عشقت القمر حيث القمر ينبعث به نور=واخص الليالي البيض تزها ويزهنــه
واحب الهوى ليهب من خايع(ن) ممطور=وريح النفل حيث النفل طيب الخنـه
واحب الجماله والجماله عمل مبرور=واحب الغنا واعز نفسي عن المنـــــــه
واحب الصراحه والصراحه بها مسرور=حيث الصراحه تقطع الشك والظنــــــه
واحب الكريم اللي يفرج عن المعسور=إليا من عطا حتى لهل مادرو عنـــــه
واحب الرجال العارفه واكره المغرور=من اغتر في بعض المظاهر يغرنـــــه
سقى الله ليالي ماضيه قبل هدم السور=نحفر العدود ونشرب الماء من الشنه
نشوف البنات إليا وردن كنهن الحور=مهارن مشاويل(ن) بالعياد معتنـــــــه
على الماء تشوف بيوتهم كنهم القور=كثير القبايل تقطن العـــد بالكنـــــــه
علــى البـال ذكراها ياليت الليالــي تدور=ياليت الليالي ماخذنه يجيبنـــــه
تذكــرت شيبان(ن) لنا يـــوم حنا بزور=يحثوننا بالطيب والفـــرض والسنـــــه
وعاشو حيات(ن) قاسيه في بحر وبرور=عسى الله يعوضهم بمى فات بالجنه
ودورن مضــــى بينهم وين ذاك الدور=زمان(ن) مضى له ذكريات(ن) يحلنــــــه
يوم(ن) الذهب مايلبسونه بدون خصور=جمال النساء ماهو من السوق يشرنـه
فقدنا حيات البدو مع شوفت المضهور=ولا عاد به بدو ولا الطرش له حنـــــــه