مجالس الفرده - احترمته مير اشوف احترامي له مذمه

مجالس الفرده (http://www.alfredah.net/forum/)

- مجلس فضاء الشعر (http://www.alfredah.net/forum/alfredah4/)

- - احترمته مير اشوف احترامي له مذمه (http://www.alfredah.net/forum/threads/alfredah27939/)

احترمته مير اشوف احترامي له مذمه

والله اني لجرح القـاف ليـن يسيـل دمـه=واتعبـث فـي معانـيـه وابـيّـح كنيـنـه
واجمعه .. وافرقه نرفـزه ..وارجـع والمـه=لين يهدى من عناده.. ويبـدي لـي حنينـه
لو زعل مني وضيقت صـدر ابـوه.. وامـه=والله انـي ماتركـه دام ماكحـلـت عيـنـه
وان زعل مني.. ومن سيرتي.. وانا ابن عمه=ليه مايزعـل مـن انصافـي اللـي مبتلينـه
آآآآخر صفوف اهل الشعر.. صارو ا فيه أئمه=لعن ابو شعرٍ بسط لابسـط اصحابـه يدينـه
الشعـر نـزل عباتـه.. وشلفـاه.. ومعمـه=شوف حتى الشعر.. كيف اثرت فيه المدينـه
صار سهل .. وكل من وده يخمـه.. يخمـه=بعـد كانـت هيبتـه هيبـة الليـث بعرينـه
ودام كل انسان يارد .. ويشرب مـن مجمـه=يتحمـل موقفـي ضــده.. الله لايهيـنـه
لايقول انه بحر صعـب.. وانـي مـا أهمـه=البحر ياما هرب مـاه عـن وجـه السفينـه
احترمته.. مير شفت احترامـي لـه مذمـه=يوم مايلقـي لـي البـال وش بينـي وبينـه
لامتى استحمل عناده.. وانا بالجوف اضمـه=ولامتـى وانـا اترجـاه.. واقبـل جبيـنـه
لي عليه انـه يجينـي لامنـي جيـت يمـه=كل ماطلـب منـه فزعـه يناولنـي يمينـه
وله علي انـي لاعانـق بحرفـه كـل قمـه=ما اذبح من افكاري لخاطـره غيـر السمينـه

لافي الغيداني