حي الله اللي مواقفهـم تشرفنـي=قاموا معي بالكويت وبالسعوديـه
رجال ٍ على ما جرى ليّه تناصفني=بالطيب والمجد والحاجات مقضيّـه
بالمال والحال والفزعات تسعفنـي=حتى تشافيت عقب جروحي النيـه
يوم ان كـلٍ يصـد ولا يسلفنـي=والشرهه اللي من الخلان منسيـه
ويقول ماله معـاش ولا يخلصنـي=يعل ماله مـع الاجـواد شرعيـه
بعض القرايب تقل ماكن يعرفنـي=نسى الجمايل ورد الفعـل عكسيـه
وقامت رجال ٍعلى الفزعات تتحفني=قومت دهيمات والفزعات حربيـه
مبحل بـدا بالمكـارم ماتزلفنـي=وخلف ولد مبحل الضرغام مركيـه
والله والله لـو انــك محلفـنـي=لاقول محد ٍسبقهـم بالفـزع ليـه
ومحمد الغتر مع ربعـه يرافقنـي=عليهم البيض والحسنات مضفيـه
لو قيل منهم لاقول العين والجفني=ربعي حزامي هل الوقفات بالهيـه
هم الدهيمات بالفزعات تنصفنـي=فزعاتهم بالعلـن ماهـي بمخفيـه
اهل مهارن تحد القـوم للحزنـي=شهب طلايع مرابط خيـل منقيـه
ليا جت كراديس مثل الغيم والمزني=تاريخ وافعال نـار تلتهـب حيـه
حذف الجنايز وراهم مالها دفنـي=بسيوف حدب بروس القوم مقديـه
فعل مضى بنجد والنسيان يوسفني=اشوفها بين بعض الناس منسيـه
واليوم ابذّكـر الهلبـاج والعفنـي=ان كان عنده من التاريـخ عقليـه
وجزا الوحيفه وابوعايد يلاطفنـي=وربعه معه كلهم مـن دون مثنيـه
لو طيبهم بالسهل تبحر به السفني=كل ٍ غرق فيه بالروحات والجيـه
بني علـي بالمكـارم ماتخالفنـي=الطيب من سآسهم مافيـه شكيـه
لا يابعد من يصد وتقـل سافهنـي=كل الدعابيـل بالاكـواخ مخفيـه
يصد عني وانا ادريبـه مخالفنـي=اهل وجيه ٍ تكالـح تقـل مشويـه
لعل ربي مـن الرديـان ينصفنـي=وجيه ٍ قبيحه وبالزرنيـخ مطليـه