قول عادي بالي الليله طويل=شوف لك عذر قديم واقبله
لاتحاتي قلبي متعود يشيل=الجروح اللي تجي له مقبله
طيبتي صارت مثل كف البخيل=اي شي طايح تشوفه تحمله
وموغريبه اني الليله عليل=الحزن يحسبني واحد من هله
وموغريبه لوتمنيت الرحيل=البقاء احيان يعني البهذله
في غيابك مال هالضيقه مثيل=وربي اللي مايشاءه يفعله
من يلاقي بدنيتي هاذي بديل=خل يجيني اي شخص ابدله
وعيب راسي لابغى شي مستحيل=يوصله مو طيب غصبن يوصله
ليه راجع ليه ذاكر يالاصيل=انت ضايق في خطأ في المسأله
ليه تبكي من كلامي يالدخيل=المشاعر مالها بقلبك صله
والبلى ان حب رجال ثقيل=ينسى من حوله ويسمع مذهله
ومن عرفتك حظي العاثر يميل=اعترفلك اني عاجز أعدله
فاقد الاحساس مايعطي القليل=وان عطيته احساس قلبك يقتله
ايه ابرحل والطريق ادري طويل=مشكله قربك وبعدك مشكله
وان خذاني الموت اترك قال وقيل=قول هالجمله وخطاك محلله
ربي الهم اهله الصبر الجميل=وارحمه يارب واحسن مدخله