مالوم يانفس عن الزاد معطاه=والماء مايبرد لهبها بروده
لين انحلت بالحال والجسم يبراه=والقلب شبت به سعاير وقوده
بالصدر اكنه كنة الضرم مخزاه=ساعة ويشرب له ولزما يعوده
لو ان جرحي ينكمي كان أبكماه=لاشك بي شي على الله ركوده
اصبر مادام انا اقدر الصبر وقواه=ولا ينقوي صبر تعدى حدوده
صبر الهوان إلى تذكرت فرقاه=ولا خبر للفرقا حتن تعدى حدوده
وين انت ياللي توصل الخط ملفاه=فيحان شوق اللي تنقض جعوده
عوق الخصيم وستر من تذهل غطاه=لاهج من عج السبايا قعوده
ولا يسند الا مروى حد شلفاه=يمنى على نثر الدمي محموده
زين الحصان الى أرتخى سير علباه=يثني وراه ويحتمي كل عوده
من راعي السابق الى شاف مدلاه = اللي عدايلها مجاميع ذوده
كن السبايا يوم توحي مثاراه = صيد من الرامي تقافى جهوده
قل ياسعد من جاه مابه مناجاه = بديت لك سدي كما أنك سنوده
الحب يوم انك مقره ومرساه = وقلبك مداهيله ومركز بنوده
راعيه مايبدي على الناس عجفاه = يكماه لين انه برى الحب عوده
لاهنت ردلي الخبر عن سجاياه = حيث انك الباخص بهونه وكوده
عن حال مشعوف نقل داه برداه = يبغى الدواء والدا خطير بزوده
ياتل قلبي تلتين من اقصاه = تل الوراد اللي حيام وروده
يم الطوال اللي عدوده مطواه = يروع جذابه مجاذب عدوده
على قعود مايسانع بممشاه = مستصعب مايتبع اللي يقوده
لاقال ياراع الجمل زاد بخطاه = اما انقطع ولا تصرم عموده
على الذى بيني وبينه مساداه = لاهو برايدني ولا أحرزت اروده
ماغير يرعاني بعينه وانا ارعاه = والكل منا مايبين سدوده
ليته الى كزيت له خط يقراه = ايضا ويعطيني حرايض ردوده
لاشك من دونه نواطير وعداه = اللي من اقصى الخلق ولا جنوده
كثر النمايم سببت قصرة اخطاه = واللي صفالي في ليالي سعوده
لاساعفت راع النمايم بدنياه = لعل حاله تنقرض ماتعوده
يا أهل النمايم من عمل عمل يلقاه = في ماقف يوم الجوارح شهوده
لو طال ياسه ماهقيت أني انساه = اذكر تعاجيبه ولجلاج سوده
من ذاق حب السلهمه ماتناساه = من الكبر يدبح وهو له طروده
شرهه يدي ماكل عود تعصاه = ولاهي على عوج العصي محدوده
المطرق اللي يبتغى وين أبلقاه = عيني لها طفحه ونفسي شروده
أزوال واجد مير ماهيب مشهاه = النفس ياقف له عياف يذوده
الشاهد الله ماتغاليت مشراه = لاشك وقف السبب عن وجوده
ماصار من بيني وبينه مناباه = ماحسف الخاطر توقف وروده
ونا ومثلي بينات هواياه = غير الضمان اللي تبعث لهوده
هذا مضى والخاتمه عند مولاه = ولا شي يصير الا بحكمة وجوده