مسموح يا زول مشيت متعدي = حط الذرى بيني وبينه عباته
دوبه بطرف العين يمي يلدي = يبي يسمّح خاطري بالتفاته
قلبي يبي شوفه وعيني تلدي= أخاف من هرجٍ يطوله شماته
أخاف من فطنه خطات متحدي = اللي على الغرات هذي سواته
ما ودّي إنه يكتشف غيب سدّي=خلّه يروح وعبرته في لهاته
لابد من يومٍ رخاه متمدي = يلحق به القلب المولع شفاته
يومٍ به الحسيد عنا تصدي = راعي الحسد عنا بعيدٍ مباته
جعله بدربه ذالفٍ ما يردي = احذف وراء الشيطان سبع حصواته
يا ناس بالله لا تصيرون ضدي =من لا هرج بالعدل يكفي سكاته
يا ناس مجروح الضمير المودي= خلوه يدله ساعةٍ في حياته
يا صاحبي ماهوب ودك وودي = لو ودّنا كلٍ تخيّر مناته
من دون جمعانا سلومٍ تلدي = تمنع شفوق القلب دون شهواته
دونك عدوٍ للحسد مستعدي = طعون قلبه بالحشا موجعاته
وإلا فلا غيرك حبيبٍ يسدّي = تكفيك ضيقة خاطري وانهتاته
حبك مقيم وحب غيرك يشدّي = هذا الكلام اللي صحيحٍ ثباته
سلطان حبك لو سيوفه تحدّي = جيته مطيعٍ لسياته واحسناته