشريعه مخليه=علي هذاك الحرف عض النديمه
تاره تقول ان الخطا صاب راميه=وتاره تقول الطيب باس وعزيمه
وجه الندا مايقدر العذر راعيـه=واردها لاهل العقـول الفهيمـه
اللي يعرفون الندا كيـف ناديـه=ويقدرون لطقـة البـاب قيمـه
اقولها من هاجسٍ مانيب كاميـه=صبرت لين انه طرحني هشيمه
عمري يردن الثلاثيـن ماضيـه=شاركت ابو تسعين قومه وسيمه