اخواني اليكم هذي القصيدة للشاعر راشد عبدالهادي ال حميداني المري
يثني فيها على عبدالله بن ضعيان البيضاني وعلى حرب كافة
واقول من هذا الموقع بيض الله وجه ابن ضعيان وشرواه اللي
يجيب الزينه للقبيلة حيث تبقى من معلقات المجد لقبيلة حرب

مبداي باسم اللي ضمن رزق الانسان=متكفـل بـارزاق كــل البـريـه
من يرتجي مـولاه فائـز وربحـان=مخازنـه مـن كـل خيـر ملـيـه
اعوذ به والـوذ بـه سـر وعـلان=علـى وعـده صبـاح وعشـيـه
وخلاف ذا فكـري بلمثـال شفقـان=يـوم ادري انـه جالهـا قابيـلـه
الشعر لـه حـزه ومـزه وميـزان=وان ماأنفتح له بـاب مالـه دعيـه
وذا الليل له معنـا ومغنـا وبيبـان=ذل الليـل تنظيمـه لـزوم علـيـه
كله لعين ٍ عالـي القـدر والشـان=والله ثــم والله يـلـزم مجـيـه
الاحسان ماهو ينجازى الابالاحسـان=هـذا كــلام الله وسـنـة نبـيـه
والله ثـم والله لـوكـان بعـمـان=لاجيـه لوماجـات منـه وصـيـه
(ابوفهد قـدره مثـل قـدر شيخـان=وهو والله انه شيـخ ذرب السجيـه
ابو فهد قدره علـى روس وامتـان=وعن ال مـره جيـت لـه بالتحيـه
عن ال مره مـن شبـاب وشيبـان=نرفـع تهانينـا مــع المقـدريـه
نرفـع تهانينـا بصـدق ونصحـان=لبـو فهـد راع العلـوم الطـريـه
ونيابـة عنـه تحيـه وعـرفـان=للحفـل اقدمهـا تحـيـه هـديـه
جميع من هو شرف الحفـل لاهـان=شـوف النشامـا يرفـع المعنويـه
يامرحبـا ماسلبـت دهـم الامـزان=براقهـا تسفـر بــه الخدلسـيـه
يامرحبا مامـال عـود بالاغصـان=واعـداد ماغنـت بـه الراعبـيـه
يامرحباماشيـف نجـم ومـا بـان=واعـداد ماهبـت هبـوب عـذيـه
ترحيب بالحضـار ذربيـن الايمـان=مقسـم مـن بينـهـم بالسـويـه
وماقدر اقول فلان واسمـي فـلان=ذا الليـل شوفتهـم لنـا مكرميـه
وانا ماأعداني من حسـاب ضيفـان=اخ لعـبـد الله ولاهــي زريــه
وكل ال مره له بني عـم واخـوان=عهـد علينـا والليـالـي مـديـه
ونقول للحاضر ترى أبـن ضعيـان=هو والله اللـي مايعومـس خويـه
في مدح أبن ضعيان للمدح برهـان=ومدح على برهـان حيـك وحيـه
في مدح أبن ضعيان ماني بغلطـان=لاواللـذي يعلـم جميـع الخفـيـه
عبد الله بن ضعيان فيه المـدح زان=يزين مدحـه يـوم جـا مطرويـه
ميزان عبد الله من المـدح مليـان=أبوفهـد واسمـه حريـب الرديـه
من طيب ابن ضعيان ماشيف زعلان=لوكان تاتـي مـن خويـه خطيـه
الفوج كلـه شاهـد لـه كحيـلان=الفوج يشهـد لـه سريـه سريـه
عبد الله علومه جزيـلات وسمـان=بشوش خلق وفـي دماغـه حميـه
يستاهل التمجيـد فـي كـل ديـوان=وترفع له البيضـاء بـراس البنيـه
ولاهي بتستغـرب مراجـل بليهـان=طيبه وجوداتـه علـى راس خيـه
متسلسل بالمجد من ساس وجـدان=جـده هـو ضعيـان زبـن الونيـه
جده هو ضعيان في يـوم الاكـوان=يعرف اللي ركبـوا عليهـا غزيـه
