اصعب سؤال اللي جوابه للاسف مثله سؤال=ماهو تفلسف إلا موقف صار واسمع ثاني بيت
البارحه يومه سأل وش ذكرك ذيك الليال=كان الجواب بكل بساطه: من متى اصلا نسيت
أدري بإن جمع الصعوبه والبساطه شي خيال=لكنها صارت كذا واللي اهم اني دريت
إن الحياه بفقد احبابك إذا جف الوصال=تعيشها لوتقتنع إنك خلاص اصبحت ميت
ياصاحبي لوكل شي يمر بالخاطر يقال=ماكانت العبره تولجني إلا منك طريت
شفني قدرت احبس دموعي بس دمع القاف سال=وياكبرها ساكت ولكن داخل اوراقي بكيت
الحال في بعدك قسم بالله ماسميه حال=انوي على الضحكه واحس كلي خطا لأني نويت
تصور اني من رحلت اشوفك لجسمي ظلال=لاشفته امشي ببتعد وأثره معي مهما مشيت
مدام يعني في بحرك لفرحتي مليون جال=وش فيه موجك ماركد قربت اموت ومارسيت
يرضيك ماعادت معي تفرق إذا جالك مجال=لأني اقتنعت انك نهايه واني ببطي مابديت
صرت اعقد حجاجي إذا جابوك باطراف الجدال=وانا قبل لاجابوا اسمك كني ميت ثم حييت
تعبت اعيش الدور وافتح للمعاذير الخيال=واتخيل إني جيت في بالك وبأنك استحيت
وترد لي كلك وله وتقول: كن البعد طال=ومن الفرح ماعاتبك واقول ياخي مابغيت
حتى وانا اتخيل نظرتك لأن قلبي لايزال=يكرر اسمك داخل اعماقي بنبضه لاسهيت
قلي شسوي فيك وانت بداخلي اصدق مثال=للحب واحساس القصيد إن عانق الليل وسريت
ربي يصبرني على الفرقى مدام الحظ مال=وانت بيجي لك يوم تعرف في بعدك كم شكيت
وإذا بلاك الله وعذبك اشتياقك بس تعال=واقرا القصايد في غيابك كل ابوها بيت بيت
وبتدري إن اصعب سؤال اللي بيجي رده سؤال=لاقلت لي وش ذكرك؟ ثم قلتلك متى نسيت