صاحبي والورد تاليه الذبول=والحياه اتْغرّ مِن يسعالها
عمرها ينقص ولو شفته يطول=وهذي الدنيا وهذا حالها
والحوادث تَذْكِره لاهْل العقول=بس من فينا يبا يصحالها
وشفت وعيوني يحاصرها الذهول=وحالتي في وقتها يرثالها
ديرةٍ كانت تعيش احلى الفصول=مزْهره شطآنها ورمالها
وحاصرت شامخ مبانيها السيول=لين فكّت بالحصار اقفالها
وادْخَلَت مع كل منفذ للدخول=واغْرقت شيبانها واطفالها
ومن طلع ماعاد يطمع بالنزول=دونه ابْحورٍ تلاطم جالها
أغْلقت كل المنافذ للوصول=ولاعْترضها حاجةٍ تشتالها
والشوارع منها تملاها الوحول=وكل فرحه عابره تغتالها
قوّة المولى وحنّا مانقول=غير: يامرسي شموخ جبالها
ارْحمِ عْبادك وجنّبنا السيول=لالْتِطَم فوق البسيطه جالها
واغْفرِلْنا لاغشى العمْر الذبول=وغرّت الأحلام من يسعالها