في جيبي العلوي قلم بأربعه ريال=وأخطّ به مالا يخطّه (ديورك)
هذي علومك،، كلها عوج وهزال=اسمعني، اللــه لايجبّر كسـورك
فرحان تشري بـ(ألف وشويه)نعال=تمشي بك دروب المذله بـ شورك
ومفصّل بـ (حول الثلاثميه)عقال=وتحته عقل فارغ سوى مـن غرورك
يا تافه .. ارخ السمع للي بينقال=وتراه ماهو مـن دواعي سرورك
اللبس ماعمره ستر عيب رجّال=هذا انت ماتستر خَواك بـ قشورك
ومادامك تقيس الأوادم بالأشكال=عندي تساوت غيبتك مع حضورك
رح خاو من مثلك أشبه بـ تمثال=يرضي برستيجك ويسعد شعورك
ما اتشرف بمعرفتك ولا انت فـ البال=ولا عاد أشوفك عندي ولا بزورك
مغنيني اللـه عنك برجالٍ ثقال=مافيهم اللي حب تمثيل دورك
أقلّهم لو شاف تقصير وإهمال=يسد نقصك ما يدوّر قصورك