مجالس الفرده

مجالس الفرده (http://www.alfredah.net/forum/)
-   مجلس فضاء الشعر (http://www.alfredah.net/forum/alfredah4/)
-   -   من روائع بدر الحويفي.....بن مياس (http://www.alfredah.net/forum/threads/alfredah22043/)

نايف بن مياس.. 08-07-10 01:43 PM

من روائع بدر الحويفي.....بن مياس
 

الشاعر العلم / بدر بن عواد الحويفي عندما اقحطت الأرض
وانحبس المطر هاض بهذه القصيده تظرعا الى الله جل جلاله
ـــــــــــــــــــــــــــــــــــــــــــــــــــ

اللي فقدنا من نبات ونواوير =ماهو على المولى صعيب رجوعه

الله من قلب هجوسه طوابير =ميعادهن بين العتيم وهجوعه

قالوا تفكر قلت عندي تفاكير =أشوف شئ من خطانا وقوعه

قلت الحقيقة يالوجيه المسافير =قلبي ليان وشاف شئ يروعه

شفت الجفاف مكسر القشع تكسير = والنفس ماهي من قضاء الله جزوعه

وادي الرمة جوه عجاج ومعاصير =يبست جراجيبه وماتت قشوعه

حمضه عليه من السوافي عثامير =يا بعث الأموات تبعث جذوعه

مدهل مجاهيم تلاد ومغاتير =وحمر مرابيها هدايد افروعه

يوم الوسوم تنثر الوسم تنثير =والعشب ينبت ماتكامل اسبوعه

ويوم القلوب نظاف مايقف الخير =يطيح وسم ولا تقطع تبوعه

واليوم وبل الغيث مثل الطباشير =قامت تلوث بالمناقع انقوعه

الشكوى لله صار بالجو تغيير =دايم كتام وغير الجو نوعه

واصل الخطا منا تهاون وتقصير =قليل من يحسن لربه ركوعه

نشقى ورى الدنيا وهي مابها خير =والموت يدني للنفوس البشوعه

وعند المحاسب ماتفيد المعاذير =ينشف جما العاصي وتطفي شموعه

واللي غناته سحت وموال تزوير =له ساعة ماذاق حلوه يزوعه

يدري بها لودعوه الحفافير =والقبر ضكه مع محاني ضلوعه

في ساعة مابه تقدم وتأخير =يفقد بها الرحال مجلس ربوعه

وعن ماعمل ماله مفر ومعابير =ما ينفعه جمعه وهيبة جموعه

قدامه الجنة وقدمه زمهرير =والله يعلم وين يكتب نجوعه

يارب تهدينا على حسن تدبير =نطلب عظيم الشان خوفه وطوعه

يالله يارازق عوج المناقير =ياكافل رزق النفوس القنوعه

يامن بتقديره تكون المقادير =ياسمع الداعي وخالق سموعه

تزيل شدات السنين المعاسير =يامن لك المسلم يوجه خشوعه

تمدنا يارب رحمه وتيسير =غيث يعم المملكة في نفوعه

يارب من قل المطر نشفت البير =نشف الثرى والدرع ماتت زروعه

ومات الخشاش وضاق في عشه الطير =يشكي على رب السموات جوعه

والبل مصارفها نخاله مع شعير =واحوارها بالشبك تذرف دموعه

مثل السجين يلوح بين المواصير =والا البهايم للمقدر خضوعه

حاطت عليه اذنوب ناس مباصير =حاله صخيف وحنة أمه تلوعه

ذنب الأوادم له عواقب وتأثير =والعمر فترة والحياة مخدوعه

وحنا بشر مالله خلقنا تصاوير =واللي يخاف الله يطبق شروعه

والله محذرنا عن الكذب تحذير =والحسد والغيبة وكبر وميوعه

صح لساااااان ابو سلمان

ابـن مـطـيـع 08-07-10 02:36 PM

رد: من روائع بدر الحويفي.....بن مياس
 
تم تنسبق القصيدة
أشكرك أخي ابو شليوح على الطرح الرائع وصح السان الشاعر بدر وصح بدنك على الأختيااااار الجزل
انتظر جديدك بكل شوق

ابو عادل الفريدي 08-07-10 04:31 PM

رد: من روائع بدر الحويفي.....بن مياس
 
صح لسان الشاعر بدر الحويفي

نايف بن مياس.. 08-07-10 06:52 PM

رد: من روائع بدر الحويفي.....بن مياس
 
ابن مطيع
بيض الله وجهك على الكلام الطيب ومشكور على التنسيق

نايف بن مياس.. 08-07-10 06:53 PM

رد: من روائع بدر الحويفي.....بن مياس
 
اقتباس:

المشاركة الأصلية كتبت بواسطة ابو عادل الفريدي (المشاركة 158836)
صح لسان الشاعر بدر الحويفي

صح بدنك يالغالي

نايف بن مياس.. 08-07-10 06:56 PM

رد: من روائع بدر الحويفي.....بن مياس
 
الى مشرفنا الغالي اريد ان اضع موضوع باسم ديوان الشاعر بدر الحويفي يحتوي على اكثر من خمسين قصيده اذا تعدونني بتثبيت الموضوع للأبد اتمنى رد لاني من المعجبين والمتأثرين بشعر هذا البطل


الساعة الآن 12:37 PM

Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO TranZ By Almuhajir

Ads Management Version 3.0.1 by Saeed Al-Atwi

لتصفح الموقع بشكل جيد الرجاء استخدام الإصدارات الاخيرة من متصفحات IE, FireFox, Chrome

Security team

vEhdaa 1.1 by NLP ©2009


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52