أخوي طاب الكيف له والتعاليل = صدره وسيع ولا تجيه الهمومي
لوا هنيّه له شبوح ومراسيل = ونا اشبوحي ما تجيب العلومي
والبدو شالوا نوهوا بالمراحيل = وكل ركض للزمل شلاّه تومي
أحد يخم العلق يخطيه ويشيل = وأحد تقلل ما بقا له لزومي
وشالوا وقفن الضعاين زعاجيل = وشفوا وهفوا واتقوا بالحزومي
وأنا بمرقاب الشقا عيني إتخيل = في راس مرقاب ٍ طويل الرجومي
أخايل الأضعان واقفت مقابيل = إستقبلن اظعون زاه الرقومي
وايّست من دعّاج الاعيان بالميل = ولا لي على ناب الردايف سلومي
وا هجر قلبي كان هو طاول الطيل = عز الله إني مهجل كل يومي
إهجال من تاهت عن الذود بالليل = مابين سْرح لوارد الجو تومي
الولف بلوى به هبال وهرافيل = لولا الحيا راعيه يرمي الهدومي
يا لا يمي جعله بحسر وغرابيل = الله يبلا بالبلا من يلومي
عساه بالدنيا قليل المحاصيل = وبا لآخره يسقى حميم وسمومي
وجدي عليها وجد من له مراحيل = حيلٍ وخلفاتٍ تدوس الوسومي
وعشاير شقح تلاد ومخاليل = ومعهن على شقران فلوٍ قحومي
سبّرْ لعجمانٍ على كنسٍ حيل = شيب المتون عيونهن تقل لومي
كل أبلج ضارٍ لكسب التنافيل = ضرما يبون المال ما فيه لومي
وغارة عليه القوم خيل ورجاجيل = وطبّحْ على فلوٍ حشورٍ عزومي
واقفا يرادي به عن الخيل حلحيل = شذرٍ حذرْ تالي شيوخٍ اقرومي
واقفوا على ذوده عصاةٍ مشاكيل = وكلٍ على حقه شحوح بحومي
وصله وخلا العج مثل المخاييل = عج الرمك والبل مثل الغيومي
يبي يداري هرجة القول والقيل = أحضر حياه ولا بنفسه وهومي
وطبّــح له اللي ضاريٍ بالمحاويل = وثارة الى ان حذاه مثل النجومي
واقفا مذل مع دكاك الغراميل = يفرك يديه ومرْ كبده يزومي
عقب السعد والعز والبن والهيل = وكبشٍ مربينه لكل امحشومي
اليوم يسهر كل ما جرهد الليل = ودايم على غيضه صنوتٍ كضومي
هذا وجودي وجد من له مواحيل = من عقب ماهي ذود صارت اقسومي
أو وجد من صدّرْ على اربع محاحيل = لها إليا غاب الرقيب امعلومي
صدّرْ على اربع مايةٍ كلها كيل = حبٍ حمر تسقي نواحيه كومي
أربعْ عقايبها اربعٍ كنّسٍ حيل = يشيلن الما في وساع الكمومي
يوم استتم الزرع شال النما شيل = نشتْ بردها كبر روس البهومي
وهلّلت على وسط المفالي هماليل = وصارة على روس النواحي رجومي
واللي بقا من حبها شاله السيل = غثو السبل بالسيل مثل الهدومي
واصبح يصيح ويزعج الويل بالويل = عن نول ما جابت يديه امحرومي
الله يكفينا شرور المخاييل = إلا عطا الرحمه كما انه رحومي
ما قلتها باللي تعرف التهاويل = ولاهي من اللي يجمعن العلومي

وشكرا صقر ,,,

الولف بلوى به هبال وهرافيل = لولا الحيا راعيه يرمي الهدومي