وُقفت بالغرفة على سبة الدين =وكم واحد طلابته ساجنينه
قد وقفت به ناس للطيب ضارين=تحملت قبلي مبالغ ثمينة
أحد عليه مئات وأحد ملايين=ومن طاب حظه .. خلـّـص الله دينه
أما العفون أموالها للشياطين=إليا بغى يعطي العطى ماسكينه
ملابسه شينة وراعي الردى شين=والعفن مهما كان طياح شينه
ولا له وجاه مع الرجال الصخيين=كل أهل العزاة .. متجنبينه
ومن شاف زولة قال ما تشوفك العين=يا علّ مالك وسط الأجواد عينه
ومادام يقوى يصبر على العسر واللين=قومي بحزنك يا النفوس الحزينة
وإليا انتهى صبري وحزّنت تحزين=الرب .. رزق الآدمي في يدينه
لكن لي شرهة على (ناس شرهين )=مافات غير الطيب بيني وبينه
حيين لكن مير ماتقل حيين=صدّوا .. وسجني كلهم خابرينه
وأهل الوفاء جوني من البعد عانين=ومن زارني حبيت خشمه وعينه
أما أهل الترمس مع أهل البسيتين=مافيهم اللي صافحتني يمينه
دارين عني مير ما تقل دارين=حطوا بأذن طينة والأخرى عجينة
وأنا لو أسمع عن حديهم خبر شين=لو هو على رجليّ ..جيته بـ حينه
لو هو ورى شط البحر من ورى الصين=إن طرت له وإلا ركبت السفينة
وأثر ماني غالي مثل ماهم غالين=وأنا أحسب إني زين مع ناس زينة