أنا اقول ياستار فات أول الليل=تعدى أوله ماباقــــي إلا قليله
ترى الليل مايصلح بليا تعاليل=تعاليل يبرن القلوب الغليلة
أنا اللي جرى لي في حياتي غرابيل=غرابيل يدعن الــــدقاقة جليلـــة
ألا ياعيوني هلي الدمع بالحيل=عليك القصيره ياعيوني طويلة
ألا واعناي من الليالي المقابيل=ليالٍ على الحمى تزيد المليـلة
ليالٍ تبدل للمحـــبين تبديـــل=تجيب التفرق للخليل وخليله
هواي كليف ولاتجيها المراسيل=نحاني زماني عن وليفي بحيله
خذا القلب واودعني سواة المهابيل=حسين النبا اللي نافل كــــل جيله
ملكني هوى راعي العيون المضاليل=وأنا من قبيله والغضي من قبيله
عليها عيون كان فيها سمـاليل=ولا لي صديق قال واعزتيـــله
له أرفع بصوتي وألحق الويل بالويل=ترى المــوت زين ولا الحياة الذليلة
نويت السفر يالله عليك التساهيل=ابمشي وحالي من فراقه عليله
أنا أسهر وحالي كل يوم بتنزيل=وهو مثل وصف القايده للجميله