المصيبه ماتت الغيـره وصـار الـدمّ بـارد=وأنشغلنا في سبيل المال وأعمتنا الحضاره!!
لين صرنا نجلب السواق لوهو مـن عطـارد=من ترفنا ماندقق فـي عمـاره مـن دمـاره
المهم نجهّز اللـي مـن وكيـل الزيـن وارد=نعتني في موتره ونسكّنـه صـدر العمـاره
وأن تعلم صار مسـؤل المصـادر والمـوارد=وأستلـم كـل الشئـون العائلـيـه والإداره
والثقه متباينه وخليـف فـي دنيـاه شـارد=من عماة الراي والتفكير يحسبهـا شطـاره=
ما درا إنه ضاع راس المال في طرد الشوارد=والخساره في الشرف والدين ياكبر الخسـاره
عقب ما سلّم جواهره الثمينـه فإيـد مـارد=ويش يرجي من حياةٍ ضايعٍ فيهـا اعتبـاره
الشبح في البيت ماله لا مجيـر ولا مطـارد=والبلاء في المدرسه والسوق والمقصود شاره
واعذابـي كلمـا مريتهـا والشـوف جـارد=كل مضبوطٍ جديد والدريـول فـي الغمـاره
أمـرد مربـوع كنهـم ناحتينـه بالمبـارد=والشعر مفلول والسلسـال ويمـز الزقـاره
كل جنس وكل لون وكل شكل مـن النمـارد=تنتظر فلذاتنا وأعراضنـا فـي كـل حـاره
ليه صرنا فالأيادي السافلـه مثـل المفـارد؟=ليه ياحفاد الصحابـه والمشايـخ والامـاره!
ليه يجري دمّنـا بعروقنـا مثـل البـوارد ؟=عقب ما كانت تقادح روسنـا عـز ونعـاره!
والقضيـه ماتعـم ولا سردهـا كـل سـارد=والبقا لأهل النقاء والحـر تكفيـه الإشـاره