الشوق نبّت في خفـا الصـدر ياشـوق=ياواصـلٍ بـي فـــــ . المـنـى منتهـاهـا
يا اعذب من الفجر النّدي حـزّة شـروق=واندى مـن الديمـة ليـا هـلّ ماهـا
وين انت باب الوصل موصد ومغلـوق=يوميـن ياطـول الغـيـاب بمـداهـا
مرّت وغيـم لقـاك ماهـزّه بـروق=واستوحشـت دار الـغـلا ياغـلاهـا
تعال شف ماي الولـه يجـرح المـوق=من فيض نجـلا مـا منعهـا حياهـا
شف غيبتك وشلون جفّت لهـا حلـوق=لاصارت عروقـي ظمـا وش رواهـا
غدّار وصلك والمشاعر لـه تّـوق=استجمعت بي واشعلت بـي لظاهـا
وتقول روقي كيف بالله بـاروق =وعروق روحـي خاليـة مـن دماهـا
ماظلّ بـي الا عـرق بالبعـد مفتـوق=يشكي لـك الغيبـة ويشكـي دهاهـا
تعال خصـر الحـرف ماهـزّ منطـوق=ولا ضحك في عيـن وصلـك رضاهـا
تعال شف بي طفـل بالمهـد مخنـوق=بالذكريـات اللـي تـوسّـد جـداهـا
تعال فرّع بـي غيابـك وانـا اسـوق=للقـاك روحٍ معلنـة لـك ولاهــا
تظماك وآنا اظماك وان قلـت معتـوق=من صدر شوقي شـحّ عنـي عطاهـا
يـا مبتعـد والقلـب بيديـك مسـروق=خذنـي معـه ودّي عليـه آتباهـا
ودّي غروري يلمحه كـلّ مخلـوق=بك - فـــ.العيون اللي رضاهم بكاها
ويصيح يلعن جدّه الشوق ياشـوق=يلعـن أبـو الغيبـة وتـبّـت يـداهـا