حنّا العرب يا مدعين العروبه= وحنّا هل التوحيد وانتم له اجناب
وحنّا شروق المجد وانتم غروبه= وحنّا هل التاريخ وأنتم به أغراب
يوم الفقر شلتوا علينا عيوبه= واليوم عقب النفط جيتوا لنا أنساب
ويوم الفقر فينا البداوه سبوبه= واليوم صرتوا مثلنا بدو.. واعراب
لو الهوى منكم منعتم هبوبه= لا شك رزاق الملا رب الأرباب
ولو المطر منكم منعتم صبوبه= لا شك رزق الخلق من عند وهاب
جيش الحسد سقتوا علينا حروبه= كلٍ يبي يزرع على جسمنا ناب
حربٍ على المحسن تراها عقوبه= يالله عساكم ما تفيدون حراب
ياما عطينا ما ندوّر مثوبه= الا من اللي من ترجاه ما خاب
وياما نصرنا صاحبٍ ضيقوا به= عاداتنا نقدم الى ما الردي هاب
وياما نصانا من تعثّر دروبه= يدخل حمانا من تعذرها الأصحاب
حنّا بنينا دارنا من طيوبه= وانتم سلبتوا داركم كل ما طاب
الله سقانا من بحرنا عذوبه= وأَنهاركم مثل البحر هدر تنساب
حنّا زرعنا الحب بأَرضٍ خصوبه = وأنتم زرعتوا كره الأجيال بتراب
وحنّا دعينا السلم نوبه ونوبه= وانتم حمام السلم بعتوه بغراب
يا من دعا للحرب ما ادراك خطوبه= لا تحسب أن الحرب تهديد وخطاب
من شبّ نار الحرب يصلى شبوبه= ومن ثوّر الفتنة تعرض للأسباب
ما يستر الرجّال ملبوس ثوبه= الدين وافعال الكرامة له ثياب