جاني واحد قال : بسأل كم سؤال=وقبل يسأل قلت : أنا ماني خبير
قال: جاوب بس , يا ولد الحلال=وكل كلمه حِطَّهَا .. في بيت صغير
قال نبدى : شنهو تعريف المُحال؟قلت=خَل الكلمه فـ الشطر الأخيـر
القهر : إن شفت دمعـات الرجال=والوطن : إنسان مِتغيِّر كثير
والطفل : لعبه على شاطـي الرمال=والأمل : إحساس في عين الضرير
الوفا : [ قلبين ] .. يجمَعهُم حلال=والرَجُل : اللـي علـى أهلـه يغير
والرجا : لا قلت : للواطـي تعال=والفشل : مدري .. ولكنـه مرير
الشعر : في وقتنا .. بدر وطلال=وكان أوَّل : حيـل يعجبنـي جرير
والغلا : إحساس إلى حَـد الخيال=والعِشِق : لا شفت مَعشُوقِك تطير
والجفا : إعكس مفاهيم / الوصال=والوَصِل : يعنـي تأكَّـد فيك خير
والعقل : تِسْفَـه أقاويـل الجهال=والجهل : إن قلت عن نفسك كبير
والخطر : لا صار ما عندك مجال=والبلا : إن صرت معدوم الضمير
والعجب : لا صرت تسأل منهو قال=والتعب : إن كنت تِبْحَثْ عن مصير
الغنى : بالنفس ما هو راس مال=والفقر : من كان .. بأعماله فقير
وهذا تعريفي إلى كلمة : مُحَال=شي ودِّك فيه ولا يمكن يصير