مواقف ضعيان فـي زوغ الاذهـان=علـى الهجـن والابنـات العبـيـه
ومواقف البيضان تعـرف بالازمـان=ومن يجهل البيضـان مالـه دريـه
عوايـد البيضـان بوجيـه بيضـان=بيض الوجيه بكـل ماقـف وهيـه
من لابةيكتـب بهـا بكـل ديـوان=سجل بهـا الـراوي وثايـق قويـه
قبيلة مـن حـد عرعـر لنجـران=هل سمعـة بيضـاء بكـل النحيـه
حرب لهم بالمجد والمـدح عنـوان=تاريخهم مـن عـاد بقعـاء صبيـه
حرب هل الجودات في كل مـا كـان=بيت النداء اللي ماقصـر ظـل فيـه
حرب هل الطولات كرمـان كرمـان=كرمان من عـاد المعوشـه قديـه
حرب هل الفزعـات لاثـار دخـان=لاجاء نهـار الهـوش والمكرهيـه
حرب الـى ركبـو الخيـل فرسـان=هل سريـه يـوم الملاقـى قويـه
حرب اليا من رقـص كـل شيطـان=خيالهـم يـارد حيـاض المنـيـه
حرب الليامن حاربـو سـم ثعبـان=حريبهـم يبطـي عيونـه شقـيـه
حرب اليامن عطـوا عهـد وايمـان=ماينقضـون اعهودهـم الاولـيـه
حرب اليامن صاحبوا عون واعـوان=صديقهـم يمـرح اعيونـه هنـيـه
حرب لهم شيمـه وقيمـه ومزبـان=زبينهـم ماعـاد حـولـه دعـيـه
حرب لهم سيـره وجيـره وجيـران=ماجارهم ينـزل بـالارض الوطيـه
حرب الا من جاهم الضيف عجـلان=يبطي وهـو كنـه بوجبـة ضحيـه
ولارد في باقـي القبايـل ابنقصـان=الطيـب قسـم بيـن كـل اللقـيـه
ومن يفعل المعروف ماهو بخسـران=لخاسـر الـلـي نيـتـه قلبـيـه
الله يعز الديـن فـي كـل الاوطـان=والله يخـذل الكافـريـن العصـيـه
والله لايفرح مـن النـاس شمتـان=الشامـت اللـي نيـتـه شقلبـيـه
والله لايثـري ثـراء كـل خــوان=الخايـن الـي زاد شـره وغـيـه
حنـا بنعمـه مالهـا والله اثـمـان=امـن وامـان وكـل ديـره غنيـه
امن البلد لاجت مـع صحـة ابـدان=نعمـه كبيـره بالعقـول الذكـيـه
في ظـل حكـام ولوهـا بالايمـان=وقلوبهـم فيهـا لـنـا مرحمـيـه
خيالـة العوجـاء بنوهـا بالاتقـان=الشعـب مكـرم والبـلاد امحميـه
وخيالة العوجاء حمو حق الانسـان=ومن يدعي له حـق يرفـع شكيـه
والحق ياتي لـه براهيـن ولسـان=ولاهي تجي له جمهـره عنصريـه
قلته وأنا ماقول عـارف وفهمـان=كلـن علـى عرفـه يدلـي أدليـه
من حب ابن ضعيان ماقلـت تعبـان=راعي الحسانـي مايجـازى بسيَـه
أدعي له التوفيق ويعيـش فرحـان=أدعي له التوفيق وأرفـع أيـد يَـه
وختامها صلوا على نسـل عدنـان=عـداد ماهـي تكتـب الأبجـد يَـه

اخوي غازي عجاب
تسلم الاهنت على التنسيق
الراقي والمرتب
تمون ولاتهون

اخواني واحبابي
النمر الارقط
ابن مطيع
مبارك ناصر الحديد
ابو حمد
بيض الله وجيهكم وشكر الله سعيكم
ووفقكم المولى بتوفيقه الدايم
اشكركم جميعا جزيل الشكر على الاطلاع
تحيا تي للجميع

وجـــــــــــــهك ابيض يابو عمر
تســـــــــــــــــــلم ويســـــــلم ذوقك
شـــــــــــكرا