عـزالله أن الضيـق يذكرنـي بخـيـر=ما غبت عـن بالـه وطريـاه مـرّه
كل ليلة ٍ يلفي وضمن المساييـر=لو كان ما لي منـه يـا كـود شـرّه
آقـدره واروح مـعـه بمشـاويـر=أبعـد مـن حـدود الفضـا والمـجـرّه
واغيب فهمومي ومن دون تفسيـر=أصحى على دمعه وغصه وحرّه
شف كيف دمعـي حررتـه المقاديـر=من عقب مـا كـان بعيونـي مقـرّه
وشف كيف في صدري قصيد وتعابير=ولا أقدر آقوله لك ولا أقدر أجرّه
وشف كيف نيرانك بقلبـي مساعيـر=تكرّهـا ذكـراك حلـوه ومــرّه
بالرغم مـن هـذا يـا سيـد الغناديـر=طـريـاك فــي قلـبـي ولله درّه
لو غبت ما غابت طواريك بالخير=وصورتـك داخـل خافقـي مستـقـرّه
ولا أنت مـا لـك يـا حبيبـي معاذيـر=ومن ضيقتي مـا شلـت مثقـال ذرّه
ودايـم علـى ذكـراي تحتـاج تذكيـر=وما لي على رملـة طواريـك جـرّه
لو كنت تقطـع كـل حبـال التفاكيـر=ما شفتني بيـن الحـزن والمضـرّه
اللـي بقولـه لـك ومـن دون تفكيـر=فـي خافقـك كـرره مليـون مـرّه
ان غبت في وقت القسـا والمعاسيـر=مابي حضـورك فالرخــا والمسـرّه